1 கப் ராகி மாவும், 1 கப் ரவையும் இருந்தா போதும்... அட்டகாசமான சுவையில் தோசை சுடலாம்...

Ragi Dosa Recipe In Tamil: உங்கள் வீட்டில் தோசை மாவு காலியாகிவிட்டதா? காலையில் என்ன சமைப்பது என்று யோசித்துக் கொண்டிருக்கிறீர்களா? உங்கள் வீட்டில் ராகி மாவும், ரவையும் உள்ளதா? அப்படியானால் அவற்றைக் கொண்டே அட்டகாசமான சுவையில் ஒரு தோசையை சுடலாம்.

இந்த ராகி தோசையை செய்வது என்பது மிகவும் சுலபம். மேலும் இது சத்தானதும் கூட. அடிக்கடி ராகியை உணவில் சேர்த்து வந்தால், உடம்பு இரும்பு போன்று வலுவாக இருக்கும் என்பார்கள். அதுவும் இந்த ராகி தோசைக்கு தேங்காய் சட்னியை சைடு டிஷ்ஷாக செய்து சாப்பிட்டால் இன்னும் அற்புதமாக இருக்கும்.

உங்களுக்கு ராகி தோசையை எப்படி செய்வதென்று தெரிந்து கொள்ள வேண்டுமா? கீழே ராகி தோசை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* ராகி மாவு - 1 கப்
* ரவை - 1 கப்
* அரிசி மாவு - 1/2 கப்
* தயிர் - 1/2 கப்
* இஞ்சி - 1 இன்ச் (பொடியாக நறுக்கியது)
* பச்சை மிளகாய் -1 (பொடியாக நறுக்கியது)
* கறிவேப்பிலை - சிறிது (பொடியாக நறுக்கியது)
* கொத்தமல்லி - சிறிது (பொடியாக நறுக்கியது)
* பெரிய வெங்காயம் - 1 (பொடியாக நறுக்கியது)
* சீரகம் - 1 டீஸ்பூன்
* மிளகுத் தூள் - 1/2 டீஸ்பூன்
* தண்ணீர் - 3 1/2 கப்
* எண்ணெய் - தேவையான அளவு

செய்முறை:

* முதலில் ஒரு பாத்திரத்தில் ராகி மாவு, ரவை, அரிசி மாவு ஆகியவற்றை எடுத்துக் கொள்ள வேண்டும்.
* பின் அதில் தயிர், பொடியாக நறுக்கிய இஞ்சி, பச்சை மிளகாய், கறிவேப்பிலை, கொத்தமல்லி, வெங்காயம், சீரகம், மிளகுத் தூள் மற்றும் சுவைக்கேற்ப உப்பு ஆகியவற்றை சேர்த்துக் கொள்ள வேண்டும்.
* பின்பு அதில் 1-2 கப் நீரை ஊற்றி கட்டிகளின்றி நன்கு கலந்து கொள்ள வேண்டும்.
* பின் அதை 15-20 நிமிடம் ஊற வைக்க வேண்டும்.
* பிறகு அதில் 1 1/2 கப் நீரை ஊற்றி, நீர் பதத்திற்கு மாவை கலந்து கொள்ள வேண்டும்.
* அடுத்து தோசைக் கல்லை அடுப்பில் வைத்து, கல் நன்கு சூடானதும், கலந்து வைத்துள்ள மாவை தோசையாக ஊற்றி, எண்ணெய் சேர்த்து நன்கு பொன்னிறமாக முன்னும் பின்னும் வேக வைத்து எடுத்தால், சுவையான ராகி தோசை தயார்.

Image Courtesy: hebbarskitchen