பூண்டு புளி குழம்பு

Veg

oi-Maha

By Maha

Published: Tuesday, July 31, 2012, 10:51 [IST]

மதிய வேளைகளில் உடலுக்கு நல்ல சத்துக்களை தரக்கூடிய வகையில், நீண்ட நேரம் சமைக்காமல், எளிதில் சமைத்து முடிக்க ஒரு சிறந்த குழம்பு என்றால் அது பூண்டு புளி குழம்பு தான். இந்த குழம்பில் உள்ள பூண்டு உடலில் இரத்த அழுத்தத்தை குறைத்து, கொழுப்புகளை குறைப்பதோடு, இதய நோய் வராமலும் தடுக்கும். ஆகவே அந்த பூண்டு புளி குழம்பை எப்படி செய்வதென்று பார்ப்போமா!!!

தேவையான பொருட்கள் :

பூண்டு - 100 கிராம்சின்ன வெங்காயம் - 100 கிராம்
தக்காளி - 2 (பெரியது)
வெந்தய பொடி - 1/2 டீஸ்பூன்
குழம்பு மிளகாய் தூள் - 2 டேபிள் ஸ்பூன்
கடுகு - 1/2 டீஸ்பூன்
உளுத்தம் பருப்பு - 1/2 டீஸ்பூன்
பெருங்காயத்தூள் - 1/2 டீஸ்பூன்
தேங்காய் பால் - 1/2 கப் (சற்று கெட்டியானது)
புளி - 1 எலுமிச்சை அளவு
கறிவேப்பிலை - சிறிது
நல்லெண்ணெய் - 50 கிராம்
சமையல் எண்ணெய் - தேவையான அளவு
உப்பு - தேவையான அளவு

செய்முறை :

முதலில் பூண்டை நன்கு சுத்தமாக தோல் உரித்து வைத்துக் கொள்ளவும். பின் வெங்காயம், தக்காளியை நறுக்கிக் கொள்ளவும். புளியை நீரில் அரை மணிநேரம் ஊற வைத்து, கரைத்துக் கொள்ளவும்.

பிறகு ஒரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், கடுகு, உளுத்தம் பருப்பு, கறிவேப்பிலை, வெந்தயப்பொடி, பெருங்காயத்தூள போட்டு தாளிக்கவும்.

பின்பு அதில் நறுக்கி வைத்துள்ள வெங்காயம் மற்றும் பூண்டுகளை சேர்த்து சற்று பொன்னிறமாக வதக்கவும்.

பின் நறுக்கி வைத்திருக்கும் தக்காளியை போட்டு வதக்கவும். சிறிது நேரம் கழித்து, குழம்பு மிளகாய் தூள், சிறிது தண்ணீர் (அதிக அளவு ஊற்றி விட வேண்டாம்) மற்றும் வேண்டிய அளவு உப்பு சேர்த்து நன்கு கொதிக்கவிடவும்.

குழம்பானது நன்கு கொதித்ததும், கரைத்து வைத்துள்ள புளியை ஊற்றி, பச்சை வாசனை போகும் வரை நன்கு கொதிக்க விடவும். பின் தேங்காய் பாலை ஊற்றி கொதிக்க வைக்கவும்.

குழம்பு நன்கு கொதித்து ஓரளவு கெட்டியானதும், அதில் நல்லெண்ணெயை ஊற்றி ஒரு கொதி விட்டு இறக்கிக் கொள்ளவும்.

இப்போது சுவையான பூண்டு புளி குழம்பு தயார்!!!