நூக்கலை இப்படி பொரியல் செய்யுங்க.. பிடிக்காதவங்களும் விரும்பி சாப்பிடுவாங்க.. சத்தானதும் கூட..

Nookal Poriyal Recipe In Tamil: நிறைய பேர் மார்கெட்டில் நூக்கல் காயை பார்த்திருப்பார்கள். ஆனால் அதை வாங்கமாட்டார்கள். ஏனெனில் அந்த காயை எப்படி சமைப்பது என்று தெரியாது. சிலர் நூக்கல் காயைக் கொண்டு வெறும் சாம்பார் மட்டும் தான் செய்வார்கள்.

ஆனால் நூக்கலைக் கொண்டு பொரியலும் செய்யலாம். இந்த காய் சர்க்கரை நோயாளிகளுக்கு மிகவும் நல்லது. இந்த காயில் நீர்ச்சத்து மட்டுமின்றி, கால்சியம் சத்தும் அதிகமாக உள்ளன. வாரம் ஒருமுறை உட்கொண்டு வந்தால், மிகவும் நல்லது.

உங்களுக்கு நூக்கல் பொரியலை எப்படி செய்வதென்று தெரந்து கொள்ள வேண்டுமா? கீழே நூக்கல் பொரியல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* நூக்கல் - 300 கிராம்
* மஞ்சள் தூள் - 1/4 டீஸ்பூன்
* உப்பு - சிறிது
* தண்ணீர் - தேவையான அளவு

அரைப்பதற்கு...

* பச்சை மிளகாய் - 2
* கறிவேப்பிலை - 1 கொத்து
* சீரகம் - 1/2 டீஸ்பூன்
* துருவிய தேங்காய் - 2 டேபிள் ஸ்பூன்

தாளிப்பதற்கு...

* எண்ணெய் - 1 1/2 டேபிள் ஸ்பூன்
* கடுகு - 1 டீஸ்பூன்
* உளுத்தம் பருப்பு - 1 டேபிள் ஸ்பூன்
* கடலைப் பருப்பு - 1 டேபிள் ஸ்பூன்
* வெங்காயம் - 1 (பொடியாக நறுக்கியது)
* கறிவேப்பிலை - 1 கொத்து
* வரமிளகாய் - 2
* உப்பு - சுவைக்கேற்ப

செய்முறை:

* முதலில் நூக்கல்லின் தோலை நீக்கிவிட்டு, அதை சிறிய சதுரத் துண்டுகளாக வெட்டிக் கொள்ள வேண்டும்.
* பின்பு அதை ஒரு பாத்திரத்தில் போட்டு, அத்துடன் மஞ்சள் தூள் மற்றும் உப்பு சேர்த்து நன்கு கிளறி, காய் மூழ்கும் அளவில் நீரை ஊற்றி கிளறி, அடுப்பில் வைத்து, 10 நிமிடம் வேக வைக்க வேண்டும்.
* காய் வெந்ததும், அடுப்பை அணைத்துவிட வேண்டும்.
* பிறகு மிக்சர் ஜாரில் பச்சை மிளகாய், கறிவேப்பிலை, சீரகம், துருவிய தேங்காய் நன்கு அரைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு, கடலைப் பருப்பு சேர்த்து தாளிக்க வேண்டும்.
* பின் அதில் பொடியாக நறுக்கிய வெங்காயத்தை சேர்த்து, சிறிது உப்பு தூவி கண்ணாடி பதத்திற்கு வதக்க வேண்டும்.
* பின்பு அதில் கறிவேப்பிலை, வரமிளகாய் சேர்த்து வதக்கி, அரைத்து வைத்துள்ள தேங்காய் விழுதை சேர்த்து பச்சை வாசனை போக 2 நிமிடம் வதக்க வேண்டும்.
* இறுதியாக வேக வைத்துள்ள நூக்கல்லை சேர்த்து 3-4 நிமிடம் நன்கு கிளறி விட்டு இறக்கினால், சத்தான நூக்கல் பொரியல் தயார்.