இட்லிக்கு மல்லி சட்னியை ஒருடைம் இந்த ஸ்டைலில் அரைச்சு பாருங்க.. டேஸ்ட் சும்மா அள்ளும்...

Hotel Style Malli Chutney Recipe In Tamil: காலையில் இட்லி தான் செய்யப் போகிறீர்களா? அந்த இட்லிக்கு நல்ல அருமையான சட்னி செய்ய நினைக்கிறீர்களா? வீட்டில் உள்ளோருக்கு மல்லி சட்னி என்றால் பிடிக்குமா? அப்படியானால் அந்த மல்லி சட்னியை செய்யுங்கள்.

அதுவும் வழக்கமாக செய்வது போன்று மல்லி சட்னியை செய்யாமல், ஹோட்டல்களில் கொடுக்கப்படும் சுவையில் ஒருமுறை வீட்டில் செய்யுங்கள். இந்த ஹோட்டல் ஸ்டைல் மல்லி சட்னி செய்வதற்கு சுலபமாக இருப்பதோடு, அருமையான சுவையுடனும் இருக்கும். முக்கியமாக இது குழந்தைகள் முதல் பெரியவர்கள் வரை கேட்டு விரும்பி சாப்பிடக்கூடியவாறு இருக்கும்.

உங்களுக்கு ஹோட்டல் ஸ்டைல் மல்லி சட்னியை எப்படி செய்வதென்று தெரிந்து கொள்ள வேண்டுமா? கீழே ஹோட்டல் ஸ்டைல் மல்லி சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 1 டேபிள் ஸ்பூன்
* பச்சை மிளகாய் - 3
* வெங்காயம் - 2
* கொத்தமல்லி - 1 கைப்பிடி
* தேங்காய் - 1/4 முடி (பொடியாக நறுக்கியது)
* பொட்டுக்கடலை - 1/4 கப்
* உப்பு - சுவைக்கேற்ப
* தண்ணீர் - தேவையான அளவு

தாளிப்பதற்கு...

* எண்ணெய் - 1 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - 1 கொத்து
* வரமிளகாய் - 1

செய்முறை:

* முதலில் ஒரு வாணலியை அடுப்பில் வைத்து, அதில் 1 டேபிள் ஸ்பூன் எண்ணெய் ஊற்றி சூடானதும், பச்சை மிளகாயை சேர்த்து வெள்ளையாகும் வரை வதக்க வேண்டும்.
* பின் அதில் வெங்காயத்தை சேர்த்து, கண்ணாடி பதத்திற்கு வரும் வரை வதக்க வேண்டும்.
* பின்பு அதில் 1 கைப்பிடி கொத்தமல்லியை நீரில் கழுவி விட்டு சேர்த்து, சுருங்கும் வரை வதக்கி இறக்கி குளிர வைக்க வேண்டும்.
* பிறகு மிக்சர் ஜாரில் தேங்காய் துண்டுகளை போட்டு ஒருமுறை அரைத்துக் கொள்ள வேண்டும்.
* பின் அதில் பொட்டுக்கடலை, வதக்கிய வெங்காயம், மல்லி மற்றும் சுவைக்கேற்ப உப்பு சேர்த்து, சிறிது நீரை ஊற்றி நன்கு அரைத்துக் கொள்ள வேண்டும்.
* அடுத்து அரைத்த சட்னியை ஒரு கிண்ணத்தில் எடுத்துக் கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை, வரமிளகாய் சேர்த்து தாளித்து, சட்னியுடன் சேர்த்து கிளறினால், சுவையான ஹோட்டல் ஸ்டைல் மல்லி சட்னி தயார்.

Image Courtesy: Apoorvaa's Nalabagam