கத்திரிக்காயை இந்த மாதிரி ஒருமுறை பொரியல் செய்யுங்க.. பிடிக்காதவங்களும் கேட்டு விரும்பி சாப்பிடுவாங்க...

Kathirikai Poriyal Recipe In Tamil: உங்கள் வீட்டில் கத்திரிக்காய் நிறைய உள்ளதா? எப்போதும் கத்திரிக்காயைக் கொண்டு சாம்பார் அல்லது பொரியல் தான் செய்வீர்களா? அதுவும் பொரியல் செய்தால், அதை ஒரே மாதிரி தான் எப்போதும் செய்வீர்களா? அப்படியே கத்திரிக்காயை சமைத்தாலும், நீங்கள் மட்டும் தான் சாப்பிடுவீர்களா? உங்கள் வீட்டில் உள்ளோர் யாரும் சாப்பிடமாட்டார்களா?

அப்படியானால் அடுத்தமுறை கத்திரிக்காயைக் கொண்டு புதுமையான முறையில் பொரியல் செய்யுங்கள். இப்படி செய்தால் கத்திரிக்காய் பிடிக்காதவர்களும் விரும்பி சாப்பிடுவார்கள். இந்த கத்திரிக்காய் பொரியலானது சாம்பார் சாதம், ரசம் சாதம், தயிர் சாதம் போன்றவற்றுடன் சாப்பிட அற்புதமாக இருக்கும்.

உங்களுக்கு கத்திரிக்காய் பொரியலை எப்படி செய்வதென்று தெரிந்து கொள்ள வேண்டுமா? கீழே கத்திரிக்காய் பொரியல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 டேபிள் ஸ்பூன்
* கடுகு - 1 டீஸ்பூன்
* சீரகம் - 1 டீஸ்பூன்
* உளுத்தம் பருப்பு - 1 டீஸ்பூன்
* கடலைப் பருப்பு - 1 டீஸ்பூன்
* வெங்காயம் - 1 (பொடியாக நறுக்கியது)
* கறிவேப்பிலை - 1 கொத்து
* கத்திரிக்காய் - 1/4 கிலோ(நீளவாக்கில் நறுக்கியது)
* மஞ்சள் தூள் - 1/2 டீஸ்பூன்
* குழம்பு மிளகாய் தூள் - டீஸ்பூன்
* உப்பு - சுவைக்கேற்ப

அரைப்பதற்கு...

* வறுத்த வேர்க்கடலை - 2 கைப்பிடி
* பூண்டு - 7-8 பல்

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு, சீரகம், கடலைப் பருப்பு சேர்த்து தாளிக்க வேண்டும்.
* கடலைப் பருப்பும், உளுத்தம் பருப்பும் பொன்னிறமானதும், அதில் பொடியாக நறுக்கிய வெங்காயம் மற்றும் கறிவேப்பிலை சேர்த்து, வெங்காயம் கண்ணாடி பதத்திற்கு வரும் வரை வதக்க வேண்டும்.
* பின் அதில் நீளவாக்கில் நறுக்கி வைத்துள்ள கத்திரிக்காயை சேர்த்து நன்கு வதக்க வேண்டும்.
* பிறகு அதில் மஞ்சள் தூள் மற்றும் மிளகாய் தூள் சேர்த்து, சுவைக்கேற்ப உப்பு தூவி கிளறி, ஒரு கையளவு நீரைத் தெளித்து நன்கு கிளறி, மூடி வைத்து 10 நிமிடம் மிதமான தீயில் வைத்து வேக வைக்க வேண்டும். அப்படி வேக வைக்கும் போது அடிப்பிடிக்காமல் இருக்க அவ்வப்போது கிளறி விட வேண்டும்.
* கத்திரிக்காய் வெந்துவிடுவதற்குள், மிக்சர் ஜாரில் வறுத்த வேர்க்கடலை மற்றும் தோலோடு பூண்டு பற்களை சேர்த்து கொரகொரவென்று அரைத்து பொடி செய்து கொள்ள வேண்டும்.
* கத்திரிக்காய் வெந்த பின், மூடியைத் திறந்து, அரைத்து வைத்துள்ள பொடியை சேர்த்து நன்கு 2 நிமிடம் கிளறி விட்டு இறக்கினால், சுவையான கத்திரிக்காய் பொரியல் தயார்.

Image Courtesy: Apoorvaa's Nalabagam