திடீர் அதிர்ஷ்டத்தின் மூலம் பணம் யாருக்கு வரும் தெரியுமா - திரிகோண ரகசியங்கள்!

புகழும் பெருமையும் வரும்

ஒருவரின் ஜாதகத்தில் லக்னம் எனப்படும் 1ஆம் வீடு, பூர்வ புண்ணியம் எனப்படும் 5ஆம் வீடு பாக்ய ஸ்தானம் எனப்படும் 9ஆம் வீட்டில் ஆட்சி பெற்ற கிரகங்கள் இருந்தால் அரசு உயர் பதவி சொகுசு வாழ்க்கை அமையும். அதுவே உச்சம் பெற்ற கிரகங்கள் அமர்ந்தால் அரசனுக்கு இணையான வாழ்க்கை அரசியலில் அழியாத புகழ் கிடைக்கும். நட்பு, சமன் என்ற நிலையில் மூன்றிலும் கிரகங்கள் இருந்தால் நல்ல வாய்ப்புகள் தானாக தேடி வரும். முயற்சிக்கு கை மேல் பலன் கிடைக்கும். அதே நேரம் பகை, நீசம் பெற்ற கிரகங்கள் இருந்தால் வாழ்க்கையே போராட்டமாக அமையும். கடின உழைப்பால் மட்டுமே தேவைகளை பூர்த்தி செய்து கொள்ள முடியும்.

உழைப்பாளிகள்

1, 5, 9ஆம் வீடுகளில் சுப கிரகங்கள் இருந்தால் வெற்றிகரமான வாழ்க்கை அமையும். நினைத்ததை சாதிக்க முடியும். இந்த இடங்களில் எந்த கிரகமும் இல்லாமல் இருந்தால் உழைப்பிற்கு உரிய உயர்வு மட்டுமே வரும். லக்னத்தில் மட்டும் கிரகங்கள் இருந்தால் சொந்த உழைப்பில் முன்னேற்றம், நண்பர்கள், மனைவி மூலம் உதவிகள் பெற்று உயர்வு அடைவார்கள்.

அப்பா வழியில் பணம்

பூர்வ புண்ணிய ஸ்தானத்தில் மட்டும் கிரகங்கள் இருந்தால், முன்னோர் சொத்துகள் வாயிலாகவோ தங்களின் குழந்தைகள் மூலமாகவோ, அவர்களின் சுயபுத்தியினாலோ உயர்வு அடைவார்கள். பாக்ய ஸ்தானத்தில் மட்டும் கிரகங்கள் இருந்தால் சேவை செய்வதன் மூலமாகவோ, தந்தை வழியாகவோ, கடின உழைப்பாலோதான் உயர்வு கிடைக்கும்.

எந்த கிரகம் எப்படி பணம் வரும்

1, 5, 9 ஆம் வீடுகளில் சூரியன் நின்று இருந்தால், அரசு வகையிலும், அரசியல், பொதுக் காரியங்கள், விசுவாசமான நபர்கள் மூலம் ஆதாயம் உயர்வு கிடைக்கும். சந்திரன் நின்று இருந்தால், தாய் வழியில் சொத்துகள், பெண்கள் வழியில் வருமானம், தன் சுய உழைப்பாலும் உயர்வு வரும். செவ்வாய் இருந்தால், அரசு வகையில் ஆதாயம், பூமியோகம், முயற்சிக்குத் தகுந்த பலன்கள் கிடைக்கும். புதன் இருந்தால், தொழிலில் வெற்றி கிடைக்கும். கணக்கு, எழுத்து வேலைகள் மூலம் ஆதாயம் வரும்.

முன்னோர் சொத்துக்கள்

1, 5, 9 ஆம் இடங்களில் குரு இருந்தால், கோயில், பொதுச் சேவை, வங்கி மூலம் ஆதாயம், பைனான்ஸ், முன்னோர் சொத்துகள் மூலம் சுகமான வாழ்க்கை அமையும். 1, 5, 9ஆம் இடங்களில் சுக்கிரன் இருந்தால், கலைகளில் வருமானம், புகழ், பெண்கள் மூலம் ஆதாயம், திடீர் லாட்டரி யோகம், எதிர்பாராத அதிர்ஷ்டம், பிறரது பணம் வந்து உயர்வு தரும்.

திடீர் பணவரவு

1, 5 , 9 ஆம் இடங்களில் சனி இருந்தால் வாழ்க்கையே பலவிதமான போராட்டங்கள் நிறைந்ததாக இருக்கும். எதுவும் அவ்வளவு எளிதாக அமையாது. நினைப்பது எதுவும் நடக்காமல் போனாலும், நடப்பது யாவும் நன்மைக்கே அமையும். 1, 5 ,9 ஆம் இடங்களில், ராகு, கேது இருந்தால் திடீரென வாழ்க்கை முன்னேற்றம் அடையும்.