1/2 கைப்பிடி முருங்கைக்கீரை இருந்தா.. இப்படி ஒருடைம் பூரி செஞ்சு சாப்பிடுங்க.. செம ருசியா இருக்கும்..

Drumstick Leaves Poori Recipe In Tamil: உணவில் கீரையை அடிக்கடி சேர்ப்பது நல்லது. அதுவும் வாரத்திற்கு 2 முறையாவது கீரையை உட்கொண்டு வந்தால், பலவிதமான ஆரோக்கிய பிரச்சனைகளைத் தவிர்க்கலாம். கீரைகளில் எளிதில் கிடைக்கக்கூடிய ஒரு கீரை தான் முருங்கைக்கீரை. இந்த கீரையில் இரும்புச்சத்து அதிகமாக உள்ளது. இப்படிப்பட்ட முருங்கைக்கீரையை இதுவரை நீங்கள் பொரியல், சாம்பார் என்று தான் செய்து சாப்பிட்டிருப்பீர்கள்.

ஆனால் அந்த முருங்கைக்கீரையைக் கொண்டு பூரி செய்து சாப்பிடலாம் என்பது தெரியுமா? இந்த முருங்கைக்கீரை பூரி செய்வதற்கு சுலபமாக இருக்கும். விடுமுறை நாட்களில் ஸ்பெஷலாக ஏதாவது சாப்பிட நினைத்தால், இந்த பூரியை செய்து சாப்பிடலாம். இந்த பூரிக்கு வெஜ் குருமா அட்டகாசமாக இருக்கும்.

உங்களுக்கு முருங்கைக்கீரை பூரியை எப்படி செய்வதென்று தெரிந்து கொள்ள வேண்டுமா? கீழே முருங்கைக்கீரை பூரி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

அரைப்பதற்கு...

* இஞ்சி - சிறிய துண்டு
* பச்சை மிளகாய் - 2
* முருங்கைக்கீரை - 1/2 கைப்பிடி

பூரிக்கு...

* கோதுமை மாவு - 2 கப்
* எண்ணெய் - 2 டீஸ்பூன்
* ஓமம் - 1/2 டீஸ்பூன்
* உப்பு - சுவைகேற்ப
* தண்ணீர் - தேவையான அளவு
* எண்ணெய் - பொரிப்பதற்கு தேவையான அளவு

செய்முறை:

* முதலில் மிக்சர் ஜாரில் சிறுதுண்டு இஞ்சி, பச்சை மிளகாய் மற்றும் முருங்கைக்கீரையை எடுத்து, அதில் சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின்னர் ஒரு பாத்திரத்தில் கோதுமை மாவு, 2 டீஸ்பூன் எண்ணெய், 1/2 டீஸ்பூன் ஓமம், சுவைக்கேற்ப உப்பு சேர்த்து, சிறிது நீரை ஊற்றி பூரி மாவு பதத்திற்கு பிசைந்து கொள்ள வேண்டும்.
* பின்பு பிசைந்த மாவை 10 நிமிடம் மூடி வைத்து ஊற வைக்க வேண்டும்.
* 10 நிமிடம் கழித்து, பிசைந்த மாவை சிறு சிறு உருண்டைகளாக உருட்டி, தேய்த்துக் கொள்ள வேண்டும்.
* பிறகு ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், தேய்த்து வைத்துள்ளதை எண்ணெயில் போட்டு பொரித்து எடுத்தால், முருங்கைக்கீரை பூரி தயார்.

Image Courtesy: Savithri Samayal