கிருஷ்ண ஜெயந்தி ஸ்பெஷல் அவல் லட்டு - 10 நிமிடத்தில் எப்படி செய்யணும்-ன்னு தெரியுமா?

Krishna Jayanthi Special Aval Laddu Recipe In Tamil: கிருஷ்ண ஜெயந்தி வரப்போகிறது. அனைவரும் வீட்டில் கிருஷ்ணருக்கு இந்த வருடம் என்ன இனிப்புக்களை செய்து படைத்து வழிபடுவது என்று யோசிக்கத் தொடங்கியிருப்போம். கிருஷ்ணருக்கு பால் பொருட்களால் ஆன பலக்காரங்கள் என்றாலும் ரொம்ப பிடிக்கும்.

எனவே வெண்ணெய், நெய், பால் போன்றவற்றைக் கொண்டு பலகாரங்களை செய்து கிருஷ்ணருக்கு படைத்து வழிபடுவது நல்லது. முக்கியமாக கிருஷ்ணருக்கு லட்டு என்றால் ரொம்ப பிடிக்கும். எனவே லட்டு செய்து கிருஷ்ணருக்கு படைக்கலாம். லட்டுவில் பல வகைகள் உள்ளன. அதில் ஒன்று தான் அவல் லட்டு. இந்த அவல் லட்டு 10 நிமிடத்தில் செய்யக்கூடியவாறு மிகவும் ஈஸியாக இருக்கும்.

உங்களுக்கு கிருஷ்ண ஜெயந்தி ஸ்பெஷலாக அவல் லட்டுவை எப்படி செய்வதென்று தெரிந்து கொள்ள வேண்டுமா? கீழே அவல் லட்டு ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* அவல் - 2 கப்
* பொட்டுக்கடலை - 3/4 கப்
* நெய் - 2 டீஸ்பூன் + 1/2 கப்
* முந்திரி - தேவையான அளவு
* சர்க்கரை - 1 1/2 கப்

செய்முறை:

* முதலில் ஒரு வாணலியை அடுப்பில் வைத்து, அதில் 2 கப் அவலை சேர்த்து நன்கு வறுத்து இறக்கி ஒரு தட்டில் போட்டு குளிர வைக்க வேண்டும்.
* பின்னர் அதே வாணலியில் பொட்டுக்கடலையை சேர்த்து அதை சிறிது நேரம் வறுத்து , அதையும் ஒரு தட்டில் போட்டு குளிர வைக்க வேண்டும்.
* பின்பு ஒரு வாணலியை அடுப்பில் வைத்து, அதில் 2 ஸ்பூன் நெய் ஊற்றி சூடானதும், முந்திரியை சேர்த்து, பொன்னிறமாக ப்ரை செய்து, அதை ஒரு தட்டில் எடுத்து வைத்துக் கொள்ள வேண்டும்.
* பிறகு மிக்சர் ஜாரில் வறுத்த அவலை சேர்த்து, முதலில் நன்கு பொடித்துக் கொள்ள வேண்டும்.
* பின் அதில் பொட்டுக்கடலை மற்றும் 1 1/2 கப் சர்க்கரை சேர்த்து நன்கு அரைத்துக் கொள்ள வேண்டும்.
* அடுத்து ஒரு அகலமான பாத்திரத்தில் அரைத்த அவல் பொட்டுக்கடலையை எடுத்துக் கொள்ள வேண்டும்.
* பின்பு 1/2 கப் நெய்யை லேசாக சூடேற்றி, பின் அதை அவலுடன் சேர்த்து கரண்டியால் கிளறி விட வேண்டும்.
* கைபொறுக்கும் சூட்டிற்கு வந்ததும், கைகளால் நன்கு கிளறி விட வேண்டும்.
* பின் ப்ரை செய்து வைத்துள்ள முந்திரியை சேர்த்து கிளறி விட வேண்டும்.
* அடுத்து அந்த கலவையை கொஞ்சம் கொஞ்சமாக எடுத்து லட்டு போன்று உருட்டிக் கொண்டால், சுவையான அவல் லட்டு தயார்.