இட்லிக்கு ஒருடைம் தஞ்சாவூர் ஸ்பெஷல் பூண்டு சட்னியை செஞ்சு பாருங்க.. சுவை அள்ளும்...

Tanjore Special Garlic Chutney Recipe In Tamil: காலையில் இட்லிக்கு என்ன சட்னி செய்வதென்று யோசனை செய்து கொண்டிக்கிறீர்களா? இன்னும் எந்த முடிவையும் எடுக்கவில்லையா? வீட்டில் பூண்டு உள்ளதா? அப்படியானால் அந்த பூண்டு கொண்டு தஞ்சாவூர் ஸ்பெஷல் பூண்டு சட்னியை செய்யுங்கள்.

இந்த பூண்டு சட்னி செய்வதற்கு 4 பொருட்கள் இருந்தாலே போதுமானது. மேலும் இது செய்வதற்கு மிகவும் சுலபமாகவும் இருக்கும். வேலைக்கு செல்பவர்கள் டக்கென்று செய்யக்கூடியவாறு ஈஸியாக இருக்கும். குழந்தைகள் முதல் பெரியவர்கள் வரை கேட்டு விரும்பி சாப்பிடக்கூடியவாறும் இருக்கும்.

உங்களுக்கு தஞ்சாவூர் ஸ்பெஷல் பூண்டு சட்னியை எப்படி செய்வதென்று தெரிந்து கொள்ள வேண்டுமா? கீழே தஞ்சாவூர் ஸ்பெஷல் பூண்டு சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 3 டீஸ்பூன்
* வரமிளகாய் - 15
* முழு பூண்டு - 2
* தக்காளி - 3
* கல்உப்பு - 1 டீஸ்பூன்
* நல்லெண்ணெய் - 2 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - சிறிது

செய்முறை:

* முதலில் ஒரு வாணலியை அடுப்பில் வைத்து, அதில் 3 டீஸ்பூன் எண்ணெய் ஊற்றி சூடானதும், அதில் வரமிளகாய் சேர்த்து மிதமான தீயில் வைத்து நிறம் மாறும் வரை வதக்க வேண்டும்.
* பின் அதில் பூண்டு பற்களை சேர்த்து நன்கு வதக்க வேண்டும்.
* பின்பு அதில் தக்காளியை சேர்த்து, அத்துடன் கல் உப்பையும் சேர்த்து, தக்காளி மென்மையாகும் வரை வதக்க வேண்டும்.
* தக்காளி நன்கு வதங்கியதும், அடுப்பை அணைத்துவிட்டு, வதக்கிய பொருட்களை நன்கு குளிர வைக்க வேண்டும்.
* பிறகு மிக்சர் ஜாரில் வதக்கிய பொருட்களை சேர்த்து, ஓரளவு கொரகொரவென்று அரைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் 2 டேபிள் ஸ்பூன் நல்லெண்ணெய் ஊற்றி சூடானதும், கடுகு, உளுத்தம் பருப்பு மற்றும் கறிவேப்பிலை சேர்த்து தாளிக்க வேண்டும்.
* பின் அரைத்த சட்னியை அதில் சேர்த்து 1 நிமிடம் நன்கு கிளறி இறக்கினால், சுவையான தஞ்சாவூர் ஸ்பெஷல் பூண்டு சட்னி தயார்.

Image Courtesy: SIMPLY SAMAYAL