ஆண்களை அதிகம் தாக்கும் புரோஸ்டேட் புற்றுநோய்க்கான சில எச்சரிக்கை அறிகுறிகள்!!!

சிறுநீரில் ரத்தம்

புரோஸ்டேட் சுரப்பியில் புற்றுநோய் செல்களின் வளர்ச்சி இருந்தால், இரத்த நாளங்கள் பாதிக்கப்பட்டு, அதனால் சிறுநீரில் இரத்தம் கலந்து வெளிவருவதோடு, விந்தணு வெளியேற்றத்தின் போது இரத்தக்கசிவு காணப்படும். இப்படி தென்பட்டால், புரோஸ்டேட் புற்றுநோயின் தாக்கம் உள்ளது என்று அர்த்தம்.

முதுகு வலி

விந்துத்தள்ளலின் போது ஆண்கள் அளவுக்கு அதிகமாக அடி முதுகுப் பகுதியில் வலியை உணர்ந்தால், தாமதிக்காமல் உடனே மருத்துவரை அணுக வேண்டும். ஏனெனில் இதுவும் புரோஸ்டேட் புற்றுநோய்க்கான அறிகுறிகளுள் ஒன்று.

விறைப்புத்தன்மை குறைபாடு

விறைப்புத்தன்மை குறைபாட்டுடன், வலியுடன் கூடிய விந்துத்தள்ளல் இருந்தால், அதுவும் புரோஸ்டேட் புற்றுநோய்க்கான அறிகுறியே.

அடிக்கடி சிறுநீர்

ஒரு நாளில் சொல்ல முடியாத அளவில் அடிக்கடி சிறுநீர் கழிக்க நேர்ந்தால், குறிப்பாக தண்ணீர் மற்றும் இதர நீர்ம பானங்கள் எதுவும் அருந்தாமல் இந்நிலை இருந்தால், தாமதிக்காமல் மருத்துவரை உடனே சந்திக்க வேண்டும். இது சாதாரணமாக உங்களுக்கு தோன்றினாலும், ஆண்களுக்கு இது மிகவும் ஆபத்தானது.

எரிச்சல்

சிறுநீர் கழிக்கும் போது எரிச்சல் மற்றும் வலியை உணர்ந்தால், அதை சாதாரணமாக நினைக்காமல், உடனே மருத்துவரை சந்திக்க வேண்டும்.

ஆண்குறியில் வீக்கம்

சிறுநீர் கழிப்பதில் பிரச்சனை இருப்பதுடன், ஆண்குறியில் காயங்கள் அல்லது வீக்கங்கள் இருந்தால், இதுவும் புரோஸ்டேட் சுரப்பியில் புற்றுநோய் செல்கள் வளர்ந்து கொண்டிருக்கிறது என்று அர்த்தம்.

சிறுநீர் கழிக்க முடியாமல் தவிப்பது

சிறுநீர் கழிக்க முடியாமல் தவிக்கிறீர்களா? அப்படியெனில் உடனே புரோஸ்டேட் புற்றுநோய் உள்ளதா என்று பரிசோதித்துக் கொள்ளுங்கள். புரோஸ்டேட் சுரப்பியில் புற்றுநோய் கட்டிகள் வளர்ந்தால் தான், அவை சிறுநீர் கழிப்பதில் தடையை ஏற்படுத்தும். எனவே சங்கடப்படாமல் சோதனை செய்து கொள்ளுங்கள்.