3000 ஆண்டு பழமையான தங்க நகரத்தை கண்டுபிடித்து ஜாக்பாட் அடித்துள்ள எகிப்து... இங்க என்ன கிடைச்சுது தெரியுமா?

தொல்பொருள் ஆராய்ச்சிகள் எப்போதும் கடந்த கால வரலாற்றையும், பண்டைய நாகரிகங்களையும் அவர்களின் கலச்சாரத்தையும் பற்றி புரிந்து கொள்ள உதவுகிறது. சில சமயங்களில் அவை மிகப்பெரிய புதையல்களை கூட கண்டறியும். அந்த வகையில் தொல்பொருள் ஆராய்ச்சியாளர்கள் பண்டைய எகிப்தின் நீண்டகாலமாக மறைந்திருந்த வரலாற்றின் ஒரு பகுதியை மீண்டும் உயிர்ப்பித்துள்ளனர்.

எகிப்தியலாளர்களால் "Lost City of Gold" என்று அழைக்கப்படும் 3,000 ஆண்டுகள் பழமையான தங்கச் சுரங்க வளாகத்தை வெற்றிகரமாக கண்டறிந்துள்ளனர். 2021 இல் கண்டுபிடிக்கப்பட்ட இந்த இடம், பண்டைய எகிப்தியப் பேரரசின் போது பரபரப்பான தொழில்துறை மையமாக இருந்தது, மேலும் பண்டைய தங்கம் பிரித்தெடுக்கும் நுட்பங்கள் மற்றும் பிரித்தெடுக்கும் செயல்பாட்டில் ஈடுபட்டுள்ள சுரங்கத் தொழிலாளர்களின் வாழ்க்கையைப் பற்றிய ஒரு பார்வையை வழங்குகிறது.

Lost City of Gold

செங்கடல் கவர்னரேட்டின் ஆழத்தில், மார்சா ஆலமின் தென்மேற்கே உள்ள ஜபல் சுகாரியில் அமைந்துள்ள 'காணாமல் போன நகரம்', சுமார் நான்கு ஆண்டுகள் அகழ்வாராய்ச்சி மற்றும் மறுசீரமைப்புக்குப் பிறகு இப்போது மீண்டும் உயிர்ப்பிக்கப்பட்டுள்ளது. ஆராய்ச்சியாளர்களின் கூற்றுப்படி, இந்த இடம் கிமு 1000 க்கு முந்தையது மற்றும் தங்கச் சுரங்கம் மற்றும் தங்கத்தை பிரித்தெடுப்பதில் முக்கிய பங்கு வகித்த ஒரு தொழில்துறை மையமாக இருந்தது.

சமீபத்திய ஆண்டுகளில் மிகவும் குறிப்பிடத்தக்க தொல்பொருள் கண்டுபிடிப்புகளில் ஒன்றாக விவரிக்கப்படும் ஜபல் சுகாரி தளம், குவார்ட்ஸ் நரம்புகளிலிருந்து தங்கத்தைப் பிரித்தெடுக்க வடிவமைக்கப்பட்ட கட்டமைப்புகளைக் கொண்டுள்ளது.

அகழ்வாராய்ச்சிகள் இந்த இடத்தில் ஒரு பழங்கால தங்க பதப்படுத்தும் வசதியின் எச்சங்களைக் கண்டுபிடித்தன, அதில் அரைக்கும் மற்றும் நொறுக்கும் நிலையங்கள், வடிகட்டும் படுகைகள் மற்றும் தங்கத்தை உருக்குவதற்குப் பயன்படுத்தப்படும் களிமண் உலைகள் போன்றவை இருந்தன. பண்டைய எகிப்தின் தங்க வர்த்தகத்தில் இந்த இடம் முக்கிய பங்கு வகித்ததற்கு பல ஆதாரங்கள் கிடைத்துள்ளன.

அரிய கலைப்பொருட்கள்

தொழில்துறை வளாகத்தின் எச்சங்களைத் தவிர, தொல்பொருள் ஆராய்ச்சியாளர்கள் பரந்த அளவிலான அரிய கலைப்பொருட்களையும் இங்கு கண்டுபிடித்துள்ளனர், இதில் 628 பொறிக்கப்பட்ட ஆஸ்ட்ராக்காக்கள் இருந்தது, ஹைரோகிளிஃபிக், டெமோடிக் மற்றும் கிரேக்க எழுத்துக்களில் உள்ள மட்பாண்டங்கள் மற்றும் கல் தாங்கிய கல்வெட்டுகள் போன்றவையும் இதில் இருந்தது, அவை சுரங்கத்தின் அன்றாட செயல்பாடுகள் மற்றும் நிர்வாகம் மற்றும் அங்கு பணிபுரியும் தொழிலாளர்கள் மற்றும் அதிகாரிகளின் வாழ்க்கை பற்றிய தகவல்களை வழங்குகின்றன.

டோலமிக் நாணயங்கள்

தொல்பொருள் ஆராய்ச்சியாளர்கள் டோலமிக் காலத்தைச் சேர்ந்த பழங்கால நாணயங்களையும் கண்டுபிடித்தனர், இது எகிப்து இராஜ்ஜியத்தின் சுரங்க நடவடிக்கைகளுக்குப் பிறகு இந்த தளம் நீண்ட காலமாக செயல்பட்டு வந்ததைக் குறிக்கிறது. கூடுதலாக, கிரேக்க-ரோமன் காலத்தைச் சேர்ந்த மனித மற்றும் விலங்கு டெரகோட்டா சிலைகளும் அகழ்வாராய்ச்சியின் போது கண்டுபிடிக்கப்பட்டன.

சுற்றுலாத்தளம்

இந்த 'இழந்த தங்க நகரம்' எகிப்தின் பிரமிடுகளைப் போல ஒரு முக்கிய சுற்றுலா தலமாக மாறும் ஆற்றலைக் கொண்டுள்ளது, மேலும் எகிப்திய அரசாங்கம் சுரங்கத்திலிருந்து சுமார் மூன்று கிலோமீட்டர் வடக்கே ஒரு புதிய பார்வையாளர் தளத்தை அமைத்துள்ளது, இது அகழ்வாராய்ச்சி செயல்முறை மற்றும் கண்டுபிடிப்பைக் காண்பிக்கும் பெரிய காட்சித் திரைகளைக் கொண்டுள்ளது, பார்வையாளர்களுக்கு தளத்தின் ரகசியங்களை வெளிக்கொணரப் பயன்படுத்தப்படும் அறிவியல் முறைகள் பற்றிய விரிவான பார்வையை இவை வழங்குகிறது.