1/4 கப் எள்ளு இருந்தா.. இப்படி சட்னி செஞ்சு பாருங்க.. வீட்டுல எல்லாரும் 2 இட்லி எக்ஸ்ட்ரா சாப்பிடுவாங்க..

Sesame Chutney Recipe In Tamil: காலையில் பெரும்பாலும் உங்கள் வீட்டில் இட்லி, தோசை தான் காலை டிபனாக இருக்குமா? அதற்கு தினமும் என்ன சைடு டிஷ் செய்வதென்று யோசித்து முடிவெடுப்பதே ஒரு பெரிய வேலையாக உள்ளதா? பெரும்பாலும் இட்லி, தோசைக்கு சட்னியைத் தான் செய்வீர்களா? அப்படியே சட்னி செய்தாலும் ஒரே மாதிரி தேங்காய் சட்னி, தக்காளி சட்னி, புதினா சட்னி, மல்லி சட்னி என்று தான் செய்வீர்களா?

சற்று வித்தியாசமான சட்னியை செய்ய நினைக்கிறீர்களா? வீட்டில் 1/4 கப் வெள்ளை எள்ளு உள்ளதா? அப்படியானால் அந்த எள்ளு விதைகளைக் கொண்டு சட்னி செய்யுங்கள். இந்த சட்னி இட்லி, தோசையுடன் சேர்த்து சாப்பிட அற்புதமாக இருக்கும். அதுவும் வழக்கமாக சாப்பிடுவதை விட அதிகமாக சாப்பிடக்கூடியவாறான ருசியில் இருக்கும்.

உங்களுக்கு எள்ளு சட்னியை எப்படி செய்வதென்று தெரிந்து கொள்ள வேண்டுமா? கீழே எள்ளு சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வரமிளகாய் - 4-5
* பச்சை மிளகாய் - 2
* இஞ்சி - 1/2 இன்ச்
* பூண்டு - 6 பல்
* வெள்ளை எள்ளு - 1/4 கப்
* புளி - 1 நெல்லிக்காய் அளவு
* கொத்தமல்லி - 1 கையளவு
* புதினா - 1 கையளவு
* தேங்காய் - 2 டேபிள் ஸ்பூன்
* உப்பு - சுவைக்கேற்ப
* தண்ணீர் - தேவையான அளவு

தாளிப்பதற்கு..

* எண்ணெய் - 2 டீஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்
* கறிவேப்பிலை - 1 கொத்து
* வரமிளகாய் - 1

செய்முறை:

* முதலில் ஒரு வாணலியை அடுப்பில் வைத்து, அதில் வரமிளகாய், பச்சை மிளகாய், இஞ்சி ஆகியவற்றை சேர்த்து வறுக்க வேண்டும்.
* பின் அதில் 6 பல் பூண்டு, 1/4 கப் வெள்ளை எள்ளு விதைகள் மற்றும் புளியை சேர்த்து நன்கு ட்ரை ரோஸ்ட் செய்து இறக்கி குளிர வைக்க வேண்டும்.
* பின்பு மிக்சர் ஜாரில் வறுத்த பொருட்களை சேர்த்து, அத்துடன் கொத்தமல்லி, புதினா, தேங்காய் மற்றும் சுவைக்கேற்ப உப்பு சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பிறகு அரைத்த சட்னியை ஒரு கிண்ணத்தில் எடுத்து, தேவையான அளவு நீரை ஊற்றி கலந்து கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை, வரமிளகாய் சேர்த்து தாளித்து, சட்னியுடன் சேர்த்து கிளறினால், சுவையான எள்ளு சட்னி தயார்.