200 பேர் மட்டுமே வாழும் இந்தியாவின் தனித்துவமான 8 கிராமங்கள் - இந்த கிராமங்களுக்கு போறதே ரொம்ப கஷ்டமாம்

உலகில் அதிக மக்கள் தொகை கொண்ட நாடுகளில் சீனாவை பின்னுக்குத் தள்ளி இந்தியா தற்போது முதலிடத்தில் உள்ளது. பன்முகத்தன்மை கொண்ட கலாச்சாரம், மதம் மற்றும் பல்வேறு புனிதமான தலங்களுக்கு பெயர் பெற்ற இந்தியாவில் அனைத்து இடங்களிலும் ஒரே மாதிரியாக மக்கள் தொகை நிரம்பி வழிவதில்லை. சில நூறுகளில் தொடங்கி ஒற்றை இலக்கத்தில் மக்கள் வசிக்கும் இடங்களும் இந்தியாவில் உள்ளது.

இந்தியாவின் மிகவும் அமைதியான மற்றும் தனித்துவமான பகுதிகள் என்று வரும் போது இந்தியாவின் மிகக் குறைந்த மக்கள் தொகை கொண்ட கிராமங்கள் முக்கியத்துவம் பெறுகின்றன. செழுமையான கலாச்சாரம் மற்றும் பாரம்பரியத்திற்குப் பெயர் பெற்ற கிராமங்கள் பல இருந்தாலும், மிகக் குறைந்த மக்கள் தொகை கொண்ட சில குறிப்பிடத்தக்க கிராமங்களும் உள்ளன. இந்த கிராமங்களில் வசிக்கும் மக்களின் எண்ணிக்கையை கேட்டால் உங்களுக்கு மயக்கமே வந்துவிடும். இந்த பதிவில் இந்தியாவில் மிகவும் குறைவான மக்கள் தொகை கொண்ட கிராமங்கள் என்னென்ன என்று தெரிந்து கொள்ளலாம்.

ஹா, அருணாச்சலப் பிரதேசம்

'ஹா' என்பது அருணாச்சலப் பிரதேசத்தில் உள்ள ஒரு சிறிய பழங்குடியின கிராமமாகும். இந்த கிராமத்தில் மொத்தம் 289 பேர் மட்டுமே வசிக்கின்றனர். இது குருங் குமே மாவட்டத்தின் லாங்டிங் கோலிங் பகுதியில், கடல் மட்டத்திலிருந்து 4,780 அடி உயரத்தில் அமைந்துள்ளது. அழகான இயற்கை காட்சிகள், பீடபூமிகள் மற்றும் சிவபெருமானின் வழிபாட்டுத் தலமாகத் திகழும் இயற்கையழகு மாறாத 'மெங்கா' குகைகள் ஆகியவற்றிற்கு இந்த கிராமம் பெயர் பெற்றது.

ஷான்ஷா, இமாச்சலப் பிரதேசம்

இமாச்சலப் பிரதேசத்தில் உள்ள 'ஷான்ஷா' கிராமமும் இந்தியாவின் தனித்துவமான கிராமங்களில் ஒன்றாக உள்ளது. இங்கு 72 வீடுகளில் மொத்தம் 320 கிராமவாசிகள் மட்டுமே வசிக்கின்றனர். கீலாங்கிலிருந்து 27 கி.மீ தொலைவில் அமைந்துள்ள இந்தக் கிராமம், டாண்டியை நோக்கிய ஒரு சவாலான மற்றும் ஆபத்தான மலையேற்றப் பாதையில் அமைந்துள்ளது. இது கடல் மட்டத்திலிருந்து சுமார் 10,000 அடி உயரத்தில் அமைந்துள்ளது என்பது குறிப்பிடத்தக்கது.

காஞ்சி, லே

ஜம்மு-காஷ்மீரின் லே பகுதியில், கடல் மட்டத்திலிருந்து 12,600 அடி உயரத்தில் அமைந்துள்ள 'காஞ்சி' இந்தியாவின் மிக அழகான கிராமங்களில் ஒன்றாகும். பிரம்மாண்டமான மலைகளால் சூழப்பட்ட இக்கிராமம், ரங்தும் கோம்பாவிலிருந்து பள்ளத்தாக்கு வழி மலையேற்றம் செல்பவர்களுக்கு ஒரு சிறந்த இடமாக இது திகழ்கிறது. இது பல இந்தியர்களின் கனவு இடங்களில் ஒன்றாக உள்ளது.

ஸ்குரு, நுப்ரா பள்ளத்தாக்கு

ஜம்மு-காஷ்மீரின் நுப்ரா பள்ளத்தாக்கில், கடல் மட்டத்திலிருந்து 10,000 அடி உயரத்தில் அமைந்துள்ள 'ஸ்குரு' வெறும் 52 வீடுகளைக் கொண்ட ஒரு சிறிய கிராமமாகும். லே நகரிலிருந்து ஜீப் மூலம் 'சபோஸ்டே' பகுதிக்குச் சென்று, அங்கிருந்து நான்கு நாட்கள் மலையேற்றம் செய்தால் மட்டுமே இந்த கிராமத்தை அடைய முடியும். மலையேற்றம் மற்றும் ரகுருக் (Rakuruk) ஆற்றிற்குப் பெயர் பெற்ற இக்கிராமம், சாகசத்தை விரும்புபவர்கள் நிச்சயம் செல்ல வேண்டிய இடமாகும்.

நிதோய், கிஃபைர், நாகாலாந்து

நாகாலாந்தில் அமைந்துள்ள நிதோய் கிராமம், சுமார் 402 பேர் வசிக்கும் ஒரு அழகான இடமாகும். இது புகைப்படக் கலைஞர்களுக்கும், இயற்கையோடு இணைந்த வாழ்க்கையை விரும்புவோருக்கும் ஒரு சொர்க்கமாகத் திகழ்கிறது.

கிப்பர், ஸ்பிதி, இமாச்சலப் பிரதேசம்

இமாச்சலப் பிரதேசத்தில் கடல் மட்டத்திலிருந்து மலைக்க வைக்கும் வகையில் 14,200 அடி உயரத்தில் அமைந்துள்ள 'கிப்பர்' கிராமமே உலகின் மிக உயரமான கிராமமாகும். உள்ளூர் கற்களைக் கொண்டு கட்டப்பட்ட சுமார் 80 வீடுகளைக் கொண்ட இக்கிராமம், கண்கவர் இயற்கை காட்சிகளையும், தனித்துவமான கலாச்சார அனுபவத்தையும் வழங்குகிறது.

வாரிஸ்ஃபிஸ்தான், ஜம்மு மற்றும் காஷ்மீர்

லே பகுதியில் உள்ள நுப்ரா ஆற்றின் கரையில் அமைந்துள்ள வாரிஸ்ஃபிஸ்தான், நுப்ரா பள்ளத்தாக்கிலேயே மிகக் குறைந்த மக்கள் தொகை கொண்ட கிராமங்களில் ஒன்றாகும். இங்கு வெறும் 258 கிராமவாசிகளே வசிக்கின்றனர். மலைப்பாதை வழியாகப் பயணம் செய்யும் பலருக்கு இது ஒரு முக்கியமான இடமாகத் திகழ்கிறது. என்சா கோம்பாவிற்கு அருகிலிருந்து, பிரம்மாண்டமான இமயமலைப் பாலைவனத்தின் கண்கவர் காட்சிகளைக் காணலாம்.

லோசார், இமாச்சலப் பிரதேசம்

இமாச்சலப் பிரதேசத்தின் ஸ்பிதி பகுதியில் அமைந்துள்ள 'லோசார்' ஒரு சிறிய விவசாயக் கிராமமாகும்; இங்கு சுமார் 328 பேர் மட்டுமே வசிக்கின்றனர். சந்திரா ஆற்றின் கரையில் அமைந்துள்ள இக்கிராமத்தில், ஆற்றின் மென்மையான நீரோட்டம் அந்த இடத்திற்கு மேலும் அமைதியான சூழலை அளிக்கிறது.