எனோகி காளான் ஆம்லெட்

காளானில் பல வெரைட்டிகள் உள்ளன. காளான்கள் இறைச்சிகளைப் போன்றே அற்புதமான சுவையைக் கொண்டவை. 2021 ஆம் ஆண்டில் ஏராளமானோர் எனோகி காளானை எப்படி சமைத்து சாப்பிடுவது என்று தெரிந்து கொள்ள ஆர்வம் காட்டியுள்ளனர். அதுவும் இந்தியாவில் உள்ள மக்கள் கூகுளில் தேடி உணவுகளின் பட்டியலில் முதல் இடத்தில் எனோகி காளான் உள்ளது. நீங்களும் எனோகி காளானை எப்படி சமைத்து சாப்பிடலாம் என்பதை தெரிந்து கொள்ள விரும்பினால், இதைக் கொண்டு ஆம்லெட் செய்யுங்கள். இந்த எனோகி காளான் ஆம்லெட் செய்வது மிகவும் ஈஸி மற்றும் அனைவருமே விரும்பி சாப்பிடக்கூடிய சுவையைக் கொண்டது.

உங்களுக்கு எனோகி காளான் ஆம்லெட் எப்படி செய்வதென்று தெரிந்து கொள்ள வேண்டுமா? கீழே எனோகி காளான் ஆம்லெட் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எனோகி காளான் - 1 கட்டு

* முட்டை - 3

* ஸ்பிரிங் ஆனியன் - சிறிது (பொடியாக நறுக்கியது)

* சோயா சாஸ் - 1/2 டீஸ்பூன்

* உப்பு - தேவையான அளவு

* வெங்காயம் - 1 (பொடியாக நறுக்கியது)

செய்முறை:

* முதலில் எனோகி காளானை எடுத்து, அதன் அடிப்பகுதியை வெட்டி நீக்கிவிட வேண்டும். இந்த காளான் கொத்தாக இருப்பதால், ஒரு பாத்திரத்தில் நீரை நிரப்பி, அதில் எனோகி காளானை பிரித்துப் போட்டு, சிறிது உப்பு தூவி பிரட்டி ஒரு 5 நிமிடம் ஊற வைத்து எடுத்துக் கொள்ள வேண்டும்.

* பின்னர் ஒரு பௌலில் முட்டைகளை உடைத்து ஊற்றிக் கொள்ள வேண்டும்.

* பின்பு அதில் பொடியாக நறுக்கிய ஸ்பிரிங் ஆனியன், வெங்காயம், உப்பு மற்றும் சோயா சாஸ் சேர்த்து நன்கு கலந்து கொள்ள வேண்டும்.

* பிறகு ஒரு நாண்-ஸ்டிக் தவாவை அடுப்பில் வைத்து, அதில் சிறிது எண்ணெய் ஊற்றி, அதில் எனோகி காளானை பேன் முழுவதும் தனித்தனியாக பிரித்து வட்டமாக பூ போன்று பரப்பி வைக்க வேண்டும்.

* பின் அதன் மேல் சிறிது எண்ணெய் ஊற்ற வேண்டும். காளானில் இருந்து நீர் வெளியேறி காளான் ஓரளவு வெந்தது போன்று தெரியும் போது, முட்டை கலவையை மேலே ஊற்றி பரப்பி விட்டு சிறிது எண்ணெய் ஊற்ற வேண்டும்.

* முட்டை வெந்தது போன்று தெரியும் போது, ஆம்லெட்டை திருப்பிப் போட்டு வேக வைத்து எடுத்தால், சுவையான எனோகி காளான் ஆம்லெட் தயார்.