1 கைப்பிடி கொண்டைக்கடலை வெச்சு.. இப்படி சட்னி செய்யுங்க.. ருசியானதும்.. சத்தானதும் கூட...

Kondakadalai Chutney Recipe In Tamil: உங்கள் வீட்டில் தினமும் இட்லி, தோசை செய்வீர்களா? அந்த இட்லி, தோசைக்கு பெரும்பாலும் ஒரே மாதிரியான சைடு டிஷ் தான் செய்வீர்களா? குறிப்பாக சட்னியை அதிகம் செய்வீர்களா? அப்படியானால் ஒருமுறை சற்று வித்தியாசமாக கொண்டைக்கடலை வைத்து சட்னி செய்யுங்கள்.

இந்த சட்னி வித்தியாசமான சுவையுடன் இருப்பதோடு, புரோட்டீன் அதிகம் நிறைந்தது. கொண்டைக்கடலை சாப்பிட மறுக்கும் குழந்தைகளுக்கு இப்படி சட்னி செய்து கொடுக்கும் போது, விரும்பி சாப்பிடுவார்கள். இந்த சட்னி, இட்லி, தோசைக்கு அட்டகாசமாக இருக்கும்.

உங்களுக்கு கொண்டைக்கடலை சட்னியை எப்படி செய்வதென்று தெரிந்து கொள்ள வேண்டுமா? கீழே கொண்டைக்கடலை சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* கொண்டைக்கடலை - 1 கைப்பிடி
* எண்ணெய் - 2 டேபிள் ஸ்பூன்
* கடலைப் பருப்பு - 2 டீஸ்பூன்
* உளுத்தம் பருப்பு - 2 டீஸ்பூன்
* வரமிளகாய் - 3
* பச்சை மிளகாய் - 3
* பூண்டு - 3 பல்
* இஞ்சி - 1 இன்ச்
* சின்ன வெங்காயம் - 10
* வறுத்த வேர்க்கடலை - 2 கைப்பிடி
* கறிவேப்பிலை - சிறிது
* புதினா - சிறிது
* கொத்தமல்லி - சிறிது
* புளி - 1 எலுமிச்சை அளவு
* துருவிய தேங்காய் - 1/4 கப்
* உப்பு - சுவைக்கேற்ப
* தண்ணீர் - தேவையான அளவு

தாளிப்பதற்கு...

* எண்ணெய் - 2 டீஸ்பூன்
* கடுகு - 1/4 டீஸ்பூன்
* உளுத்தம் பருப்பு - 1/2 டீஸ்பூன்
* சீரகம் - 1/4 டீஸ்பூன்
* கறிவேப்பிலை - 1 கொத்து
* வரமிளகாய் - 1

செய்முறை:

* முதலில் 1 கைப்பிடி கொண்டைக்கடலையை இரவு தூங்கும் முன் நீரில் ஊற வைத்துக் கொள்ள வேண்டும்.
* பின் மறுநாள் காலையில் ஊற வைத்த கொண்டைக்கடலையை குக்கரில் போட்டு, நீரை ஊற்றி அடுப்பில் வைத்து, குக்கரை மூடி 4 விசில் விட்டு இறக்க வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடலைப் பருப்பு, உளுத்தம் பருப்பு, வரமிளகாய், பச்சை மிளகாய் சேர்த்து வதக்க வேண்டும்.
* பின்பு அதில் பூண்டு, இஞ்சி, சின்ன வெங்காயம் ஆகியவற்றை சேர்த்து நன்கு வதக்க வேண்டும்.
* அதன் பின் அதில் வறுத்த வேர்க்கடலை சேர்த்து சிறிது நேரம் வறுக்க வேண்டும்.
* பிறகு கறிவேப்பிலை, புதினா, கொத்தமல்லி சேர்த்து சிறிது நேரம் வதக்க வேண்டும்.
* பின் அதில் புளியை சேர்த்து நன்கு வதக்கி இறக்கி குளிர வைக்க வேண்டும்.ர
* பின்னர் மிக்சர் ஜாரில் வதக்கிய பொருட்களை சேர்த்து, அத்துடன் துருவிய தேங்காய், சுவைக்கேற்ப உப்பு, வேக வைத்த கொண்டைக்கடலையை நீருடன் சேர்த்து, சுவைக்கேற்ப உப்பு சேர்த்து நன்கு மென்மையாக அரைத்துக் கொள்ள வேண்டும்.
* பின் அரைத்த சட்னியை ஒரு கிண்ணத்தில் எடுத்து, தேவையான அளவு நீரை ஊற்றி கலந்து கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, சீரகம், கறிவேப்பிலை, வரமிளகாய் சேர்த்து தாளித்து சட்னியுடன் சேர்த்து கிளறினால், சுவையான கொண்டைக்கடலை சட்னி தயார்.