உங்களுக்கு உயர் இரத்த அழுத்தம் இருக்கா? அப்ப இந்த டீயை தினமும் குடிங்க.. பிபி கண்ட்ரோலா இருக்கும்..

க்ரீன் டீ

உடல் எடையைக் குறைப்பது முதல் பல ஆரோக்கிய பிரச்சனைகளை நிர்வகிப்பது வரை, பல நன்மைகளை உள்ளடக்கிய ஒரு ஆரோக்கியமான டீ தான் க்ரீன் டீ. ஆய்வுகளில் க்ரீன் டீயை குடிப்பது, உடலில் இரத்த ஓட்டத்தை மேம்படுத்துவதோடு, இதய திசுக்களில் ஏற்படும் அழற்சியின் அபாயத்தைக் குறைக்க உதவுவது தெரிய வந்துள்ளது. மேலும் க்ரீன் டீயில் இதய ஆரோக்கியத்திற்கு நன்மை விளைவிக்கும் ஆன்டிஆக்ஸிடன்ட்டுகள் அதிகம் உள்ளன. எனவே பிபி நோயாளிகள், ஒரு நாளைக்கு 1-2 கப் க்ரீன் டீயை குடித்து வந்தால், பிபியை கட்டுப்பாட்டில் வைத்துக் கொள்ளலாம்.

செம்பருத்தி டீ

இந்தியாவின் பெரும்பாலான வீடுகளில் உள்ள ஒரு பூச்செடி தான் செம்பருத்தி. இந்த செம்பருத்தி பூவில் ஏராளமான நன்மை விளைவிக்கும் பண்புகள் உள்ளன. குறிப்பாக இரத்த அழுத்தத்தை நிர்வகிக்க செம்பருத்தி டீ பெரிதும் உதவி புரிகிறது. செம்பருத்தி டீயை குடித்து வந்தால், அதில் உள்ள ஆன்டி-ஆக்ஸிடன்ட்டுகள் இதயத்தின் ஆரோக்கியத்தை மேம்படுத்துகின்றன. இருப்பினும், இந்த செம்பருத்தி டீயை உயர் இரத்த அழுத்த நோயாளிகள் குடிக்கும் முன், மருத்துவரிடம் கேடுக் கொள்ள வேண்டும்.

ஊலாங் டீ

உயர் இரத்த அழுத்த நோயாளிகளுக்கு நன்மை விளைவிக்கும் மற்றொரு அற்புதமான மற்றும் ஆரோக்கியமான டீ தான் ஊலாங் டீ. இந்த டீயில் உள்ள மருத்துவ பண்புகள், இரத்த அழுத்தத்தைக் கட்டுப்படுத்த உதவுகின்றன. முக்கியமாக இதில் உள்ள அதிகப்படியான ஆன்டி-ஆக்ஸிடன்ட்டுகள் இதய ஆரோக்கியத்தை மேம்படுத்தி பாதுகாக்கின்றன.

சீமைச்சாமந்தி டீ

சீமைச்சாமந்தி டீ தற்போது ஏராளமான மக்களால் குடிக்கப்பட்டு வரும் மற்றொரு அற்புதமான டீயாகும். இந்த டீ உயர் இரத்த அழுத்தத்தை நிர்வகிக்கும் பண்புகளைக் கொண்டுள்ளன. ஆய்வுகளிலும் சீமைச்சாமந்தி டீ உயர் இரத்த அழுத்தத்தைக் குறைக்க உதவுவது தெரிய வந்துள்ளது. செம்பருத்தி டீயைப் போன்றே, சீமைச்சாமந்தி டீயும் ரத்த நாளங்களை ரிலாக்ஸடைய செய்து, இரத்த ஓட்டத்தை சீராக்குகிறது. மேலும் இந்த டீயை தினமும் குடித்து வந்தால், இரவு நல்ல நிம்மதியான தூக்கத்தைப் பெறலாம். ஒருவர் நல்ல நிம்மதியான தூக்கத்தைப் பெற்றால், அதுவே இரத்த அழுத்தம் அதிகரிப்பதை தடுக்கும்.

ப்ளாக் டீ

பால் டீயை விரும்பாத பலரும் தினமும் குடித்து வரும் ஒரு டீ தான் ப்ளாக் டீ. இந்த ப்ளாக் டீ ஏராளமான நன்மைகளைக் கொண்டுள்ளன. அதில் ஒன்று தான் உயர் இரத்த அழுத்தத்தைக் குறைப்பது. ஆய்வுகளில் கூட, ஒரு நாளைக்கு 3 கப் ப்ளாக் டீ குடித்து வந்த உயர் இரத்த அழுத்த நோயாளிகளின் இரத்த அழுத்த அளவானது 2-3 புள்ளிகள் குறைந்திருப்பது தெரிய வந்துள்ளது. எனவே நீங்கள் டீ பிரியராக இருந்தால், இரத்த அழுத்தத்தைக் கட்டுப்பாட்டில் வைத்துக் கொள்ள, ப்ளாக் டீயை தினமும் குடித்து வாருங்கள்.