அல்சைமர் நோயால் பாதிக்கப்பட்ட பெற்றோர்களை ஆதரிக்க சில வழிகள்!!!

அன்பு

நீங்கள் குழந்தையாக இருக்கும் போது உங்களுக்கு இந்த அன்பு அதிகம் தேவைப்பட்டிருக்கும். அந்த நேரங்களில் உங்கள் பெற்றோர்கள் அவர்கள் உங்கள் மீது வைத்திருக்கும் அன்பை ஒவ்வொரு நிமிடமும் உங்களுக்கு அளித்திருப்பார்கள். இதனை கவனத்தில் கொண்டு அல்சைமர் நோயால் பாதிக்கப்பட்ட பெற்றோர்களை சுமையாக பார்க்காமல் உங்கள் அன்பின் மூலமாக ஆதரிக்க வேண்டும். உங்கள் அன்பு மட்டுமே அவர்களை அமைதிப்படுத்தி கடினமான நேரங்களில் சந்தோஷத்தை அளிக்கும்.

பொறுமை

அல்சைமர் நோயால் பாதிக்கப்பட்ட பெற்றோர்களை ஆதரிக்க உங்களுக்கு வேண்டியது பொறுமை மட்டுமே. பொறுமை மிகவும் அவசியமான ஒன்றாகும். சில நேரங்களில் அவர்களிடம் நீங்கள் கோபம் கொள்ள நேரிடும். அவர்களின் ஞாபக மறதி மற்றும் குழந்தைத்தனமான காரியங்கள் உங்களுக்கு எரிச்சலூட்டச் செய்யும். ஆனால், அவர்களிடம் அதை காண்பிக்ககூடாது. சில நேரங்களில் அவர்களுக்கு உங்களை அடையாளம் தெரியாமல் போகக்கூட நேரிடும். அதனால், நீங்கள் பொறுமையை கடைப்பிடித்து உங்கள் அன்பாலும் ஆதரவாலும் அவர்களை கையாள வேண்டும்.

வலிமையான இதயம்

அல்சைமர் நோயால் பாதிக்கப்பட்டவர்களை பார்த்துக்கொள்ளுவது என்பது எளிதான காரியம் அல்ல. சில கடினமான நேரங்களில் அவர்களுக்கு கோபம் ஏற்படக்கூடும், மனநிலைகளில் மாற்றங்கள் ஏற்படக்கூடும், உங்கள் பற்றி எதுவுமே ஞாபகத்தில் இல்லாமல் போய்விடக்கூடும். மேலும் சில நேரங்களில் முரட்டுத்தனமான நடந்துகொள்ள நேரிடும். இந்த சந்தர்ப்பங்களை சந்திக்க உங்களுக்கு வலிமையான இதயமும் எதார்த்தமான மனமும் வேண்டும்.உங்கள் பெற்றோரை இந்த நிலையில் பார்ப்பதற்கு மிகவும் கடினமாகத் தானிருக்கும். ஆனால், இந்த வாழ்க்கையை நீங்கள் வாழ்ந்துதான் ஆக வேண்டும்.

அவர்களோடு இருக்க வேண்டும்

உங்கள் பெற்றோர்களை பார்த்து கொள்ள நர்ஸ் இருந்தாலும் நீங்கள் உங்கள் பெற்றோருடன் இருக்கும் தருணங்களை தவற விடக்கூடாது. அவர்களை சென்று பார்ப்பதை வழக்கப்படுத்திக் கொள்ள வேண்டும். அவர்களின் ஞாபகங்களுக்கு நீங்கள் மட்டும் தான் சொத்து. நீங்கள் அவர்களோடு இருக்கவிட்டால் உங்கள் பற்றிய ஞாபகங்கள் நாளடைவில் மறந்து போய்விடும்.

சந்தோஷமாக வைத்திருக்க வேண்டும்

நீங்கள் எப்பொழும் போல அவர்களோடு பேசிக்கொண்டு இருக்க வேண்டும். அவர்கள் உங்கள் மறந்து போய்விட்டாலும் நீங்கள் அவர்களை பார்த்து புன்னகை செய்ய வேண்டும். அவர்களுக்கு பிடித்தமான பூக்கள் மற்றும் சாக்லேட்கள் போன்றவற்றை வாங்கித் தர வேண்டும். அவர்களை சந்தோஷமாக வைப்பதன் மூலமாக மீதி இருக்கும் சில வருடங்களில் சந்தோஷமாக இருக்கச் செய்யுங்கள்.