உங்க குழந்தைங்க பாதாம் சாப்பிடமாட்றாங்களா? அப்ப இப்படி சட்னி செஞ்சு குடுங்க.. விரும்பி சாப்பிடுவாங்க..

Almond Chutney Recipe: உங்க குழந்தைகளுக்கு சத்தான உணவுகளை கொடுக்க நினைக்கிறீர்களா? உங்கள் குழந்தைகள் பாதாம், பிஸ்தா, முந்திரி போன்றவற்றை சாப்பிடமாட்டார்களா? அவர்களை இந்த நட்ஸ்களை சாப்பிட வைக்க வேண்டுமா? அப்படியானால் பாதாம் கொண்டு சட்னி செய்யுங்கள்.

இந்த பாதாம் சட்னி இட்லி, தோசையுடன் சாப்பிட அட்டகாசமாக இருக்கும். மேலும் இது குழந்தைகள் முதல் பெரியவர்கள் வரை அனைவரும் விரும்பி சாப்பிடக்கூடியவாறு இருக்கும்.

உங்களுக்கு பாதாம் சட்னியை எப்படி செய்வதென்று தெரிந்து கொள்ள வேண்டுமா? கீழே பாதாம் சட்னி ரெசிபியின் எளிய செய்முறை கொடுக்கப்பட்டுள்ளது . அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பாதாம் - 1/2 கப்
* பூண்டு - 1 பல்
* இஞ்சி - 1/4 இன்ச்
* பச்சை மிளகாய் - 2
* கறிவேப்பிலை - சிறிது
* கடுகு - 1/4 டீஸ்பூன்
* உளுத்தம் பருப்பு - 1/4 டீஸ்பூன்
* உப்பு - சுவைக்கேற்ப
* எண்ணெய் - 1 டீஸ்பூன்

செய்முறை:

* முதலில் பாதாமை வெதுவெதுப்பான நீரில் 15-30 நிமிடம் ஊற வைக்க வேண்டும்.
* பின் நன்கு ஊறிய பாதாமை மிக்சர் ஜாரில் போட்டு, அத்துடன் இஞ்சி, பூண்டு, பச்சை மிளகாய், சுவைக்கேற்ப உப்பு சேர்த்து, நன்கு மென்மையாக அரைத்துக் கொள்ள வேண்டும்.
* அடுத்து அரைத்த சட்னியை ஒரு கிண்ணத்தில் போட்டுக் கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை சேர்த்து தாளித்து சட்னியில் ஊற்றி நன்கு கிளறி விட வேண்டும்.
* இப்போது சுவையான பாதாம் சட்னி தயார்.

Image Courtesy: naliniscooking