சீனி பணியாரம்

பணியாரம் அனைவருக்குமே சாப்பிட பிடிக்கும். நீங்கள் பணியாரத்தை விரும்பி சாப்பிடுபவரானால், உங்களுக்காக ஒரு ஈஸியான பணியார ரெசிபியைப் பற்றி தான் இப்போது பார்க்கப் போகிறோம். இந்த பணியாரத்திற்கு மாவு எதையும் தனியாக அரைக்க வேண்டிய அவசியமில்லை. வீட்டில் மைதா, சர்க்கரை இருந்தால் போதும், அதைக் கொண்டே ஒரு சுவையான பணியாரம் செய்யலாம். இந்த பணியாரத்தின் பெயர் சீனி பணியாரம் அல்லது மைதா பணியாரம்.

உங்களுக்கு சீனி பணியாரம் எப்படி செய்வதென்று தெரிந்து கொள்ள வேண்டுமா? கீழே சீனி பணியாரம் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* மைதா - 1 கப்

* சர்க்கரை - 1/2 கப்

* சமையல் சோடா - 1/2 டீஸ்பூன்

* ஏலக்காய் பொடி - 1/2 டீஸ்பூன்

* பால் - தேவையான அளவு

* எண்ணெய் - பொரிப்பதற்கு தேவையான அளவு

செய்முறை:

* முதலில் ஒரு பாத்திரத்தில் மைதா, சர்க்கரை, சமையல் சோடா, ஏலக்காய் பொடி மற்றும் தேவையான அளவு பால் சேர்த்து ஓரளவு கெட்டியாக, கட்டிகளின்றி நன்கு கலந்து கொள்ள வேண்டும்.

* பின் ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடேற்ற வேண்டும்.

* எண்ணெய் சூடானதும், ஒரு ஸ்பூன் மாவை எடுத்து எண்ணெயில் ஊற்றி பொன்னிறமாக பொரித்து எடுக்க வேண்டும்.

* இதேப் போல் அனைத்து மாவையும் பொரித்து எடுத்தால், சீனி பணியாரம் தயார்.

Image Courtesy: yummytummyaarthi