Hair Care Tips: முடி ராக்கெட் வேகத்தில் வளரணுமா? அப்ப இந்த விதைகளில் ஒன்றை தினமும் உணவில் சேர்த்துக்கோங்க

Hair Care Tips: வயது அதிகரிக்கும் போது அனைவரும் எதிர்கொள்ளும் ஒரு பிரச்சினை முடி உதிர்வாகும். ஒவ்வொரு முறை தலை சீவும் போகும் கையிலும், சீப்பிலும் முடியை பார்க்கும் போது நாம் வழுக்கையை நோக்கி சென்று கொண்டிருக்கிறோம் என்ற அச்சம் அனைவருக்குள்ளும் ஏற்படும். முடி உதிர்வை கட்டுப்படுத்துவதும், முடி வளர்ச்சியை ஊக்குவிப்பதும்தான் வழுக்கை விழாமல் தடுக்கும்.

முடி வளர்ச்சியை ஊக்குவிப்பதற்கான முதல் புள்ளி நம் உணவிலிருந்துதான் தொடங்குகிறது. சில ஸ்பெஷல் பொருட்களை உணவில் சேர்த்துக் கொள்வதன் மூலம் முடி வளர்ச்சியை ஊக்குவிக்கலாம். ஆரோக்கிய உணவுகள் என்று வரும்போது அதில் சில விதைகள் முக்கிய இடத்தில் உள்ளன. இந்த விதைகள் உரோமக்கால்களுக்குத் தேவையானசேர்மங்கள் மற்றும் ஊட்டச்சத்துக்கள் நிறைந்துள்ளன. இந்த பதிவில் முடி ஆரோக்கியத்தை மேம்படுத்த உணவில் சேர்த்துக் கொள்ள வேண்டிய விதைகள் என்னென்ன என்று தெரிந்து கொள்ளலாம்.

சியா விதை

முடி பெரும்பாலும் கெரட்டின் என்ற புரோட்டினால் ஆனது. சியா விதைகள் ஒரு முழுமையான தாவரப் புரதமாகும், அதாவது அவை ஒன்பது அத்தியாவசிய அமினோ அமிலங்கள் நிறைந்ததாகும். ஆனால் இதில் மிக முக்கியமான சேர்மம் ஒமேகா-3 தான். மேலும், இவற்றில் உள்ள வீக்கத்தைக் குறைக்கும் பண்புகள், ஆரோக்கியமான உச்சந்தலைச் சூழலைப் பாதுகாத்து, முடி வளர்ச்சிக்கு உதவுகின்றன. சியா விதைகளை இரவு முழுவதும் தண்ணீர் அல்லது பாலில் ஊறவைத்து 'சியா புட்டிங்' போலச் சாப்பிடலாம் அல்லது நீங்கள் சாப்பிடும் சாலட்களில் சேர்த்துக்கொள்ளலாம் அல்லது எலுமிச்சை நீரில் கலந்து பருகலாம்.

ஆளி விதை

ஆளி விதைகள், ஒமேகா-3 கொழுப்பு அமிலங்கள், குறிப்பாக ஆல்பா-லினோலெனிக் அமிலம் போன்றவற்றின் மிகச் சிறந்த தாவர மூலங்களில் ஒன்றாகும். ஒமேகா-3 கொழுப்பு அமிலங்கள் உரோமக்கால்களுக்கு ஊட்டமளித்து, உச்சந்தலையில் ஏற்படும் அழற்சியைக் குறைக்கின்றன. மேலும், அவை முடியின் நெகிழ்வுத்தன்மையை மேம்படுத்தி, முடி உடைவதைக் குறைக்கின்றன. மேலும் ஆளி விதைகளில் லிக்னான்களும் உள்ளன, அவை ஹார்மோன்களைச் சமநிலைப்படுத்த உதவக்கூடும். தினமும் ஒரு தேக்கரண்டி அரைத்த ஆளி விதைகளை ஸ்மூத்திகள், தயிர் அல்லது ரொட்டி மாவில் சேர்க்கவும்.

பூசணிக்காய் விதைகள்

பூசணி விதைகளில் துத்தநாகம் அதிகமாக உள்ளது. இது முடி திசுக்களின் வளர்ச்சி மற்றும் சீரமைப்பு சுழற்சிக்கு அவசியமானதாகும். துத்தநாகத்தின் குறைபாடு, முடி பலவீனமாவது மற்றும் மெதுவான வளர்ச்சி போன்றவற்றை ஏற்படுத்தக்கூடும். மேலும், அவற்றில் குகுர்பிட்டின் என்ற அமினோ அமிலமும் உள்ளது. இது, ஆண்கள் மற்றும் பெண்கள் இருவருக்கும் ஆண்ட்ரோஜெனடிக் முடி உதிர்தலுக்குக் காரணமான DHT என்ற ஹார்மோனைத் தடுக்கக்கூடும் என்று ஆய்வுகள் தெரிவிக்கின்றன. தினமும் ஒரு சிறிய கைப்பிளவு பச்சையான அல்லது லேசாக வறுத்த பூசணி விதைகளை சிற்றுண்டியாக சாப்பிடலாம்.

சூரியகாந்தி விதைகள்

சூரியகாந்தி விதைகளில் வைட்டமின் E நிறைந்துள்ளது. இது ஒரு சிறந்த ஆன்டிஆக்ஸிடன்ட் ஆகும், இது உரோமக்கால்களை ஆக்ஸிஜனேற்ற அழுத்தத்திலிருந்து பாதுகாத்து, உச்சந்தலையில் ஆரோக்கியமான இரத்த ஓட்டத்தை உருவாக்குகிறது. மேலும், இவற்றில் பயோட்டின், செலினியம் மற்றும் துத்தநாகம் ஆகியவையும் உள்ளன. இந்த மூன்று ஊட்டச்சத்துக்களின் கலவையானது முடி வளர்ச்சியை ஊக்குவிப்பதற்கும், முடி உதிர்வைக் குறைப்பதற்கும் பெயர் பெற்றது.

எள்

முடி பராமரிப்பில் எள் ஆயிரக்கணக்கான ஆண்டுகளாகப் பயன்படுத்தப்பட்டு வருகிறது, மேலும் நவீன ஆய்வுகளும் அதன் மதிப்பை உறுதிப்படுத்துகிறது. எள்ளில் கால்சியம், மெக்னீசியம், துத்தநாகம் ஆகியவை நிறைந்துள்ளன. குறிப்பாக கருப்பு எள்ளில் அதிக அளவில் ஆன்டிஆக்ஸிடன்ட்கள் உள்ளன, அவை இளநரை ஏற்படுவதைத் தாமதப்படுத்த உதவக்கூடும். உச்சந்தலைக்கு ஊட்டமளிக்கவும், வேர்களை வலுப்படுத்தவும் எள் எண்ணெய் மேற்பூச்சாகப் பரவலாகப் பயன்படுத்தப்படுகிறது. வெள்ளை அல்லது கருப்பு எள்ளை லட்டு, பொரியல், சாலட் ஆகியவற்றில் சேர்க்கலாம் அல்லது சட்னியில் கலந்து சாப்பிடலாம்.