சில தவறான அழகுக்குறிப்புகள் பற்றிய உண்மைகள்!!!

ஒரு நரை முடியைப் பிடுங்கினால் அதிகம் நரை விழும்!

இருப்பதிலேயே அபத்தமான நம்பிக்கை இதுதான். ஒரே ஒரு நரை முடி தனித்து இருப்பதை பிடுங்கக்கூடாது என்பதும், பிடுங்கினால் பல புதிய நரைகள் தோன்றும் என்பதும். அறிவியல்பூர்வமாக இது ஒரு தவறான கருத்தாகும். நமது தலையின் சரும பகுதியில் குறிப்பிடத்தக்க எண்ணிக்கையில் தான் ஃபோலிக்கிள் எனப்படும் ரோம வேர்கள் உள்ளன. நீங்கள் நரை முடியை பிடுங்குவதால் புதிய நரை தோன்றப் போவதில்லை. எது எப்படி இருப்பினும், வயதால் அல்லது பரம்பரையால் முடியானது தானாக நரைக்கவே செய்யும்.

ரேசர் மூலம் முடியை நீக்கினால் அது தடிமனாக முளைக்கும்!

ஒரு முடியின் தடிமன் என்பது தோலுக்கு அடியில் உள்ள ஃபோலிக்கிள் முனையிலேயே தீர்மானிக்கப்படுகிறது. ரேசர் அந்த ஆழம் வரை செல்ல முடியாது என்பதால் முடியின் தடிமனில் மாற்றம் நிகழ்வதில்லை. இருப்பினும் ஷேவிங்கின் போது முடி சாய்வாக வெட்டப்படுவதால், ஷேவ் செய்து சில நாட்கள் கழித்து காணப்படும் புதிய முடி தடிமனாக இருப்பது போல் காட்சியளிக்கிறது. இது ஒரு மாயை அன்றி வேறில்லை.

எண்ணெய் பசை சருமத்திற்கு மாய்ச்சுரைசர் தேவையில்லை

பொதுவாக எண்ணெய்ச் சுரப்பிகளானது சருமம் மற்றும் ரோமங்களை மிருதுவாகவும், ஆரோக்கியமாகவும் வைக்க உதவுகின்றன. ஆனாலும் சில சமயம் இந்த எண்ணெய் சுரப்பிகள் சருமத் துவாரங்களில் அடைத்து கொண்டு விடலாம். இந்த அடைப்புகளை மாய்ச்சுரைசர் மூலம் தான் நீக்க முடியும். மேலும் தற்போது இதற்கென எண்ணெய் இல்லாத மாய்ச்சுரைசர் வகைகள் கிடைக்கின்றன.

டூ இன் ஒன் ஷாம்பு - கண்டிஷனர் தயாரிப்புகள்

ஷாம்புவின் வேலை வேறு, கண்டிஷனரின் வேலை வேறு. முதலாவது முடியை கழுவப் பயன்படுவது, இரண்டாவது முடியை மென்மையாக்க பயன்படுவது. இவை இரண்டையுமே ஒரே திரவமாக தர முடியாது. எனவே டூ இன் ஒன் ஷாம்பு - கண்டிஷனர் தயாரிப்புகள் அனைத்துமே மார்க்கெட்டிங் உத்திகள் தான் என்று கூறலாம். மேலும் ஷாம்பு மற்றும் கண்டிஷனரை தனித்தனியாக பயன்படுத்துவது மட்டுமே உரிய பலனை கொடுக்கும்.

மீன் உணவோடு பால் பொருட்களை சாப்பிட்டால் சருமத்தில் வெண்படலங்கள் தோன்றும்!

சருமத்தில் உள்ள மெலனின் எனும் நிறமி செல்கள் அழிவதால் தான் வெண்படலங்கள் தோன்றுகின்றன. இந்த குறைபாட்டுக்கு ‘விடிலிகோ' என்று பெயர். இதற்கும் மீன் உணவை பால் உணவுப்பொருட்களுடன் சேர்த்து சாப்பிடுவதற்கும் எந்த சம்பந்தமுமில்லை.