5 முட்டை இருந்தா பள்ளிப்பாளையம் முட்டை வறுவலை செஞ்சு பாருங்க - காரசாரமா வேற லெவலில் இருக்கும்

Egg Pallipalayam Recipe in Tamil: விலை குறைவான ஆரோக்கியமான உணவென்றால் அதில் முதலிடத்தில் இருப்பது முட்டைதான். உங்கள் வீட்டில் அடிக்கடி முட்டை செய்வீர்களா? எப்போது முட்டையை ஒரே சுவையில் தான் செய்வீர்களா? இப்படி ஒரே மாதிரி செய்து போரடித்துவிட்டதா? சற்று வித்தியாசமான சுவையில் முட்டையை செய்து சாப்பிட விரும்புகிறீர்களா? அப்படியானால் இந்த முட்டை பள்ளிப்பாளையம் வறுவலை செய்யுங்கள்.

பள்ளிப்பாளையம் வறுவல் பொதுவாக சிக்கனில்தான் செய்வோம், ஆனால் முட்டையிலும் இந்த வறுவலை செய்யலாம். இந்த ஸ்டைலில் முட்டையை வறுவலை செய்யும் போது அதன் சுவை மிகவும் அற்புதமாக இருக்கும். மேலும் இந்த பக்குவத்தில் முட்டை வறுவலை செய்தால் சாம்பார் சாதம், ரசம் சாதம் மற்றும் தயிர் சாதம் போன்றவற்றுடன் சேர்த்து சாப்பிட அருமையாக இருக்கும். முக்கியமாக இது முட்டை சாப்பிட மறுக்கும் குழந்தைகளும் விரும்பி சாப்பிடுமாறு இருக்கும்.

உங்களுக்கு காரசாரமான பள்ளிப்பாளையம் முட்டை வறுவலை எப்படி செய்வதென்று தெரிந்து கொள்ள வேண்டுமா? கீழே பள்ளிப்பாளையம் முட்டை வறுவல் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

- 5 முட்டைகளை(வேகவைத்து தோலுரித்தது)
- 15 வர மிளகாய்
- 5 பூண்டு பல்
- 1/2 ஸ்பூன் மிளகுத்தூள்
- 1/4 ஸ்பூன் சோம்புத்தூள்
- 1 ஸ்பூன் கொத்தமல்லித்தூள்
- 1/4 ஸ்பூன் கரம் மசாலா
- 1/4 ஸ்பூன் சீரகத்தூள்
- 2 ஸ்பூன் தேங்காய் எண்ணெய்
- 4 விதை நீக்கிய வர மிளகாய்
- 2 கொத்து கறிவேப்பிலை
- 3 ஸ்பூன் நறுக்கிய தேங்காய்த் துண்டுகள்
- 1 பெரிய வெங்காயம் (பொடியாக நறுக்கியது)
- 10 சின்ன வெங்காயம் (நறுக்கியது)
- 1 ஸ்பூன் இஞ்சி பூண்டு விழுது
- 1 தக்காளி (பொடியாக நறுக்கியது)
- 1/2 ஸ்பூன் மஞ்சள் தூள்
- தேவையான அளவு உப்பு

செய்முறை:

- 5 பெரிய முட்டைகளை உப்பு சேர்த்து வேகவைத்து, அவற்றின் ஓட்டை நீக்கிவிட்டு, சின்ன சின்ன துண்டுகளாக நறுக்கவும்.

- சிறிது தண்ணீரில் காய்ந்த மிளகாய் மற்றும் பூண்டைச் சேர்த்து 2-3 நிமிடங்கள் வேகவைக்கவும். ஆறியதும் அவற்றை நைசாக அரைத்துக்கொள்ளவும்.

- ஒரு கடாயில் எண்ணெய் ஊற்றி, அரைத்த மிளகாய் விழுதுடன் மிளகுத் தூள், மல்லித் தூள், சோம்புத் தூள், கரம் மசாலா, இறைச்சி மசாலா மற்றும் சீரகத் தூள் ஆகியவற்றைச் சேர்த்து 2-3 நிமிடங்கள் வதக்கி தனியே எடுத்து வைக்கவும்.

- மற்றொரு கடாயில் எண்ணெய் ஊற்றி, விதைகளை நீக்கிய காய்ந்த மிளகாயை அரை நிமிடம் வதக்கவும். பின் கறிவேப்பிலை சேர்த்து அது மொறுமொறுப்பாகும் வரை வதக்கவும்.

- பின்னர் நறுக்கிய தேங்காய்த் துண்டுகளைச் சேர்த்து, லேசாகச் சிவக்கும் வரை வறுக்கவும்.

- மேலும், நறுக்கிய பெரிய வெங்காயம், சின்ன வெங்காயம் மற்றும் இஞ்சி-பூண்டு விழுது ஆகியவற்றைச் சேர்த்து பொன்னிறமாகும் வரை வதக்கவும்.

- இப்போது தக்காளி மற்றும் மஞ்சள் தூள் சேர்த்து, தக்காளி நன்கு குழைந்து வரும் வரை வதக்கவும்.

- பின்னர் தயார் செய்து வைத்துள்ள மிளகாய் மசாலா விழுதைச் சேர்த்து, உப்புடன் சில நொடிகள் வதக்கவும்.

- சிறிது தண்ணீர் தெளித்து, கலவை கெட்டியான பதத்திற்கு வரும் வரை கொதிக்கவிடவும்.

- நறுக்கி வைத்துள்ள முட்டைத் துண்டுகளைச் சேர்த்து நன்கு கலக்கவும். கலவை ஈரப்பதம் வற்றும் வரை 2-3 நிமிடங்கள் வாணலியில் அப்படியே விடவும்.

- அவ்வளவுதான் அட்டகாசமான பள்ளிப்பாளைய முட்டை மசாலா ரெடி!