முட்டையும், பிரட்டும் இருந்தா.. ஈவ்னிங் டைம்-ல இப்படி செய்யுங்க.. குழந்தைங்க விரும்பி சாப்பிடுவாங்க..

Egg Bread Masala Recipe In Tamil: மாலை வேளையில் உங்கள் பிள்ளைகள் சாப்பிட ஏதாவது கேட்கிறார்களா? அவர்களுக்கு வயிறு நிரம்பும் வகையில் ஒரு சுவையான ஸ்நாக்ஸ் அல்லது டிபன் போன்று செய்து கொடுக்க நினைக்கிறீர்களா? உங்கள் வீட்டில் பிரட் மற்றும் முட்டை உள்ளதா? அப்படியானால் அவற்றைக் கொண்டு அருமையான சுவையில் முட்டை பிரட் மசாலா செய்து கொடுங்கள்.

இது மிகச்சிறந்த பேச்சுலர்கள் கூட செய்து சாப்பிடக்கூடிய வகையில் இருக்கும் ஒரு சுலபமான ரெசிபி. இதை மாலை வேளையில் ஸ்நாக்ஸாக மட்டுமின்றி, டிபன் போன்று காலையிலும் செய்து சாப்பிடலாம். வேலைக்கு செல்பவர்கள் இதுப்போன்ற ரெசிபிக்களை தெரிந்து வைத்துக் கொள்வது நல்லது.

உங்களுக்கு முட்டை பிரட் மசாலாவை எப்படி செய்வதென்று தெரிந்து கொள்ள வேண்டுமா? கீழே முட்டை பிரட் மசாலா ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பிரட் - 8 துண்டுகள் (சதுர துண்டுகளாக்கிக் கொள்ளவும்)
* முட்டை - 7
* உப்பு - 1/2 டீஸ்பூன்
* மஞ்சள் தூள் - 1/4 டீஸ்பூன்
* மிளகாய தூள் - 1/2 டீஸ்பூன்
* மிளகுத் தூள் - 1/2 டீஸ்பூன்
* எண்ணெய் - 4 டேபிள் ஸ்பூன்
* சோம்பு - 1 டீஸ்பூன்
* பட்டை - 1 துண்டு
* வெங்காயம் - 2 (பொடியாக நறுக்கியது)
* இஞ்சி பூண்டு பேஸ்ட் - 1 டீஸ்பூன்
* பச்சை மிளகாய் - 2 (பொடியாக நறுக்கியது)
* தக்காளி - 3 (பொடியாக நறுக்கியது)
* கறிவேப்பிலை - 1 கொத்து
* மஞ்சள் தூள் - 1/4 டீஸ்பூன்
* காஷ்மீரி மிளகாய் தூள் - 1 டீஸ்பூன்
* சீரகத் தூள் - 1 டீஸ்பூன்
* மல்லித் தூள் - 2 டீஸ்பூன்
* மிளகுத் தூள் - 1/2 டீஸ்பூன்
* உப்பு - சுவைக்கேற்ப
* கரம் மசாலா - 1 டீஸ்பூன்
* தண்ணீர் - 1/2 டம்ளர்

செய்முறை:

* முதலில் ஒரு கிண்ணத்தில் முட்டைகளை உடைத்து ஊற்றி, அதில் உப்பு, மஞ்சள் தூள், மிளகாய் தூள் மற்றும் மிளகுத் தூள் சேர்த்து நன்கு அடித்து தனியாக வைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், சோம்பு, பட்டை சேர்த்து தாளிக்க வேண்டும்.
* பின் அதில் பொடியாக நறுக்கிய வெங்காயத்தை சேர்த்து கண்ணாடி பதத்திற்கு வதக்க வேண்டும்.
* பின்பு அதில் இஞ்சி பூண்டு பேஸ்ட், பச்சை மிளகாய் சேர்த்து, நன்கு பச்சை வாசனை போக வதக்க வேண்டும்.
* அடுத்து அதில் தக்காளி மற்றும் கறிவேப்பிலையை சேர்த்து, தக்காளி மென்மையாகும் வரை வதக்க வேண்டும்.
* பிறகு அதில் மஞ்சள் தூள், காஷ்மீரி மிளகாய் தூள், சீரகத் தூள், மல்லித் தூள், மிளகுத் தூள், கரம் மசாலா மற்றும் சுவைக்கேற்ப உப்பு சேர்த்து நன்கு கிளறி விட வேண்டும்.
* பின் அதில் 1/2 டம்ளர் நீரை ஊற்றி கிளறி, மிதமான தீயில் வைத்து பச்சை வாசனை போக வதக்க வேண்டும்.
* அடுத்து அதில் துண்டுகளாக்கி வைத்துள்ள பிரட் துண்டுகளை சேர்த்து நன்கு மசாலா பிரட்டில் ஒன்று சேரும் வரை கிளறி விட வேண்டும்.
* பிறகு அடித்து வைத்துள்ள முட்டையை மேலே ஊற்றி நன்கு 3-4 நிமிடம் கிளறி விட்டு இறக்கினால், சுவையான பிரட் முட்டை மசாலா தயார்.