தேங்காய் சட்னி அரைக்கும் போது இந்த ஒரு பொருளை சேர்த்து அரைச்சு பாருங்க... டேஸ்ட் வேற லெவலில் இருக்கும்...!

Hotel Style White Coconut Chutney Recipe in Tamil: பெரும்பாலான வீடுகளில் காலை அல்லது இரவு உணவாக இருப்பது இட்லி, தோசைதான். இட்லி, தோசைக்கு சிறந்த சைடிஷ் என்றால் அது சந்தேகமே இல்லாமல் சட்னிதான். சட்னி என்றதும் அனைவருக்கும் முதலில் நினைவிற்கு வருவது தேங்காய் சட்னிதான்.

தென்னிந்தியா மட்டுமின்றி உலகம் முழுவதுமே இட்லி, தோசைக்கு பெரும்பாலும் செய்யப்படும் எளிதான மற்றும் சுவையான சைடிஷ் என்றால் அது தேங்காய் சட்னிதான். பல நிறங்களில் செய்யக்கூடிய இந்த சட்னி எப்போதுமே நமக்கு ஸ்பெஷல்தான். உங்கள் வீட்டில் இன்று இட்லி, தோசை செய்யப் போகிறீர்களா? பெரும்பாலும் உங்கள் வீட்டில் இதற்கு சைடு டிஷ்ஷாக தேங்காய் சட்னியைத் தான் செய்வீர்களா?

தேங்காய் சட்னி என்றால் அதற்கு எப்போதும் ஒரே செயல்முறைதான். ஆனால் அதில் சில பொருட்களை கூட்டியும், குறைத்தும் செய்வது அதன் சுவையில் பெரிய மாற்றத்தை ஏற்படுத்தும். அந்த வகையில் இன்று நாம் பார்க்கப்போவது வழக்கமான சட்னியிலிருந்து ஒரு பொருளை நீக்கிவிட்டு கூடுதலாக ஒரு பொருளை சேர்த்து செய்யும் வித்தியாசமான தேங்காய் சட்னியைப் பற்றித்தான்.

இந்த சட்னியில் வழக்கமாக சேர்க்கும் பூண்டை நீக்கிவிட்டு அதற்குப் பதிலாக வெங்காயத்தாளை சேர்த்து சட்னி அரைக்கப்போகிறோம். இது தேங்காய் சட்னிக்கு தனித்துவமான சுவையை வழங்கும். இந்த பதிவில் அட்டகாசமான தேங்காய் சட்னியை எப்படி செய்யலாம் என்று தெரிந்து கொள்ளலாம்.

தேவையானப் பொருட்கள்:

- அரை கப் ப்ரெஷாக துருவிய தேங்காய்
- கால் கப் பொட்டுக்கடலை
- 2 பச்சை மிளகாய்
- 2 வர மிளகாய்
- சிறிய துண்டு இஞ்சி
- 2 ஸ்பூன் எண்ணெய்
- கால் ஸ்பூன் கடுகு
- 2 வெங்காயத்தாள்
- கறிவேப்பிலை 1 கொத்து

செய்முறை:

- துருவிய தேங்காய், பொட்டுக்கடலை, பச்சை மிளகாய், இஞ்சி, சிறிது உப்பு ஆகியவற்றை 1/2 தண்ணீர் சேர்த்து மென்மையாகும் வரை நைஸாக அரைக்கவும்.

- ஒரு சிறிய வாணலியில் எண்ணெயை சூடாக்கி, கடுகு சேர்த்து தாளிக்கவும்.

- கடுகு வெடிக்கும் போது ​​வெங்காயத்தாள், கறிவேப்பிலை மற்றும் சின்ன சின்ன துண்டுகளாக உடைத்த சிவப்பு மிளகாய் சேர்க்கவும்.

- வெங்காயத்தாள் பொன்னிறமாகும் வரை வதக்கவும்.

- பின்னர் அடுப்பை அணைத்துவிட்டு, அரைத்த சட்னியைச் சேர்க்கவும், பின்னர் சூடு ஆகும் வரை நன்கு கலக்கவும்.

- ஒரு கிண்ணத்திற்கு சட்னியை மாற்றி உடனடியாக சூடான இட்லி, தோசையுடன் பரிமாறவும்.

- பல உயர்தர ஹோட்டல்களில் இந்த சட்னிதான் இட்லி, தோசையுடன் பரிமாறப்படுகிறது.

- சட்னி வெள்ளையாக இருக்க விரும்பினால் பச்சை மிளகாய் பயன்படுத்துவதைத் தவிர்க்கவும், இல்லையெனில் சட்னி பச்சை நிறத்தில் மாறிவிடும்.

- இதில் வதக்கிய சின்ன வெங்காயத்தை சேர்த்து அரைத்தால் சுவை கூடுதலாக இருக்கும்.