தக்காளி தொக்கு இப்படி செய்யுங்க.. 1 வாரம் வரை வெச்சு சாப்பிடலாம்.. சைடு டிஷ் பிரச்சனையே இருக்காது!

Tomato Thokku Recipe In Tamil: அடிக்கடி இட்லி, தோசைக்கு என்ன சைடு டிஷ் செய்வதென்று யோசித்து முடிவெடுப்பது பெரிய வேலையாக உள்ளதா? உங்கள் வீட்டில் தக்காளி நிறைய உள்ளதா? அப்படியானால் அந்த தக்காளியைக் கொண்டு தொக்கு செய்யுங்கள். இந்த தொக்கு இட்லி, தோசையுடன் மட்டுமின்றி, சாதத்துடன் சேர்த்தும் சாப்பிடலாம். இந்த தொக்கை ஒருமுறை செய்து வைத்தால் 1 வாரம் வரை வைத்து சாப்பிடலாம்.

உங்களுக்கு இந்த தக்காளி தொக்கு ரெசிபியை எப்படி செய்வதென்று தெரிந்து கொள்ள வேண்டுமா? கீழே தக்காளி தொக்கு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* நல்லெண்ணெய் - 2-3 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1 டீஸ்பூன்
* பெரிய வெங்காயம் - 250 கிராம் (பொடியாக நறுக்கியது)
* கறிவேப்பிலை - 1 கொத்து
* பூண்டு - 25 பல் (பொடியாக நறுக்கியது)
* உப்பு - சுவைக்கேற்ப
* தக்காளி - 1/2 கிலோ (பொடியாக நறுக்கியது)
* குழம்பு மிளகாய் தூள் - 3-4 டேபிள் ஸ்பூன்
* கரம் மசாலா - 1/2 டீஸ்பூன்

தாளிப்பதற்கு...

* நல்லெண்ணெய் - 1 டேபிள் ஸ்பூன்
* கறிவேப்பிலை - 2 கொத்து

செய்முறை:

* முதலில் ஒரு வாணலியை அடுப்பில் வைத்து, அதில் நல்லெண்ணெய் ஊற்றி சூடானதும், கடுகு, உளுத்தம் பருப்பு சேர்த்து தாளிக்க வேண்டும்.
* பின்பு அதில் பொடியாக நறுக்கிய வெங்காயம் மற்றும் கறிவேப்பிலை சேர்த்து மிதமான தீயில் வைத்து, வெங்காயம் கண்ணாடி பதத்திற்கு வரும் வரை வதக்க வேண்டும்.
* அதன் பின் அதில் பொடியாக நறுக்கிய பூண்டு பற்களை சேர்த்து, சுவைக்கேறப் உப்பு தூவி நன்கு வதக்க வேண்டும்.
* பிறகு அதில் பொடியாக நறுக்கிய தக்காளியை சேர்த்து கிளறி, நன்கு வதக்க வேண்டும்.
* தக்காளியில் இருந்து நீர் விட்டு வரும் போது, அதில் குழம்பு மிளகாய் தூள் சேர்த்து நன்கு கிளறி, மூடி வைத்து 5 நிமிடம் வேக வைக்க வேண்டும்.
* பின் மூடியைத் திறந்து கிளறி விட்டு, மீண்டும் மூடி வைத்து 10 நிமிடம் குறைவான தீயில் வைத்து நன்கு வேக வைக்க வேண்டும். அப்படி வேக வைக்கும் போது அவ்வப்போது மூடியைத் திறந்து கிளறி விட வேண்டும்.
* 10 நிமிடம் கழித்து மூடியைத் திறந்தால், தொக்கில் இருந்து எண்ணெய் பிரிந்து வந்திருக்கும். இந்நிலையில் 1/2 டீஸ்பூன் கரம் மசாலாவை சேர்த்து கிளறி, மீண்டும் 2-3 நிமிடம் வேக வைத்து இறக்க வேண்டும்.
* இறுதியாக ஒரு வாணலியை அடுப்பில் வைத்து, அதில் நல்லெண்ணெய் ஊற்றி சூடானதும், கறிவேப்பிலை சேர்த்து தாளித்து, தக்காளி தொக்குடன் சேர்த்து கிளறினால், சுவையான தக்காளி தொக்கு தயார்.