சுகர், எடை குறைப்புக்கு உதவும் GLP-1 மருந்துகளால் பார்வை பறிபோகுமா? மருத்துவ ஆய்வுகள் கூறும் பகீர் உண்மைகள்!

GLP-1 Drugs And Eye Problems: சமீப காலமாக சர்க்கரை நோயைக் கட்டுப்படுத்தவும், உடல் எடையை மளமளவெனக் குறைக்கவும் 'ஜிஎல்பி-1' (GLP-1) ரக மருந்துகள் உலகெங்கும் படுவேகமாகப் பிரபலமாகி வருகின்றன. மருந்துகள் பிரபலமான வேகத்திலேயே, "இந்த மாத்திரைகளால் கண்ணுக்கு ஏதும் ஆபத்து வருமா டாக்டர்?" என்ற திகில் கிளப்பும் கேள்விகளும் எழத் தொடங்கிவிட்டன!

மருத்துவர்களிடம் நோயாளிகள் கேட்கும் வகையில் இருக்கும் இந்த பயம் நியாயமானது தான் என்றாலும், வாட்ஸ்அப் வதந்திகளை நம்பி உடனே ஒரு முடிவுக்கு வந்துவிடக் கூடாது! மருத்துவ ஆய்வுகள் சொல்வது என்ன என்பதை நிதானமாகப் பார்க்க வேண்டும். மருத்துவ ஆய்வுகளின் தரவுகளைக் கவனமாகப் பகுப்பாய்வு செய்ய வேண்டும். இந்த மருந்துகள் நம் கண் பார்வையோடு எப்படி தொடர்புடன் இருக்கின்றன என்பது குறித்து உலகெங்கிலும் உள்ள மருத்துவ வல்லுநர்கள் இன்னமும் தீவிரமாக ஆராய்ந்து தான் வருகிறார்கள்!

தற்போது மருத்துவ உலகில் ஹாட் டாபிக்கான இதுக்குறித்து சென்னையில் உள்ள மேக்ஸிவிஷன் சூப்பர் ஸ்பெஷாலிட்டி கண் மருத்துவமனையின் விழித்திரை அறுவை சிகிச்சை நிபுணரான டாக்டர். சுப்ரியா டபீர் அவர்கள் தமிழ் போல்ட்ஸ்கைக்கு தந்த விரிவான விளக்கம் இதோ!

திடீரென குறையும் சுகர் விழித்திரைக்கு ஆபத்தா?

"பொதுவாக சர்க்கரை நோயுள்ளவர்களுக்குத் தங்களின் இரத்தத்தில் சர்க்கரை அளவு ஏறினாலும் இறங்கினாலும் அது கண்களைத் தான் முதலில் பதம் பார்க்கும் என்பது நன்றாகவே தெரியும். இரத்தத்தில் சுகர் அளவு பல காலம் அதிகமாகவே நீடிக்கும் போது, கண்ணுக்குப் பின்புறம் உள்ள விழித்திரையின் (Retina) உட்பகுதியில் உள்ள நுண்ணிய நரம்புகள் பலவீனமடைந்து 'டயாபடிக் ரெட்டினோபதி' (Diabetic Retinopathy) என்ற பார்வை குறைபாட்டை உருவாக்குகிறது.

ஆனால் இங்கே தான் ஒரு பெரிய திருப்பம் இருக்கிறது! GLP-1 ரக மருந்துகளில் இருக்கும் கெமிக்கல்கள் கண்களுக்கு நச்சுத்தன்மை வாய்ந்தவை. நேரடியாகக் கண்ணைக் கெடுத்துவிடும் என்பது டாக்டர்களின் பயம் கிடையாது. அப்புறம் என்ன தான் பிரச்சனை? இரத்தத்தில் எகிறிக் கிடந்த சர்க்கரையின் அளவு, இந்த மருந்துகளால் 'சடாரென' அதலபாதாளத்திற்குப் பாயும் போது தான் சிக்கலே ஆரம்பிக்கிறது. குறிப்பாக, ஏற்கனவே தீவிர விழித்திரை பாதிப்பு (Advanced retinopathy) உள்ள நோயாளிகளுக்கு, சுகர் அளவு மின்னல் வேகத்தில் குறையும் போது, கண்ணில் உள்ள கோளாறுகள் திடீரெனத் தற்காலிகமாக எகிறிவிடுவதை மருத்துவர்கள் கண்டுபிடித்துள்ளனர்.

சர்க்கரை அளவைக் கட்டுக்குள் கொண்டு வருவது மிக மிக அவசியம் தான்; ஆனால் அதை அவசர அவசரமாக, ஜெட் வேகத்தில் குறைக்க நினைத்தால், அதுவே எதிர்பாராத பல பக்கவிளைவுகளை உண்டாக்கிவிடும்" என்று டாக்டர். சுப்ரியா கூறினார்.

பார்வை நரம்பைத் தாக்கும் அரிதான 'நையான்' நோய்க்கு மருந்து தான் காரணமா?

விழித்திரையைத் தாண்டி, இப்போது மருத்துவ விஞ்ஞானிகளின் பார்வை கண்களிலிருந்து பார்வை சமிக்ஞைகளை மூளைக்கு எடுத்துச் செல்லும் முக்கிய நரம்பான 'பார்வை நரம்பின்' (Optic Nerve) மீது விழுந்துள்ளது. கண்களில் படும் காட்சிகளை அப்படியே மூளைக்கு சிக்னலாக அனுப்பும் மெயின் கேபிள் போன்றது தான் இந்த பார்வை நரம்பு. சமீபத்திய சில வெளிநாட்டு ஆய்வுகளில், GLP-1 ரக மருந்துகளுக்கும், 'நையான்' (NAION) என்று அழைக்கப்படும் மிக அரிதான கண் நரம்புக் கோளாறுக்கும் ஏதோ ஒரு தொடர்பு இருப்பதாக சந்தேகம் எழுந்துள்ளது.

அது என்ன 'நையான்'? கண் நரம்புகளுக்குச் செல்லும் இரத்த ஓட்டம் திடீரென லேசாகத் தடைபடும் போது இந்த பாதிப்பு உருவாகிறது. இதன் விளைவாக, எந்தவித வலியும் இருக்காது; ஆனால் சடாரென ஒரு கண்ணில் மட்டும் பார்வை மங்கலாகிவிடும் அல்லது பார்வை முழுமையாகவே மங்கிப் போய்விடும்.

ஆனால், ஆய்வுகளில் சில புள்ளிவிவரங்கள் இப்படி வந்திருப்பதால் மட்டுமே, "இந்த மருந்து சாப்பிட்டதால் தான் பார்வை போச்சு!" என்று கண்மூடித்தனமாக முடிவுகட்டி விட முடியாது. இதுவரை வந்துள்ள மருத்துவ முடிவுகள் ஒன்றோடொன்று முரண்பட்டே இருக்கின்றன. எனவே, தெளிவான மற்றும் உறுதியான ஆதாரங்கள் கிடைக்கும் வரை அவசரப்பட்டு எந்த முடிவையும் எடுக்கக் கூடாது என்று எச்சரிக்கிறார் டாக்டர். சுப்ரியா.

சுகர், பிரஷர், உடல் பருமன்: கண்களுக்கு பிரச்சினை ஏற்படுத்தும் முப்பெரும் வில்லன்கள்!

"கண் பார்வை மங்கும்போது, "எல்லாம் அந்தப் புது மருந்து பண்ண வேலைதான்!" என்று அவசரப்பட்டு மருந்தை மட்டும் குறை சொல்லிவிட முடியாது. இங்கே நாம் கவனிக்க வேண்டிய மிகப் பெரிய பின்னணி ஒன்று இருக்கிறது. GLP-1 மருந்துகளைப் பயன்படுத்தும் பெரும்பான்மையான நபர்கள், ஏற்கனவே டைப்-2 நீரிழிவு நோய் , உயர் இரத்த அழுத்தம் அல்லது உடல் பருமன் போன்ற பல சிக்கல்களோடு போராடிக் கொண்டிருப்பவர்கள் தான்.

இந்த மூன்று பிரச்சனைகளுமே தனித்தனியாகவே நம் உடம்பில் உள்ள இரத்தக் குழாய்களை, முக்கியமாகக் கண்களில் உள்ள நுண்ணிய நரம்புகளைப் பதம் பார்க்கும் குணம் கொண்டவை! அப்படியிருக்கும் போது, புதிதாக ஒரு மாத்திரையைத் தொடங்கும் போது பார்வையில் ஏதேனும் கோளாறு தெரிந்தால், எடுத்த எடுப்பிலேயே அந்த மருந்தை மட்டும் குறை சொல்லிவிடக்கூடாது.

நிஜமாகவே அங்கே என்ன நடக்கிறது என்பதைத் துல்லியமாகக் கண்டுபிடிக்க, மருத்துவரின் முறையான விரிவான கண் பரிசோதனையும், நோயாளியின் ஒட்டுமொத்த உடல்நல வரலாற்றைத் தீர விசாரிப்பதும் மிக மிக அவசியம்" என்று டாக்டர் கூறினார்.

எந்த அறிகுறிகள் தெரிந்தால் மருத்துவரை பார்க்க வேண்டும்?

"தற்போது வெளிவந்துள்ள ஆரம்பக்கட்ட ஆய்வு அறிக்கைகளின் அடிப்படையில் சில சந்தேகங்கள் கிளம்பியிருப்பதால் மட்டுமே, மருத்துவர் பரிந்துரைத்த GLP-1 மருந்துகளைப் பயந்துபோய் உடனே தூக்கி எறிந்துவிடத் தேவையில்லை. ஆனால் அதே நேரம், கண் பார்வையில் திடீரென ஏதேனும் மாற்றம் தெரிந்தால் கவனக்குறைவாக இருந்துவிடவும் கூடாது. அதுவும் பின்வரும் அறிகுறிகள் தென்பட்டால் உடனே கண் டாக்டரிடம் உடனடியாக ஆலோசனை பெறுங்கள்.

• பார்வையில் திடீரென ஏற்படும் அதீத மங்கல் அல்லது பார்வைக்குறைவு
• பார்க்கும் காட்சிகளில் புதிதாகத் தோன்றும் கரும்புள்ளிகள் அல்லது மங்கலான வட்டங்கள்.
• குறிப்பாக, ஒரேயொரு கண்ணில் மட்டும் ஏதேனும் விசித்திரமான பார்வை வித்தியாசம் தெரிவது

சர்க்கரை வியாதியால் பாதிக்கப்பட்டவர்களும், ஏற்கனவே கண் நரம்பு கோளாறுகளுக்குச் சிகிச்சை எடுப்பவர்களும் இந்த விஷயத்தில் கூடுதல் உஷாராக இருக்க வேண்டும். எல்லாவற்றிற்கும் மேலாக, "எனக்குக் கண்ணெல்லாம் நல்லாத்தான் தெரியுது" என்று அசட்டையாக இருக்காமல், குறிப்பிட்ட இடைவெளியில் முழு கண் பரிசோதனை செய்துகொள்வது மிக மிக முக்கியம்.

ஏனென்றால், கண்களைப் பதம் பார்க்கும் பல ஆபத்தான நோய்கள், நம் அன்றாடப் பார்வையைப் பறிக்கும் நிலைக்கு வரும்வரை எந்தவித வலியோ, சத்தமோ இல்லாமல் அமைதியாகத் தான் கண்ணுக்குள் குடியேறும். மேலும், வழக்கமான முறையான கண் பரிசோதனைகள் எப்போதுமே நம்மைப் பாதுகாப்பாக வைத்துகொள்ள உதவக்கூடியவை என்பதை மறந்துவிடாதீர்கள்" என்று டாக்டர் கூறினார்.

கண் பார்வையைக் காக்க நிபுணர் தரும் இறுதி டிப்ஸ்

"பொதுமக்களின் பயன்பாட்டில் GLP-1 மருந்துகள் இப்போதுதான் சூடுபிடித்துள்ளன என்பதால், அவற்றின் நீண்டகால விளைவுகள் குறித்த மருத்துவ ஆய்வுகளும் தொடர்ந்து வளர்ந்து கொண்டேதான் இருக்கின்றன. இதற்காக இம்மருந்துகளை உட்கொள்பவர்கள் தேவையில்லாமல் பதற்றமடைய வேண்டிய அவசியமே இல்லை! ஆனால், கண் பார்வையில் திடீரென ஏற்படும் மாற்றங்களை மட்டும் சாதாரணமாக விட்டுவிடக் கூடாது!

எப்போதும் உங்கள் மருத்துவருடன் ஆலோசனை பெறுங்கள். குறித்த நேரத்தில் முறையான கண் பரிசோதனைகளைத் தவறாமல் செய்யுங்கள். பார்வையில் ஏதேனும் சின்னக் கோளாறு தெரிந்தாலும் தயங்காமல் டாக்டரிடம் உடனே சொல்லிவிடுங்கள். புதிய மருந்துகளைச் சாப்பிடுபவராக இருந்தாலும் சரி, வழக்கமான சர்க்கரை நோயாளியாக இருந்தாலும் சரி... கண் பாதிப்புகளை முளையிலேயே கிள்ளி எறிய ஆரம்பக்கட்டப் பரிசோதனையே உங்களின் சிறந்த ஆயுதம்" என்று விழித்திரை அறுவை சிகிச்சை நிபுணரான டாக்டர். சுப்ரியா டபீர் கூறினார்.