1 கப் பொட்டுக்கடலையும், 5 ரூபாய் பூஸ்ட்டும் இருந்தா.. ரம்ஜானுக்கு இப்படியொரு ஸ்வீட் செஞ்சு கொடுங்க..

Ramzan Special Chocolate Burfi Recipe In Tamil: ரம்ஜான் பண்டிகையை முன்னிட்டு இஸ்லாமியர்களின் வீடுகளில் வெறும் பிரியாணியும், அசைவ உணவுகளும் மட்டும் சமைக்கப்படுவதில்லை. பல்வேறு சுவையான இனிப்பு பலகாரங்களும் செய்யப்படுவதுண்டு. ரம்ஜான் நாளில் எப்போதும் வழக்கமாக செய்யும் ஸ்வீட்களை தான் செய்வீர்களா?

அப்படியானால் இந்த ரம்ஜான் பண்டிகையன்று இதுவரை நீங்கள் செய்திராத ஒரு வித்தியாசமான அதே சமயம் சுவையான ஒரு பர்பியை செய்யுங்கள். அதுவும் பொட்டுக்கடலையையும், பூஸ்ட்டையும் கொண்டு செய்யுங்கள்.

கீழே பொட்டுக்கடலையையும், பூஸ்ட்டையும் கொண்டு எப்படி பர்பி செய்வதென்று கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பொட்டுக்கடலை - 1 கப்
* பூஸ்ட் - 1 பாக்கெட் (5 ரூபாய் பாக்கெட்)
* சர்க்கரை - 1 கப்
* ஏலக்காய் - 2
* முந்திரி - 8
* நெய் - 1/4 கப்
* காய்ச்சிய பால் - 3 டேபிள் ஸ்பூன்

செய்முறை:

* முதலில் மிக்சர் ஜாரில் பொட்டுக்கடலை மற்றும் பூஸ்ட் சேர்த்து நன்கு மென்மையாக அரைத்துக் கொள்ள வேண்டும்.
* பின்னர் அதை சல்லடையில் போட்டு நன்கு சலித்துக் கொள்ள வேண்டும்.
* பின் அதே மிக்சர் ஜாரில் 1 கப் சர்க்கரையை சேர்த்து, அத்துடன் ஏலக்காய், முந்திரி சேர்த்து நன்கு மென்மையாக அரைத்துக் கொள்ள வேண்டும்.
* பின்பு அதையும் சல்லடையில் போட்டு நன்கு சலித்துக் கொள்ள வேண்டும். பின் பொட்டுக்கடலை கலவையும், சர்க்கரையும் நன்கு ஒன்று சேரும் வரை கலந்து கொள்ள வேண்டும்.
* பிறகு ஒரு நாண்ஸ்டிக் கடாயை அடுப்பில் வைத்து, அதில் 1/4 கப் நெய்யை ஊற்றி சூடானதும், பொட்டுக்கடலை கலவையை சேர்த்து, நன்கு ஓரளவு நிறம் மாறும் வரை நன்கு வறுக்க வேண்டும்.
* பொட்டுக்கடலை மாவின் நிறம் மாறத் தொடங்கியதும், அதில் காய்ச்சி ஆற வைத்த பாலை ஊற்றி நன்கு 2 நிமிடம் கட்டிகளின்றி கிளறி விட வேண்டும்.
* பின் ஒரு அகலமான தட்டில் நெய்யைத் தடவி, வாணலியில் உள்ளதை அப்படியே தட்டில் கொட்டி, சமமாக பரப்பி விட வேண்டும்.
* பின்பு அதை 10 நிமிடம் குளிர வைக்க வேண்டும்.
* அதன் பின் கத்தியால் அவற்றை சதுரத் துண்டுகளாக வெட்டினால், சுவையான சாக்லேட் பர்பி தயார்.

Image Courtesy: Cook Click N Devour!!!