அடுத்தமுறை மல்லி சட்னியுடன் இந்த ஒரு பொருளை சேர்த்து அரைங்க.. டேஸ்ட் சும்மா தாறுமாறா இருக்கும்...

Capsicum Kothamalli Chutney Recipe In Tamil: காலையில் உங்கள் வீட்டில் செய்யும் இட்லி, தோசைக்கு அடிக்கடி மல்லி சட்னியை செய்வீர்களா? அப்படியானால் அடுத்தமுறை மல்லி சட்னி செய்வதாக இருந்தால், சற்று வித்தியாசமான சுவையில் செய்யுங்கள்.

அதற்கு மல்லி சட்னிக்கு வதக்கும் போது, அத்துடன் ஒரு குடைமிளகாயை சேர்த்துக் கொள்ளுங்கள். இதனால் சட்னியின் சுவை வேற லெவலில் இருக்கும். மேலும் இப்படி மல்லி சட்னியை செய்தால், அடிக்கடி இப்படி தான் உங்கள் வீட்டில் இருப்போர் செய்ய சொல்வார்கள். அந்த அளவில் சுவை பிரமாதமாக இருக்கும்.

உங்களுக்கு குடைமிளகாய் மல்லி சட்னியை எப்படி செய்வதென்று தெரிந்து கொள்ள வேண்டுமா? கீழே குடைமிளகாய் மல்லி சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* குடைமிளகாய் - 1 (துண்டுகளாக்கப்பட்டது)
* கொத்தமல்லி - 2 கைப்பிடி (வெறும் இலைகள் மட்டும்)
* எண்ணெய் - 1 டேபிள ஸ்பூன்
* பூண்டு - 3 பல்
* சின்ன வெங்காயம் - 10
* மிளகாய் தூள் - 1/2 டீஸ்பூன்
* கல் உப்பு - 1/2 டீஸ்பூன்
* புளி - 1 துண்டு
* தண்ணீர் - சிறிது

தாளிப்பதற்கு...

* தேங்காய் எண்ணெய் - 2 டீஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1 டீஸ்பூன்
* கறிவேப்பிலை - 1 கொத்து

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், நறுக்கிய பூண்டு மற்றும் சின்ன வெங்காயத்தை சேர்த்து நிறம் மாற வதக்க வேண்டும்.
* பின் அதில் நறுக்கிய குடைமிளகாயை சேர்த்து லேசாக வதக்க வேண்டும்.
* பின்பு அதில் மிளகாய் தூள், கல் உப்பு மற்றும் புளி சேர்த்து 1 நிமிடம் குறைவான தீயில் வைத்து வதக்க வேண்டும்.
* பிறகு அதில் கொத்தமல்லி இலைகளை சேர்த்து சுருண்டு வரும் வரை வதக்கி இறக்கி குளிர வைக்க வேண்டும்.
* பின்னர் மிக்சர் ஜாரில் வதக்கிய பொருட்களை சேர்த்து ஒருமுறை அரைத்துக் கொள்ள வேண்டும்.
* பின் சிறிது நீரை ஊற்றி நன்கு மென்மையாக அரைத்து, ஒரு கிண்ணத்தில் சட்னியை எடுத்துக் கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு தேங்காய் எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை சேர்த்து தாளித்து, சட்னியுடன் சேர்த்து கிளறினால், சுவையான குடைமிளகாய் கொத்தமல்லி சட்னி தயார்.