உடலில் புற்றுநோய் செல்கள் வளர்ந்து கொண்டிருப்பதை உணர்த்தும் சில எச்சரிக்கை அறிகுறிகள்!

சருமத்திற்கு அடியில் கட்டிகள்

உங்கள் உடலில் எங்கேனும் திடீரென்று சருமத்திற்கு அடியில் கட்டிகள் உருவானால், அது புற்றுநோயைக் குறிக்கும். ஆனால் அப்படி உருவான கட்டிகளைத் தொடும் போது நீங்கள் எவ்வித வலியும் தெரியாமல் இருந்தால், அது வேறு ஏதாவது ஒரு காரணத்தினால் இருக்கலாம். ஆனாலும், இம்மாதிரி திடீரென்று கட்டிகள் தென்பட்டால், உடனே மருத்துவரை அணுகி பரிசோதனை செய்து கொள்வதே புத்திசாலித்தனம். குறிப்பாக ஒருவர் தங்கள் உடலின் ஒருசில பகுதிகளை அவ்வப்போது சோதிக்க வேண்டும். அவை மார்பகம், விரைவிதைகள், அக்குள், தொண்டை, அடிவயிறு போன்றவை. ஏனெனில் இந்த பகுதிகளில் அசாதாரண கட்டிகள் உருவாகினால் சிறிதும் தாமதிக்காமல் மருத்துவரை அணுகுங்கள்.

சரும அரிப்பு

நமது உடலின் நோயெதிர்ப்பு மண்டலமானது புற்றுநோயை ஒரு பாக்டீரியா ஆக்கிரமிப்பது போல் நடத்துகிறது. இதன் விளைவாக இரத்த வெள்ளையணுக்கள் புற்றுநோய் செல்கள் உள்ள பகுதிக்கு அழிப்பதற்கான அனுப்பப்படுகின்றன. இதனால் அப்பகுதியில் இரத்த ஓட்டம் அதிகரித்து, அப்பகுதி வெதுவெதுப்பாகவும், சிவந்தும், நிறமாற்றத்துடனும், ஒருவித இறுக்கம் அல்லது அரிப்பு உணர்வையும் ஏற்படுத்துகிறது. எனவே உங்களுக்கு காரணமின்றி திடீரென்று ஒரு பகுதியில் தீவிரமான அரிப்பு ஏற்பட்டால், உடனே மருத்துவ உதவியை நாடுங்கள்.

ஆறாத காயங்கள்

சருமத்தில் எங்கேனும் காயங்கள் அல்லது வெட்டு காயங்கள் ஏற்பட்டால், அது குணமடைய நீண்ட காலம் எடுக்கும். ஆனால் அந்த காயத்தில் எவ்வித முன்னேற்றமும் இல்லாமல் இருந்தால், அது உடனே கவனிக்க வேண்டிய அறிகுறியாக இருக்கலாம். ஏனெனில் இதுவும் ஒரு புற்றுநோய்க்கான ஆரம்ப அறிகுறி. ஏனெனில் நோயெதிர்ப்பு மண்டலம் உடலைத் தாக்கிய புற்றுநோய் செல்களை அழிப்பதற்கு முன்னுரிமை அளித்து, சிறு காயத்தை குணமாக்க முயற்சிக்காமல் இருக்கிறது. ஆகவே உங்களுக்கு இம்மாதிரியான பிரச்சனை இருந்தால், மருத்துவரை உடனே அணுகுங்கள்.

நாக்கு அல்லது வாயினுள் புடைப்புகள்

உங்கள் வாயின் உள்ளே ஏதேனும் கட்டிகள் இருந்தால், குறிப்பாக ஈறுகள் அல்லது தொண்டையில் வெள்ளை நிறத்தில் ஏதேனும் புடைப்புகள் இருந்தால், உடனே கவனிக்க வேண்டும். ஏனெனில் இதுவும் புற்றுநோயின் ஆரம்ப அறிகுறிகளுள் ஒன்றாகும்.

பசியின்மை அல்லது உணவை விழுங்குவதில் சிரமம்

உங்கள் செரிமான அமைப்பில் ஏதேனும் மாற்றங்கள் அல்லது எவ்விதமான இடையூறும் ஏற்பட்டால், அது கவலைக்குரிய ஒன்று. ஏனெனில் இச்செயலால் ஊட்டச்சத்தைப் பெறுவதற்கான உடலின் திறன் பாதிக்கப்படுகிறது மற்றும் குணப்படுத்தும் செயல்முறையும் தடைப்படுகிறது. எனவே நீங்கள் திடீரென்று விவரிக்க முடியாத பசியின்மையை உணர்ந்தால், அதுக்குறித்து உடனே மருத்துவரிடம் பேசுங்கள்.

குடலியக்கத்தில் மாற்றம்

இரண்டு நாட்களுக்கு மேல் உடல் கழிவுகள் வெளியேற்றப்படாமல் இருந்தால், அது கவலைக்குரிய ஒன்றாக இருக்க வேண்டும். அதுவும் மலத்தில் இரத்தம் இருப்பதைக் கண்டால், மலத்தின் நிறத்தில் மாற்றங்களைக் கவனித்தால், அதாவது மலம் கருமையாகவோ அல்லது வெளிரிய நிறத்திலோ தோற்றமளிக்கும். மேலும் மலம் கழிக்கும் போது கடுமையான வலியை அனுபவிக்க்கூடும், மலச்சிக்கல், வயிற்றுப்போக்கு அல்லது மலத்தில் சளியைக் கண்டால், உடனே மருத்துவரை அணுகி பரிசோதனை செய்யுங்கள். ஏனென்றால் இந்த அறிகுறிகள் அனைத்தும் குடல் புற்றுநோயைக் குறிக்கிறது.

சிறுநீர் கழிப்பதில் மாற்றம்

உங்கள் குடல் இயக்கத்தைப் போன்றே, சிறுநீர்ப்பை செயல்பாட்டிலும் அசாதாரணமான மாற்றங்களை கவனித்தால், அதுவும் கவலைக்குரிய அறிகுறிகளில் ஒன்றாகும். அதுவும் கழிக்கும் சிறுநீரின் அளவு, நிறம்,வாசனை அல்லது ஏதேனும் குறிப்பிடத்தக்க மாற்றங்கள் இருந்தால், உடனே மருத்துவரிடம் கூறி உங்களுக்கு புற்றுநோய் இருக்கிறதா என்பதை சோதித்துக் கொள்ளுங்கள்.

விவரிக்கப்படாத இரத்தப்போக்கு

மாதவிடாய் காலத்தை தவிர பிற நாட்களில் விவரிக்கமுடியாத அளவில் இரத்தப்போக்கு ஏற்பட்டால், உடனே மருத்துவரை அணுகி அவரிடம் கூறி சோதிக்க வேண்டும். ஏனெனில் புற்றுநோய் இருந்தால், இம்மாதிரியான அறிகுறிகளை சந்திக்க நேரிடும்.

குரல் மாற்றம்

உங்கள் குரலில் மாற்றம் ஏற்பட்டிருந்தால், அது தொண்டையில் ஏற்பட்டுள்ள தொற்று அல்லது தொண்டை புண்ணால் மட்டும் தான் ஏற்பட்டிருக்க வேண்டும் என்பதில்லை, குரல்வளையில் புற்றுநோய் ஏற்பட்டிருந்தாலும் இம்மாதிரியான மாற்றம் ஏற்படலாம். எனவே கவனமாக இருங்கள்.

தொடர்ச்சியான இருமல்

இருமல் பல காரணங்களுக்காக ஒருவருக்கு ஏற்படலாம். ஆனால் நீங்கள் நீண்ட காலமாக தொடர்ச்சியான இருமலை சந்தித்தால், உங்கள் நுரையீரல், உணவுக்குழாய், தொண்டை அல்லது வயிற்றில் புற்றுநோய் செல்கள் இருக்க வாய்ப்புள்ளது. எனவே இருமலை சாதாரணமாக நினைத்து விடாதீர்கள்.