காலையில் மொறுமொறுன்னு சிறுதானிய ரவா தோசையை செய்யுங்க.. சுவையானதும்.. சத்தானதும் கூட...

Millet Rava Dosa Recipe In Tamil: காலையில் எப்போதும் ஒரே மாதிரி தோசையை செய்து போரடித்துவிட்டதா? உங்கள் வீட்டில் உள்ளோரின் ஆரோக்கியம் சிறப்பாக இருக்க வேண்டுமா? அப்படியானால் அடிக்கடி உணவில் சிறுதானியங்களை சேர்த்து வாருங்கள்.

சிறுதானியங்களை கஞ்சியாக செய்து கொடுத்தால், சாப்பிட பலரும் யோசிப்பார்கள். ஆனால் அதுவே தோசையாக சுட்டுக் கொடுத்தால், அதுவும் ரவா தோசையாக செய்து கொடுத்தால் வேண்டாம் என்று கூறாமல், கேட்டு விரும்பி சாப்பிடுவார்கள். சிறுதானிய ரவா தோசை செய்வது மிகவும் சுலபம். இதற்கு தேங்காய் சட்னி அட்டகாசமான காம்பினேஷனாக இருக்கும்.

உங்களுக்கு சிறுதானிய ரவா தோசையை எப்படி செய்வதென்று தெரிந்து கொள்ள வேண்டுமா? உங்களுக்கு சிறுதானிய ரவா தோசை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்த எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வெங்காயம் - 1 (பொடியாக நறுக்கியது)
* பச்சை மிளகாய் - 1 (நறுக்கியது)
* துருவிய இஞ்சி - 1 டீஸ்பூன்
* கறிவேப்பிலை - சிறிது (பொடியாக நறுக்கியது)
* கொத்தமல்லி - சிறிது (பொடியாக நறுக்கியது)
* சீரகம் - 1/2 டீஸ்பூன்
* மிளகு - 1/2 டீஸ்பூன்
* முந்திரி - 10
* ரவா - 200 கிராம்
* சிறுதானிய மாவு - 150 கிராம்
* உப்பு - சுவைக்கேற்ப
* தண்ணீர் - தேவையான அளவு

செய்முறை:

* முதலில் ஒரு பாத்திரத்தில் பொடியாக நறுக்கிய வெங்காயம், பச்சை மிளகாய், கறிவேப்பிலை, கொத்தமல்லி மற்றும் துருவிய இஞ்சியை சேர்க்க வேண்டும்.
* பின்னர் மிளகு, சீரகத்தை ஒன்றிரண்டாக தட்டிப் போட்டுக் கொள்ள வேண்டும்.
* பின்பு அதில் முந்திரியை உடைத்துப் போட வேண்டும்.
* அடுத்து 1 கப் அல்லது 200 கிராம் ரவையை சேர்த்துக் கொள்ள வேண்டும்.
* பிறகு அதில் சிறுதானிய மாவு சேர்த்து, சுவைக்கேற்ப உப்பு தூவி, கைகளால் நன்கு கிளறி விட வேண்டும்.
* பின் அதில் கொஞ்சம் கொஞ்சமாக நீரை ஊற்றி தோசை மாவை பதத்திற்கு நன்கு கட்டிகளின்றி கலந்து கொள்ள வேண்டும்.
* பின் அதை மூடி வைத்து 15 நிமிடம் ஊற வைக்க வேண்டும்.
* 15 நிமிடம் கழித்து, மாவை கிளறும் போது மாவு சற்று கெட்டியாகியிருக்கும். இந்நிலையில் ரவா தோசை மாவின் பதத்திற்கு நீரை ஊற்றி நன்கு கிளறி விட வேண்டும்.
* இறுதியாக ஒரு தோசைக் கல்லை அடுப்பில் வைத்து, கல் சூடானதும், தீயைக் குறைத்து, மாவை அள்ளி ஊற்றி, மேலே எண்ணெய் ஊற்றி, முன்னும் பின்னும் மொறுமொறுவென்று வேக வைத்து எடுத்தால், சுவையான சிறுதானிய ரவா தோசை தயார்.

Image Courtesy: SIMPLY SAMAYAL