சப்பாத்திக்கு சுரைக்காயை வெச்சு இப்படி ஒரு சைடு டிஷ் பண்ணுங்க.. 2 சப்பாத்தி எக்ஸ்ட்ரா சாப்பிடுவாங்க..

Surakkai Kadayal Recipe In Tamil: இரவு சப்பாத்தி செய்ய போகிறீர்களா? சப்பாத்திக்கு இன்று நீங்கள் இதுவரை செய்திராத ஒரு புது சைடு டிஷ் செய்ய நினைக்கிறீர்களா? அப்படியானால் வீட்டில் சுரைக்காய் உள்ளதா? அந்த சுரைக்காய் கொண்டு கடையல் செய்யுங்கள்.

இந்த சுரைக்காய் கடையல் சப்பாத்தியுடன் மட்டுமின்றி சாதத்துடன் சாப்பிடவும் நன்றாக இருக்கும். முக்கியமாக சுரைக்காயை இப்படி செய்யும் போது சுரைக்காய் பிடிக்காதவர்கள் கூட விரும்பி சாப்பிடுவார்கள். அதுவும் இந்த கடையலை சப்பாத்தியுடன் சாப்பிட்டால், வீட்டில் உள்ளோர் 2 சப்பாத்தியை எக்ஸ்ட்ரா சாப்பிடுவார்கள்.

உங்களுக்கு சுரைக்காய் கடையலை எப்படி செய்வதென்று தெரிந்து கொள்ள வேண்டுமா? கீழே சுரைக்காய் கடையல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பிஞ்சு சுரைக்காய் - 1
* எண்ணெய் - 3 டீஸ்பூன்
* கடுகு - 1/4 டீஸ்பூன்
* வெந்தயம் - 1/4 டீஸ்பூன்
* பூண்டு - 7-8 பல்
* பெரிய வெங்காயம் - 1
* வரமிளகாய் - 4 (உடைத்து விதைகளை நீக்கியது)
* தக்காளி - 2
* மஞ்சள் தூள் - 1/4 ஸ்பூன்
* உப்பு - 1 டீஸ்பூன்
* மிளகாய் தூள் - 1/2 டீஸ்பூன்
* மல்லித் தூள் - 1 1/2 டீஸ்பூன்
* தண்ணீர் - 1/4 லிட்டர்

செய்முறை:

* முதலில் பிஞ்சு சுரைக்காயை எடுத்து, அதன் தோலை நீக்கிவிட்டு, பொடியாக நறுக்கிக் கொள்ள வேண்டும்.
* பின்னர் குக்கரை அடுப்பில் வைத்து, அதில் எண்ணெய் ஊற்றி சூடானது, கடுகு, வெந்தயம் சேர்த்து தாளிக்க வேண்டும்.
* பின்பு அதில் பூண்டு சேர்த்து 1 நிமிடம் வதக்க வேண்டும்.
* பின் அதில் பொடியாக நறுக்கிய வெங்காயம் மற்றும் வரமிளகாயை சேர்த்து வதக்க வேண்டும்.
* பிறகு அதில் தக்காளியை சேர்த்து, அத்துடன் மஞ்சள் தூள், உப்பு, மிளகாய் தூள், மல்லித் தூள் சேர்த்து 3-4 நிமிடம் நன்கு வதக்க வேண்டும்.
* பின் அதில் சுரைக்காயை சேர்த்து நன்கு 2 நிமிடம் கிளறி, நீரை ஊற்றி, குக்கரை மூடி, 3 விசில் விட்டு இறக்க வேண்டும்.
* விசில் போனதும் குக்கரைத் திறந்து, மத்து கொண்டு கடைந்து, கொத்தமல்லியைத் தூவினால், சுவையான சுரைக்காய் கடையல் தயார்.

Image Courtesy: Ragas kitchen