காலிஃப்ளவர் இருந்தா ஒருடைம் இந்த மாதிரி கிரேவி செய்யுங்க.. சும்மா தாறுமாறா இருக்கும்..

Cauliflower Cutlet Gravy Recipe In Tamil: உங்கள் வீட்டில் காலிஃப்ளவர் உள்ளதா? காலிஃப்ளவர் இருந்தால், வீட்டில் ப்ரை செய்தோ அல்லது குருமாவாக செய்தோ தான் சாப்பிடுவீர்களா? அப்படியானால் அடுத்தமுறை காலிஃப்ளவர் வாங்கினால், அதைக் கொண்டு கட்லெட் கிரேவி செய்யுங்கள்.

இந்த காலிஃப்ளவர் கட்லெட் கிரேவி சப்பாத்தி, தோசை, இட்லி, பூரி, சாதம் என அனைத்துடனும் சாப்பிட அருமையாக இருக்கும். இந்த கிரேவி செய்வதற்கு சற்று நேரம் எடுத்தாலும், சுவை மிகவும் அட்டகாசமாக இருக்கும்.

உங்களுக்கு காலிஃப்ளவர் கட்லெட் கிரேவியை எப்படி செய்வதென்று தெரிந்து கொள்ள வேண்டுமா? கீழே காலிஃப்ளவர் கட்லெட் கிரேவி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* காலிஃப்ளவர் - 1
* உப்பு - சிறிது
* மஞ்சள் தூள் - 1/2 டீஸ்பூன்
* சுடுநீர்

அரைப்பதற்கு...

* சோம்பு - 1 டீஸ்பூன்
* சீரகம் - 1 டீஸ்பூன்
* கிராம்பு - 5
* அன்னாசிப்பூ - 1
* பிரியாணி இலை - 1
* பூண்டு - 10 பல்
* பச்சை மிளகாய் - 2
* வெங்காயம் - 2

கட்லெட்டிற்கு...

* மஞ்சள் தூள் - 1/4 டீஸ்பூன்
* மல்லித் தூள் - 1/2 டீஸ்பூன்
* மிளகாய் தூள் - 1/2 டீஸ்பூன்
* சிக்கன் மசாலா - 1/4 டீஸ்பூன்
* உப்பு - சுவைக்கேற்ப
* கரம் மசாலா - 1/4 டீஸ்பூன்
* கொத்தமல்லி - சிறிது
* கடலை மாவு - 3 டேபிள் ஸ்பூன்
* எண்ணெய் - பொரிப்பதற்கு தேவையான அளவு

கிரேவிக்கு...

* எண்ணெய் - 1 டேபிள் ஸ்பூன்
* சீரகம் - 1 டீஸ்பூன்
* நன்கு கனிந்த தக்காளி - 2 (அரைத்தது)
* மல்லித் தூள் - 1 டீஸ்பூன்
* மிளகாய் தூள் - 1 டீஸ்பூன்
* மஞ்சள் தூள் - 1/2 டீஸ்பூன்
* கரம் மசாலா - 1/2 டீஸ்பூன்
* சிக்கன் மசாலா - 1/2 டீஸ்பூன்
* தண்ணீர் - தேவையான அளவு
* உப்பு - சுவைக்கேற்ப
* கொத்தமல்லி - சிறிது

செய்முறை:

* முதலில் சுடுநீரில் மஞ்சள் தூள் மற்றும் உப்பு சேர்த்து, காலிஃப்ளவர் பூக்களை மட்டும் வெட்டிப் போட்டு, 3 நிமிடம் ஊற வைக்க வேண்டும்.
* பின்னர் மிக்சர் ஜாரில் சோம்பு, சீரகம், கிராம்பு, அன்னாசிப்பூ, பிரியாணி இலை, பூண்டு, பச்சை மிளகாய், வெங்காயம் ஆகியவற்றை சேர்த்து அரைத்து, தனியாக ஒரு கிண்ணத்தில் எடுத்து வைத்துக் கொள்ள வேண்டும்.
* பின்பு அதே ஜாரில் ஊற வைத்த காலிஃப்ளவரை சேர்த்து லேசாக அரைத்து, ஒரு பாத்திரத்தில் எடுத்துக் கொள்ள வேண்டும்.
* பின் அத்துடன் மஞ்சள் தூள், மிளகாய் தூள், மல்லித் தூள், சிக்கன் மசாலா, சுவைக்கேற்ப உப்பு, கரம் மசாலா, கொத்தமல்லி சேர்த்து கைகளால் நன்கு பிசைந்து விட வேண்டும்.
* பிறகு அதில் கடலை மாவு சேர்த்து, தண்ணீர் எதுவும் சேர்க்காமல் கைகளால் நன்கு பிசைந்து, கொஞ்சம் கொஞ்சமாக எடுத்து கட்லெட் வடிவில் தட்டி ஒரு தட்டில் வைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி, தட்டி வைத்துள்ள கட்லெட்டுகளை சேர்த்து முன்னும் பின்னும் பொன்னிறமாக ப்ரை செய்து, ஒரு தட்டில் எடுத்து வைத்துக் கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் 1 டேபிள் ஸ்பூன் எண்ணெய் ஊற்றி சூடானதும், சீரகம் சேர்த்து தாளிக்க வேண்டும்.
* அதன் பின் அதில் அரைத்து வைத்துள்ள வெங்காய விழுதை சேர்த்து பச்சை வாசனை போக வதக்க வேண்டும்.
* பின் அதில் அரைத்த தக்காளியை சேர்த்து 1 நிமிடம் வதக்க வேண்டும்.
* பிறகு அதில் மல்லித் தூள், மிளகாய் தூள், மஞ்சள் தூள், கரம் மசாலா, சிக்கன் மசாலா சேர்த்து, பச்சை வாசனை போக 3-4 நிமிடம் வதக்க வேண்டும்.
* பின் அதில் கிரேவிக்கு தேவையான அளவு நீரை ஊற்றி, சுவைக்கேற்ப உப்பு சேர்த்து, 5 நிமிடம் மூடி வைத்து எண்ணெய் பிரியும் வரை கொதிக்க வைக்க வேண்டும்.
* அடுத்து அதில் ப்ரை செய்து வைத்துள்ள கட்லெட்டுகளை சேர்த்து, மூடி வைத்து 2 நிமிடம் கொதிக்க வைத்து இறக்கி, கொத்தமல்லியைத் தூவினால், சுவையான காலிஃப்ளவர் கட்லெட் கிரேவி தயார்.