இந்தியாவின் முக்கிய அரசியல்வாதி விமான விபத்தில் திடீர் மரணம்: இந்த துயர சம்பவம் எப்படி நடந்தது?

இன்று இந்தியா முழுவதும் பரபரப்பான செய்தியாக இருப்பது மகாராஷ்டிரா துணை முதல்வரின் மரணச் செய்திதான். புனே மாவட்டத்தின் பாராமதி நகரில் இன்று காலை ஒரு விமானம் விபத்துக்குள்ளானதில், மகாராஷ்டிர துணை முதல்வர் மற்றும் தேசியவாத காங்கிரஸ் கட்சியின் தலைவர் அஜித் பவார் உட்பட அதில் பயணம் செய்த ஐந்து பேரும் உயிரிழந்தனர். Directorate General of Civil Aviation (DGCA) தகவல்படி, விஎஸ்ஆர் நிறுவனத்திற்குச் சொந்தமான லியர்ஜெட் 45 என்ற அந்த விமானம், காலை 8.45 மணியளவில் அவசரமாகத் தரையிறங்க முயன்றபோது விபத்துக்குள்ளானது.

அஜித் பவாருடன், அவருடைய தனிப்பட்ட பாதுகாப்பு அதிகாரி மற்றும் ஒரு உதவியாளர் ஆகிய இரண்டு பணியாளர்கள் மற்றும் தலைமை விமானி, முதல் அதிகாரி உட்பட இரண்டு விமானப் பணியாளர்கள் என மொத்தம் ஐந்து பேர் அந்த விமானத்தில் பயணம் செய்தனர். முதல்கட்ட தகவல்களின்படி, இந்த விபத்தில் விமானத்தில் இருந்த எவரும் உயிர் பிழைக்கவில்லை. பிரதமர் நரேந்திர மோடியும், மத்திய உள்துறை அமைச்சர் அமித் ஷாவும் இந்த துயரச் சம்பவம் குறித்து தகவல்களைப் பெறுவதற்காக மகாராஷ்டிர முதல்வர் தேவேந்திர ஃபட்னவிஸைத் தொடர்பு கொண்டதாக மாநில அரசு தெரிவித்துள்ளது. மகாராஷ்டிராவில் உள்ள பல்வேறு அரசியல் கட்சிகளைச் சேர்ந்த முக்கியத் தலைவர்கள் பவார் இல்லத்தில் கூடத் தொடங்கியுள்ளனர்.

ஜில்லா பரிஷத் தேர்தல்களுக்கான பொதுக்கூட்டத்தில் கலந்துகொள்வதற்காக பவார் பாராமதிக்குச் சென்று கொண்டிருந்தார்.செவ்வாயன்று மும்பையில் இருந்த பவார், முதலமைச்சர் தேவேந்திர ஃபட்னாவிஸ் தலைமையில் நடைபெற்ற மகாராஷ்டிர அமைச்சரவையின் உள்கட்டமைப்பு தொடர்பான குழுக் கூட்டத்தில் கலந்துகொண்டார்.

சம்பவத்தை நேரில் பார்த்தவர்கள் சொல்வது என்ன?

சம்பவ இடத்தில் இருந்த ஒரு உள்ளூர் கிராமவாசி, விமானம் விபத்துக்குள்ளான பிறகு வெடித்ததாகக் கூறினார். இதுபற்றி அவர் கூறியதாவது"நான் என் கண்ணால் பார்த்தேன். இது மிகவும் வேதனையாக இருக்கிறது. விமானம் கீழே இறங்கியபோது, ​​அது விபத்துக்குள்ளாகும் என்று தோன்றியது, அது போலவே நடந்தது. பின்னர் அது வெடித்தது. அதன் பிறகு, நாங்கள் அங்கே விரைந்து சென்று பார்த்தபோது, ​​​​விமானம் தீப்பிடித்து எரிந்து கொண்டிருந்தது. விமானத்தில் மேலும் நான்கைந்து வெடிப்புகள் ஏற்பட்டன. மேலும் பலர் வந்தனர், அவர்கள் பயணிகளை வெளியே இழுக்க முயன்றனர், ஆனால் பெரும் தீ காரணமாக அவர்களால் உதவ முடியவில்லை. அஜித் பவார் விமானத்தில் இருந்தார், இது எங்களுக்கு மிகவும் வேதனையானது. இதை வார்த்தைகளால் விவரிக்க முடியாது," என்று அவர் கூறினார்.

தலைவர்களின் இரங்கல்

மத்திய பாதுகாப்புத் துறை அமைச்சர் ராஜ்நாத் சிங், மகாராஷ்டிர துணை முதலமைச்சர் அஜித் பவாரின் மறைவுக்கு ஆழ்ந்த இரங்கல் தெரிவித்தார். அவரது அகால மரணத்தால் தாம் "ஆழ்ந்த அதிர்ச்சியும் வேதனையும்" அடைந்ததாகக் கூறினார். தனது இரங்கல் செய்தியில், அஜித் பவார் தனது நீண்ட பொது வாழ்வில் மகாராஷ்டிராவின் வளர்ச்சி மற்றும் செழிப்புக்கு உறுதியுடன் பாடுபட்டார் என்றும், மக்களிடம் அவர் காட்டிய கருணை மற்றும் பொது சேவைக்கான அசைக்க முடியாத அர்ப்பணிப்புக்காக பரவலாக அறியப்பட்டவர் என்றும் சிங் கூறினார்.

சிவசேனா கட்சியின் எம்.பி. பிரியங்கா சதுர்வேதி ஏஎன்ஐ செய்தி நிறுவனத்திடம் கூறுகையில், "இது மிகவும் அதிர்ச்சியளிக்கும், வேதனையான மற்றும் மனதை உருக வைக்கும் ஒரு நிகழ்வு. எங்களுக்கிடையே கருத்து வேறுபாடுகள் இருந்தன, ஆனால் நாங்கள் ஒன்றாகப் பணியாற்றியுள்ளோம். அவர் தனது பணியில் மிகுந்த அர்ப்பணிப்புடன் இருந்த ஒரு மனிதர். பவார் சாஹிப், சுப்ரியா ஜி, சுனேத்ரா ஜி, பார்த்த் மற்றும் ஜே ஆகியோருக்கு எனது இரங்கலைத் தெரிவித்துக் கொள்கிறேன். மேலும், பாராமதியில் உள்ள லட்சக்கணக்கான மக்களுக்கும் எனது இரங்கலைத் தெரிவித்துக் கொள்கிறேன்... இப்படி அவர் பிரிந்து சென்றது மிகவும் வேதனையாக இருக்கிறது," என்றார்.

சிவசேனா (உத்தவ் பாலாசாகேப் தாக்கரே) கட்சியின் எம்.பி. அரவிந்த் சாவந்தும் துணை முதல்வரின் மறைவுக்கு இரங்கல் தெரிவித்தார். அவர் கூறுகையில், "அவர் சொன்னதை நான் எப்போதும் செய்தேன். அவர் ஒரு துணிச்சலான மனிதர். பாராமதி பிராந்தியத்தின் வளர்ச்சியில் அவருக்கு ஒரு பெரிய பங்கு உண்டு. ஒட்டுமொத்த பவார் குடும்பத்திற்கும் எனது இரங்கலைத் தெரிவித்துக் கொள்கிறேன்," என்றார்.

மத்திய அமைச்சர் கிரிராஜ் சிங் கூறுகையில், "இது உண்மையிலேயே ஒரு துரதிர்ஷ்டவசமான சம்பவம். அஜித் பவாரும் அந்த ஹெலிகாப்டரில் இருந்ததாக தகவல்கள் வருகின்றன. அது உண்மையாக இருந்தால், இது மிகவும் துரதிர்ஷ்டவசமான நாள். இது மனதை உருக வைக்கும் ஒரு சம்பவம். பாதிக்கப்பட்ட குடும்பங்களுக்கு இறைவன் மன வலிமையைத் தரட்டும். அவர் மகாராஷ்டிராவின் துணை முதல்வர் மட்டுமல்ல, நாட்டின் நன்கு அறியப்பட்ட அரசியல்வாதியும் ஆவார்." என்று கூறியுள்ளார்.

அஜித் பவாரின் அரசியல் வாழ்க்கை

ஒரு அரசியல் குடும்பத்தில் பிறந்த அஜித் பவார், சுனேத்ரா பவார் என்பவரை மணந்தார். அவருக்கு ஜெய் மற்றும் பார்த் பவார் என்ற இரண்டு மகன்கள் உள்ளனர். அவர் தனது அரசியல் பயணத்தை 1982-ல் ஒரு கூட்டுறவு சர்க்கரை ஆலையின் நிர்வாகக் குழுவிற்குத் தேர்ந்தெடுக்கப்பட்டதன் மூலம் தொடங்கினார். 1991-ல், அவர் புனே மாவட்ட மத்திய கூட்டுறவு வங்கியின் தலைவரானார், இதன் மூலம் உள்ளூர் அரசியலில் தனது செல்வாக்கை உறுதிப்படுத்தினார்.

அஜித் பவார் முதன்முதலில் 1991-ல் பாராமதி தொகுதியில் இருந்து மக்களவைக்குத் தேர்ந்தெடுக்கப்பட்டார், ஆனால் பின்னர் அவரது மாமா சரத் பவாருக்காக அந்தப் பதவியை விட்டுக்கொடுத்தார். அவர் பாராமதி தொகுதியில் இருந்து ஏழு முறை மகாராஷ்டிர சட்டமன்றத்திற்குத் தேர்ந்தெடுக்கப்பட்டார், 1991 இடைத்தேர்தலிலும், அதைத் தொடர்ந்து 1995, 1999, 2004, 2009 மற்றும் 2014 தேர்தல்களிலும் வெற்றி பெற்றார். நவம்பர் 2019-ல், அவர் தேசியவாத காங்கிரஸ் கட்சிக்குள்ஏற்பட்ட பிளவில் முக்கியப் பங்கு வகித்து, பாரதிய ஜனதா கட்சி தலைமையிலான அரசாங்கத்தில் இணைந்தார், மீண்டும் துணை முதலமைச்சர் பதவியை ஏற்றுக்கொண்டார்.

பிப்ரவரி 2024-ல், தேர்தல் ஆணையம் அவரது பிரிவை அதிகாரப்பூர்வ NCP-யாக அங்கீகரித்து, கட்சிப் பெயரையும் சின்னத்தையும் அவருக்கு வழங்கியது. அஜித் பவாரின் அரசியல் வாழ்க்கை நான்கு தசாப்தங்களுக்கும் மேலாக வெற்றிகரமாக நீடித்தது, குறிப்பாக பாராமதி பிராந்தியத்தில் மகாராஷ்டிராவின் வளர்ச்சிக்கு சிறப்பான பங்களிப்பைச் செய்தார்.