வரப்போகும் தமிழ்நாடு சட்டமன்ற தேர்தலின் பணக்கார மற்றும் ஏழை வேட்பாளர்கள் யார் தெரியுமா?

Tamil Nadu Election 2026: தமிழ்நாடு சட்டமன்ற தேர்தலுக்கான தேதி அறிவிக்கப்பட்டு அனைத்து கட்சிகளும் வெற்றிக்காக தீவிரமாக பிரச்சாரத்தை செய்து வருகின்றன. தமிழ்நாடு சட்டமன்ற தேர்தல் ஏப்ரல் 23 ஆம் தேதி நடைபெற உள்ளது, அதன்பின் மே 04 ஆம் தேதி முடிவுகள் அறிவிக்கப்பட உள்ளது. அனைத்து கட்சிகளும் 234 தொகுதிகளுக்கும் வேட்பாளர்களை அறிவித்துவிட்டன.

தேர்தலில் போட்டியிடும் அனைத்து வேட்பாளர்களும் தங்கள் சொத்து மதிப்பு மற்றும் குற்ற பின்னணியை தங்களின் வேட்புமனுவில் குறிப்பிட்டுள்ளனர். அதன்படி 2026 தமிழ்நாடு சட்டமன்ற தேர்தலில் போட்டியிடப் போகும் பணக்கார மற்றும் ஏழை வேட்பாளர்கள் யாரென்று அறிவிக்கப்பட்டு விட்டது. இந்த பதிவில் வரப்போகிற சட்டமன்ற தேர்தலில் போட்டியிடப் போகும் பணக்கார மற்றும் ஏழை வேட்பாளர்கள் யாரென்று தெரிந்து கொள்ளலாம்.

2026 சட்டமன்ற தேர்தல் களம்

தற்போதைய அரசியல் களத்தில், தொடர்ந்து இரண்டாவது முறையாக ஆட்சியைப் பிடிக்க இலக்கு வைத்துள்ள ஆளும் திமுக, மீண்டும் ஆட்சியைப் பிடிக்க போராடும் அதிமுக தலைமையிலான NDA கூட்டணி; மற்றும் நடிகர் விஜயால் வழிநடத்தப்பட்டு, தனது முதல் தேர்தலைச் சந்திக்கத் தயாராக உள்ள TVK ஆகிய கட்சிகள் முக்கிய இடம்பிடித்துள்ளன. இதுதவிர சீமான் தலைமையிலான நாம் தமிழர் கட்சியும் களத்தில் வலுவாக உள்ளது.

தமிழ்நாட்டின் பணக்கார வேட்பாளர்கள்

2026 தமிழ்நாடு சட்டமன்றத் தேர்தலுக்காகத் தாக்கல் செய்யப்பட்ட தேர்தல் பிரமாணப் பத்திரங்களின் அடிப்படையில், நடிகராக இருந்து அரசியல்வாதியாக மாறியவரும், தமிழக வெற்றிக் கழகத் தலைவருமான விஜய், வேட்புமனு தாக்கல் செய்தவர்களில் பணக்கார வேட்பாளராக முதலிடத்தில் உள்ளார். இவர் ரூ. 600 கோடிக்கும் அதிகமான மதிப்புள்ள சொத்துக்களை அறிவித்துள்ளார். பெரம்பூர் மற்றும் திருச்சி கிழக்கு ஆகிய தொகுதிகளில் போட்டியிடும் விஜய், சுமார் ரூ. 603.20 கோடி மதிப்புள்ள சொத்துக்கள் தன்னிடம் இருப்பதாக அறிவித்துள்ளார். இதில் பல்வேறு வங்கிக் கணக்குகளில் வைப்புத்தொகையாக உள்ள ரூ. 213 கோடி பணமும் அடங்கும்.

எஸ்.பி. வேலுமணி

தொண்டாமுத்தூர் தொகுதியில் போட்டியிடும் அதிமுக முன்னாள் அமைச்சர் எஸ்.பி. வேலுமணி இரண்டாவது இடத்தில் உள்ளார். இவர் சுமார் ரூ.150 முதல் 180 கோடி மதிப்பிலான சொத்துக்களைக் வைத்திருப்பதாக தனது வேட்பு மனுவில் தெரிவித்துள்ளார்.

ஆதவ் அர்ஜுனா

தமிழக வெற்றிக் கழகம் சார்பாக வில்லிவாக்கம் தொகுதியில் போட்டியிடும் ஆதவ் அர்ஜுனா, தனது சொத்து மதிப்பு ரூ. 197.52 கோடி என அறிவித்துள்ளார்; ஏப்ரல் 23 அன்று நடைபெறவுள்ள சட்டமன்றத் தேர்தலுக்காக அவர் தனது வேட்புமனுவுடன் தாக்கல் செய்த பிரமாணப் பத்திரத்தின் மூலம் இத்தகவல் தெரியவந்துள்ளது. அந்த பிரமாணப் பத்திரத்தின்படி, ஆதவ் அர்ஜுனா தனது பெயரில் ரூ. 180.03 கோடி மதிப்பிலான அசையும் சொத்துக்களும், தனது மனைவி டெய்சி அர்ஜுனா பெயரில் ரூ. 162.14 கோடி மதிப்பிலான சொத்துக்களும் இருப்பதாக அறிவித்துள்ளார்.

தமிழ்நாட்டின் ஏழ்மையான வேட்பாளர்

இந்தியத் தேர்தல் ஆணையத்தின் ஆரம்பகட்டத் தரவுகளின்படி, "மிக ஏழ்மையான" வேட்பாளர்களில் பெரும்பாலானோர் தமிழகத்தைச் சேர்ந்த சுயேச்சை வேட்பாளர்களே ஆவர். இவர்களில் பலர் தங்களின் சொத்து மதிப்பு ரூ. 1,000 அல்லது அதற்கும் குறைவாகவே உள்ளதாக அறிவித்துள்ளனர். இருப்பினும், கட்சியின் சார்பாக போட்டியிடும் வேட்பாளர்களில் ஆம்பூர் தொகுதியில் போட்டியிடும் சோசியல் டெமாக்ரடிக் பார்ட்டி ஆஃப் இந்தியா (SDPI) வேட்பாளரான முகமது முபாரக், ரூ. 6 லட்சம் சொத்து மதிப்புள்ளதாக அறிவித்து, மிக ஏழ்மையான வேட்பாளராக உள்ளார்.