இட்லிக்கு 10 நிமிடத்தில் சட்னி செய்யணுமா? அப்ப மதுரை கார சட்னியை செய்யுங்க.. 2 இட்லி எக்ஸ்ட்ரா சாப்பிடுவாங்க..

Madurai Style Kara Chutney Recipe In Tamil: காலையில் இட்லிக்கு என்ன சட்னி செய்வதென்று யோசித்துக் கொண்டிருக்கிறீர்களா? 10 நிமிடத்தில் ஒரு சட்னி செய்ய வேண்டுமா? அப்படியானால் மதுரை ஸ்டைல் கார சட்னியை செய்யுங்கள்.

இந்த சட்னி செய்வதற்கு மிகவும் சுலபமாக இருப்பதோடு, குழந்தைகள் முதல் பெரியவர்கள் வரை அனைவரும் விரும்பி சாப்பிடக்கூடியவாறு இருக்கும். மேலும் இந்த சட்னியை செய்தால் வழக்கமாக சாப்பிடுவதை விட 2 இட்லியை எக்ஸ்ட்ரா சாப்பிடுவார்கள். குறிப்பாக இது அவசர காலத்தில் செய்ய ஏற்ற சட்னியும் கூட.

உங்களுக்கு மதுரை ஸ்டைல் கார சட்னியை எப்படி செய்வதென்று தெரிந்து கொள்ள வேண்டுமா? கீழே மதுரை ஸ்டைல் கார சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* சின்ன வெங்காயம் - 100 கிராம்
* தக்காளி - 3
* பூண்டு - 8 பல்
* வரமிளகாய் - 4
* காஷ்மீரி மிளகாய் - 3
* புளி - சிறிய துண்டு
* உப்பு - சுவைக்கேற்ப
* வெல்லம் - 2 சிறிய துண்டு

தாளிப்பதற்கு...

* நல்லெண்ணெய் - 2 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - 1 கொத்து
* பெருங்காயத் தூள் - 1 சிட்டிகை

செய்முறை:

* முதலில் மிக்சர் ஜாரில் சின்ன வெங்காயம், தக்காளி, பூண்டு, வரமிளகாய், காஷ்மீரி மிளகாய், புளி, வெல்லம் மற்றும் சிறிது உப்பு சேர்த்து ஒருமுறை அரைத்துக் கொள்ள வேண்டும்.
* பின் அதில் சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் நல்லெண்ணெய் ஊற்றி சூடேற்ற வேண்டும்.
* பிறகு அதில் கடுகு, உளுத்தம் பருப்பு, கறிவேப்பிலை, பெருங்காயத் தூள் சேர்த்து தாளிக்க வேண்டும்.
* பின்னர் அரைத்த சட்னியை சேர்த்து கிளறி, மூடி வைத்து, 5 நிமிடம் நன்கு பச்சை வாசனை போக வேக வைத்து இறக்கினால், சுவையான மதுரை ஸ்டைல் கார சட்னி தயார்.