கொளுத்தும் வெயிலால் உங்கள் முடி உடையாமல், கொட்டாமல் இருக்க இந்த எளிய உணவுகளை சாப்பிடுங்க

Summer Hair Care: தமிழ்நாடு முழுவதும் வெயில் தனது ருத்ர தாண்டவத்தை தொடங்கி விட்டது. வெயிலால் நமது உடலின் அனைத்து பாகங்களும் கடுமையாக பாதிக்கப்படுகிறது. குறிப்பாக நமது முடி வெயிலால் பல்வேறு பாதிப்புகளை சந்திக்கிறது. மற்ற பருவக்காலங்களில் முடிக்கு ஏற்படும் பாதிப்பை விட கோடைகாலத்தில் முடியின் ஆரோக்கியம் கடுமையாக பாதிக்கப்படும்.

கொளுத்தும் கோடை வெயிலிடமிருந்து உங்கள் கூந்தலை பாதுகாக்கும் ரகசியம் உங்களின் உணவு முறையில்தான் ஒளிந்துள்ளது. கோடைக்காலத்தில் பெரும்பாலானோர் செரிமானத்திற்குச் சிரமமான, கனமான உணவுகளைத் தவிர்க்கின்றனர். ஏனெனில் அவை உடலுக்குத் தேவையான நீர்ச்சத்தை அளிப்பதில்லை. எனவே ஊட்டச்சத்துக்களும், நீர்ச்சத்தும் நிறைந்த உணவுகளை எடுத்துக்கொள்வது கூந்தலின் ஆரோக்கியத்தையும், ஒட்டுமொத்த ஆரோக்கியத்தையும் மேம்படுத்த அவசியமாகும்.

இந்த பதிவில் கோடைகாலத்தில் கூந்தலை வலிமையாகவும் பளபளப்பாகவும் வைத்திருக்க உதவும், ஊட்டச்சத்துக்கள் நிறைந்த எளிய உணவுகள் என்னென்ன என்று தெரிந்து கொள்ளலாம். இவற்றை அடிக்கடி உணவில் சேர்த்துக் கொள்வது உங்கள் சருமத்தையும், கூந்தலையும் பாதுக்காப்பாக வைத்திருக்க உதவும்.

தேங்காய் எண்ணெய்

தேங்காய் எண்ணெய் ஒரு சிறந்த சமையலறைப் பொருளாகும், இது சரும பராமரிப்பு மற்றும் கூந்தல் பராமரிப்பு இரண்டிலுமே பயன்படக்கூடியது. இதை சரும பாதுகாப்பிற்காக சருமத்தில் தடவலாம் மற்றும் உணவை சமைக்கலாம். இதன் மூலம் மற்ற எண்ணெயில் காணப்படும் ஆரோக்கியமற்ற நிறைவுற்ற கொழுப்புகளை நீங்கள் தவிர்க்கலாம். கூடுதல் ஆற்றலுக்காக உங்கள் காலை காபியிலும் தேங்காய் எண்ணெயைச் சேர்க்கலாம். முகத்திற்கான ஸ்க்ரப் தயாரிக்க உப்புடன் சேர்த்து பயன்படுத்தலாம், அனைத்திற்கும் மேலாக முடியில் தடவுவதன் மூலம் அதன் ஆரோக்கியத்தை பராமரிக்கலாம்.

ப்ளூபெர்ரி

அமெரிக்க வேளாண்மைத் துறையின் Human Nutrition Center (HNRCA), 40 பழங்கள் மற்றும் காய்கறிகளுடன் ஒப்பிடுகையில், ப்ளூபெர்ரியில் அதிக ஆன்டி ஆக்சிடண்ட்கள் இருப்பதாக தெரிவித்துள்ளது. ப்ளூபெர்ரி உங்கள் தலைமுடியை பாதுகாப்பது மட்டுமின்றி, முதுமை, இதய நோய்கள் மற்றும் புற்றுநோய்க்கு வழிவகுக்கக்கூடிய ஆக்ஸிஜனேற்ற அழுத்தத்தையும் இதை தயிருடன் சேர்த்து சாப்பிடுவது அதன் நன்மைகளை அதிகரிக்கும். ஏனெனில் அதில் உள்ள கூடுதல் புரதம் தலைமுடியை வலுவாகவும் அடர்த்தியாகவும் வைத்திருக்கிறது.

மீன்

பிற அசைவ உணவுகளை ஒப்பிடும் போது மீன்களில் கூந்தல் ஆரோக்கியத்தை அதிகரிக்கும் ஊட்டச்சத்துக்கள் அதிகமாக உள்ளன. மீன்களில், குறிப்பாக சால்மன் மீன், மத்தி மீன் போன்றவற்றில் அதிக அளவில் ஒமேகா-3 கொழுப்பு அமிலங்கள் உள்ளன. இந்த ஆரோக்கியமான கொழுப்புகள் இல்லாமல், முடி எளிதில் உடைந்து வறண்டு போகும். எனவே இந்த கோடை காலத்தில் மீன் வகைகளை அடிக்கடி உணவில் சேர்த்துக் கொள்ளுங்கள்.

தர்பூசணி

தர்பூசணியில் அதிக நீர்ச்சத்து இருக்கும் அதே நேரத்தில், அது பல ஊட்டச்சத்துக்களையும் கொண்டுள்ளது. ஒரு கப் தர்பூசணியில் தினசரி பரிந்துரைக்கப்படும் வைட்டமின் A-வில் 17 சதவீதமும், வைட்டமின் C-யில் 21 சதவீதமும் உள்ளன. இது எடைக்குறைப்பிற்கும் உதவுகிறது. வைட்டமின் A, உச்சந்தலையில் தோல் பொடுகு வராமல் தடுப்பதுடன், ஆரோக்கியமான கொலாஜன் செல்களை ஊக்குவித்து, உங்கள் முடியை பளபளப்பாகவும் வலுவாகவும் வைத்திருக்க உதவுகிறது. இதுமட்டுமின்றி தியாமின், வைட்டமின் B-6, மெக்னீசியம், பாந்தோத்தேனிக் அமிலம், பொட்டாசியம், துத்தநாகம், செலினியம், கோலின், நியாசின் மற்றும் ரிபோஃப்ளேவின் போன்ற ஊட்டச்சத்துக்களும் தர்பூசணியில் உள்ளது. தர்பூசணி 92 சதவீதம் நீரால் ஆனது, இதை கோடைகாலத்தில் தொடர்ச்சியாக உடலை நீரேற்றத்துடன் வைத்திருக்க உதவுகிறது.

கீரைகள்

கோடைக்காலத்தில் இரும்புச்சத்து நிறைந்த கீரை இலைகளை அடிக்கடி உணவில் சேர்த்துக் கொள்வது பல நன்மைகளை அளிக்கிறது. கீரை போன்ற இலைக்காய்கறிகள், சிவப்பு இரத்த செல்கள் மற்றும் உரோமக்கால்களுக்கு ஆக்ஸிஜனைக் கொண்டு செல்லவும், ஆரோக்கியமான முடி வளர்ச்சியை ஊக்குவிக்கவும் உதவுகின்றன. கீரை வகைகளில் பயோட்டின் நிறைந்துள்ளது, இது முடி ஆரோக்கியத்திற்கு மிகவும் அவசியமான வைட்டமின் ஆகும்.

தக்காளி

லைக்கோபீன், பீட்டா-கரோட்டின் மற்றும் வைட்டமின் சி சத்துக்கள் நிறைந்த தக்காளி, தோல் மற்றும் முடி சேதமடைவதிலிருந்து பாதுகாக்கிறது. தக்காளியில் லைக்கோபீன் ஊட்டச்சத்து அதிகமாக உள்ளது. கோடைகாலத்தில் அடிக்கடி முடிந்தவரை தினமும் தக்காளியை உணவில் சேர்த்துக் கொள்வது முடியின் வளர்ச்சியை ஊக்குவிக்கும்.