சன்டே ஸ்பெஷல் - புதினா சிக்கன் மசாலா

உங்கள் வீட்டில் சிக்கன் வாங்கியுள்ளீர்களா? இன்று வித்தியாசமான சிக்கன் ரெசிபியை செய்ய விரும்புகிறீர்களா? அப்படியானால் புதினா சிக்கன் மசாலாவை செய்யுங்கள். இந்த புதினா சிக்கன் மசாலா சாதம், சப்பாத்தி போன்றவற்றுடன் சேர்த்து சாப்பிட அற்புதமாக இருக்கும். முக்கியமாக இந்த சிக்கன் மசாலா செய்வது மிகவும் சுலபம். மேலும் இது பெரியவர்கள் முதல் குழந்தைகள் வரை அனைவருமே விரும்பி சாப்பிடும் வகையில் ருசியாக இருக்கும். பேச்சுலர்களும் இந்த ரெசிபியை முயற்சிக்கலாம்.

உங்களுக்கு புதினா சிக்கன் மசாலா எப்படி செய்வதென்று தெரிந்து கொள்ள வேண்டுமா? கீழே புதினா சிக்கன் மசாலா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* சிக்கன் - 1/2 கிலோ

* வெங்காயம் - 1 (பொடியாக நறுக்கியது)

* தக்காளி - 1 (பொடியாக நறுக்கியது)

* இஞ்சி பூண்டு பேஸ்ட் - 1 டீஸ்பூன்

* மஞ்சள் தூள் - 1/2 டீஸ்பூன்

* மிளகாய் தூள் - 3/4 டீஸ்பூன்

* மிளகுத் தூள் - 1/2 டீஸ்பூன்

* உப்பு - சுவைக்கேற்ப

அரைப்பதற்கு...

* புதினா இலைகள் - 1 கையளவு

* பச்சை மிளகாய் - 2

தாளிப்பதற்கு...

* பட்டை - 1 துண்டு

* கிராம்பு - 3

* பிரியாணி இலை - 1

செய்முறை:

* முதலில் சிக்கனை நன்கு கழுவிக் கொள்ள வேண்டும்.

* பின் மிக்சர் ஜாரில் புதினா மற்றும் பச்சை மிளகாயை சேர்த்து சிறிது நீரை ஊற்றி நன்கு அரைத்து தனியாக வைத்துக் கொள்ள வேண்டும்.

* பின்பு ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், பட்டை, கிராம்பு, பிரியாணி இலை சேர்த்து தாளிக்க வேண்டும்.

* பிறகு அதில் வெங்காயத்தை சேர்த்து நிறம் மாற வதக்க வேண்டும்.

* பின் அதில் இஞ்சி பூண்டு பேஸ்ட் சேர்த்து பச்சை வாசனை போக வதக்கி, அதன் பின் தக்காளியை சேர்த்து, சிறிது உப்பு தூவி வதக்க வேண்டும்.

* பின்னர் அதில் மஞ்சள் தூள், மிளகாய் தூள் சேர்த்து நன்கு வதக்க வேண்டும்.

* அடுத்து அதில் கழுவிய சிக்கனை சேர்த்து கிளறி, 1/2 கப் நீரை ஊற்றி, சுவைக்கேற்ப உப்பு சேர்த்து கிளறி, மூடி வைத்து சிக்கனை வேக வைக்க வேண்டும்.

* சிக்கன் பாதியாக வெந்ததும், அதில் அரைத்து வைத்துள்ள புதினா பேஸ்ட்டை சேர்த்து கிளறி, சிக்கனை நன்கு வேக வைக்க வேண்டும்.

* சிக்கன் நன்கு மென்மையாக வெந்ததும், அதில் மிளகுத் தூளைத் தூவி கிளறி, இறக்கினால், சுவையான புதினா சிக்கன் மசாலா தயார்.

Image Courtesy: poornimacookbook