ஹோட்டல் ஸ்டைல் தக்காளி உளுந்து சட்னி.. இந்த சட்னியை செஞ்சா வீட்டுல எல்லாரும் 2 இட்லி எக்ஸ்ட்ரா சாப்பிடுவாங்க..

Thakkali Ulunthu Chutney Recipe In Tamil: இட்லிக்கு உங்கள் வீட்டில் பெரும்பாலும் தக்காளி சட்னியை செய்வீர்களா? எப்போதும் ஒரே சுவையில் தான் தக்காளி சட்னியை செய்வீர்களா? அப்படியானால் அவ்வப்போது சற்று வித்தியாசமாகவும் தக்காளி சட்னியை ட்ரை செய்யுங்கள்.

பொதுவாக தக்காளி சட்னியை பல விதத்தில் செய்யலாம். அதில் ஒன்று தான் உளுந்து சேர்த்து செய்யப்படும் தக்காளி சட்னி. இந்த தக்காளி உளுந்து சட்னி இட்லியுடன் சேர்த்து சாப்பிட அருமையாக இருக்கும். இந்த சட்னியை செய்தால் வீட்டில் உள்ளோர் 2 இட்லி எக்ஸ்ட்ரா சாப்பிடுவார்கள். அந்த அளவில் சுவையாக இருக்கும்.

உங்களுக்கு தக்காளி உளுந்து சட்னியை எப்படி செய்வதென்று தெரிந்து கொள்ள வேண்டுமா? கீழே தக்காளி உளுந்து சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 1 டேபிள் ஸ்பூன்
* கடுகு - 1 டீஸ்பூன்
* சீரகம் - 1/2 டீஸ்பூன்
* வரமிளகாய் - 4
* பூண்டு - 6-7 பல்
* கருப்பு உளுந்து - 4 டீஸ்பூன்
* கறிவேப்பிலை - 2 கொத்து
* தக்காளி - 4 (நறுக்கியது)
* உப்பு - சுவைக்கேற்ப

தாளிப்பதற்கு...

* எண்ணெய் - 2 டீஸ்பூன்
* கடுகு - 1/2 டீஸ்பூன்
* கறிவேப்பிலை - 1 கொத்து
* வரமிளகாய் - 1
* பெருங்காயத் தூள் - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, சீரகம், வரமிளகாய் சேர்த்து தாளிக்க வேண்டும்.
* பின் அதில் பூண்டு பற்களை சேர்த்து நல்ல மணம் வரும் வரை வதக்க வேண்டும்.
* அதன் பின் கருப்பு உளுத்தம் பருப்பை சேர்த்து நல்ல மணம் வரும் வரை வறுத்து, கறிவேப்பிலை சேர்த்து வதக்க வேண்டும்.
* பின்பு நறுக்கிய தக்காளியை சேர்த்து, சுவைக்கேற்ப உப்பு தூவி நன்கு மென்மையாகும் வரை வதக்கி இறக்கி குளிர வைக்க வேண்டும்.
* பிறகு மிக்சர் ஜாரில் வதக்கிய பொருட்களை சேர்த்து, நன்கு மென்மையாக அரைத்துக் கொள்ள வேண்டும்.
* பின் அரைத்த சட்னியை கிண்ணத்தில் எடுத்துக் கொண்டு, சட்னிக்கு தேவையான அளவு நீரை ஊற்றி கலந்து கொள்ள வேண்டும். இந்த சட்னி சற்று நீராக இருந்தால் நன்றாக இருக்கும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, கறிவேப்பிலை, வரமிளகாய், பெருங்காயத் தூள் சேர்த்து தாளித்து சட்னியுடன் சேர்த்து கிளறினால், சுவையான தக்காளி உளுந்து சட்னி தயார்.