முளைக்கட்டிய பச்சைப்பயறு மசாலா

திங்கட்கிழமை வந்தாலே அனைவருக்கும் ஒருவித கடுப்பு ஏற்படும். அதிலும் காலையில் எழுந்து சமைத்துக் கொண்டு, அலுவலகத்திற்கு செல்வது என்பது சற்று தொல்லை பிடித்த வேலையாக இருக்கும். அதனால் பலர் காலையில் சரியாக சாப்பிடாமல் கூட செல்வார்கள். ஆனால் கஷ்டப்படாமல், உடலுக்கு ஆரோக்கியத்தை தரும் வகையில், ஞாயிற்று கிழமை அன்று மதியம் பச்சை பயறை நீரில் நன்கு ஊற வைத்துவிட்டு, இரவில் படுக்கும் போது அதனை ஒரு துணியால் கட்டிவிட்டு தூங்கினால், மறுநாள் காலையில் எழுந்து அருமையான ரெசிபி ஒன்றை செய்யலாம்.

அது தான் முளைக்கட்டிய பச்சைப்பயறு மசாலா. இதனை காலையில் செய்து சாப்பிட்டால், உடலுக்கு வேண்டிய சத்துக்கள் கிடைத்து, நாள் முழுவதும் நன்கு சுறுசுறுப்புடன் செயல்படுவதற்கு தேவையான சக்தியானது கிடைக்கும். சரி, இப்போது அந்த முளைக்கட்டிய பச்சைப்பயறு மசாலாவை எப்படி செய்வதென்று பார்ப்போமா!!!

தேவையான பொருட்கள்:

முளைக்கட்டிய பச்சைப்பயறு - 1 கப்
வெங்காயம் - 1/2 (பொடியாக நறுக்கியது)
பச்சை மிளகாய் - 1 (பொடியாக நறுக்கியது)
கேரட் - 1 (பொடியாக நறுக்கியது)
தக்காளி - 1/2 (நறுக்கியது)
எலுமிச்சை சாறு - 2 டேபிள் ஸ்பூன்
சாட் மசாலா - 1 டீஸ்பூன்
ப்ளாக் உப்பு - 1 சிட்டிகை
உப்பு - தேவையான அளவு

செய்முறை:

முதலில் முளைக்கட்டிய பச்சைப்பயறை வெதுவெதுப்பான நீரில் கழுவிக் கொள்ள வேண்டும்.

பின்னர் அதனை ஒரு பௌலில் போட்டு, நறுக்கிய வெங்காயம், கேரட், பச்சை மிளகாய் மற்றும் தக்காளி சேர்த்து நன்கு கலந்து கொள்ள வேண்டும்.

பின், உப்பு, ப்ளாக் உப்பு மற்றும் சாட் மசாலா சேர்த்து ஸ்பூன் கொண்டு நன்கு கிளறி விட வேண்டும்.

இறுதியில் எலுமிச்சை சாறு சேர்த்து பிரட்டி, நீண்ட நேரம் ஊற வைக்காமல் உடனே சாப்பிட வேண்டும்.

இப்போது சூப்பரான மற்றும் ஆரோக்கியமான முளைக்கட்டிய பச்சைப்பயறு மசாலா!!!

குறிப்பு:

தற்போது முளைக்கட்டிய பச்சைப்பயறு கடைகளில் விற்கப்படுகிறது. அதைக்கூட வாங்கி பயன்படுத்தலாம்.