ராஜஸ்தான் ஸ்டைல் பூண்டு சட்னி ரெசிபி... ஒரு தடவ அரையுங்க... ஒரு வாரத்துக்கு சைடிஷ் பிரச்சினையே இல்ல...!

Rajasthan Garlic Chutney Recipe in Tamil: வீட்டில் தினசரி இட்லி, தோசை மற்றும் சப்பாத்தி செய்வது நமக்கு வழக்கமாகிவிட்ட ஒன்று. அதற்கும் விதவிதமாய் வித்தியாசமாய் சட்னி குழம்பு வகைகளை செய்து கொண்டு இருக்கிறோம். என்ன தான் சுவையாக செய்தாலும் சில நேரத்தில் அலுப்பு தட்டிவிடுகிறது. அதற்கு என்ன செய்ய முடியும் என்கிறீர்களா? சில பொருட்களை கூட்டி குறைத்து சுவையை தான் மாற்ற முடியும். ஒவ்வொரு ஊரிலும் சுவை வேறுபட காரணம் இது தான்.

பூண்டு சட்னி என்பது பொதுவாக இட்லி, தோசைக்கு அரைக்கப்படும் எளிதான மற்றும் சுவையான சட்னி. இந்த சட்னி அனைவராலும் விரும்பப்பட காரணம் இது அரைக்க எளிதானது மற்றும் நீண்ட நாட்கள் கெட்டுப்போகாமல் இருக்கும். அதிலும் இந்த ராஜஸ்தான் பூண்டு சட்னி ஒரு வாரம் வரை கெட்டுப்போகாமல் இருக்கும். இந்த பதிவில் ராஜஸ்தான் பூண்டு சட்னி எப்படி செய்வது என பார்க்கலாம்.

தேவையான பொருட்கள்:

- பூண்டு - 10 அல்லது 15 பல்
- காய்ந்த மிளகாய் - 5-6 (அல்லது காரத்திற்கு ஏற்ப)
- சின்ன வெங்காயம் - 10 அல்லது 12
- புளி - சிறிதளவு (ஒரு சிறிய நெல்லிக்காய் அளவு)
- நல்லெண்ணெய் - 2 டேபிள் ஸ்பூன்
- கடுகு - 1 டீ ஸ்பூன்
- உளுத்தம் பருப்பு - 1 டீ ஸ்பூன்
- கடலைப் பருப்பு - 1 டீ ஸ்பூன்
- உப்பு - தேவையான அளவு
- கருவேப்பிலை - சிறிதளவு

செய்முறை:

- பூண்டு மற்றும் வெங்காயத்தை தோல் உரித்து எடுத்து கொள்ளவும்.

- வெங்காயத்தின் மேற்பரப்பில் இருக்கும் கருப்பு நிற பூஞ்சையை தண்ணீரில் அலசி எடுத்து கொள்ளவும்.

- வாணலியை அடுப்பில் வைத்து சூடானதும் எண்ணெய் சேர்த்து காய விடவும்.

- மிளகாயை சேர்த்து தனியாக வறுத்து எடுத்து ஆறவிடவும்.

- வாணலியில் மீதம் இருக்கும் எண்ணெயில் தோல் உரித்து வைத்த பூண்டு மற்றும் சின்ன வெங்காயத்தைச் சேர்த்து பொன்னிறமாக வதக்கி ஆறவிடவும்.

- ஒரு மிக்ஸி ஜாரில் வதக்கி ஆற வைத்த பூண்டு, வெங்காயம், மற்றும் வறுத்து வைத்த மிளகாயை சேர்க்கவும்.

- பின் அதனுடன் புளி, தேவையான அளவு உப்பு மற்றும் சிறிதளவு தண்ணீர் சேர்த்து அரைத்து கொள்ளவும்.

- வாணலியை அடுப்பில் வைத்து சூடானதும் எண்ணெய் சேர்த்து காயவிடவும்.

- பின் அதில் கடுகு சேர்த்து பொரிய விடவும்.

- அதனுடன் கருவேப்பிலை சேர்த்து தாளித்து கொள்ளவும்.

- அதில் கடலைப் பருப்பு மற்றும் உளுந்தம் பருப்பை சேர்த்து பொன்னிறமாக வறுக்கவும்.
- பின் அடுப்பை அணைத்து அதை சட்னி உடன் சேர்த்து கிளறினால் சுவையான பூண்டு சட்னி ரெடி!

- உங்கள் காரத்திற்க்கு ஏற்ப மிளகாயின் அளவை கூட்டி குறைத்து கொள்ளலாம்.

- நீண்ட நாட்களுக்கு வைத்திருக்க தாளிப்பில் சட்னியை சேர்த்து லேசாக வதக்கி வைத்தால் கெட்டு போகாது.

- இது இட்லி, தோசை மற்றும் சப்பாத்திக்கு ஏற்ற சைடு-டிஷ் ஆக இருக்கும்.