உளுத்தம் பருப்பு சட்னி

உளுத்தம் பருப்பில் எண்ணற்ற நன்மைகள் உள்ளன. அதிலும் பெண்கள் உளுத்தம் பருப்பை சாப்பிடுவது மிகவும் நல்லது. உளுத்தம் பருப்பு சட்னி ஒரு பாரம்பரிய உணவுப்பொருள். இன்னும் கிராமங்களில் உள்ள அனைத்து வீடுகளிலும் செய்து சாப்பிடப்படும் ஒரு ஆரோக்கியமான ரெசிபி.

நீங்களும் உடலை ஆரோக்கியமாக வைத்துக் கொள்ள நினைத்தால், உளுத்தம் பருப்பு சட்னியை செய்து சாப்பிடுங்கள். மேலும் இது புளிப்பு, காரம், உவர்ப்பு மற்றும் இனிப்பு கலந்து இருப்பதால், இது தோசை, இட்லி, சப்பாத்திக்கு சூப்பராக இருக்கும். சரி, இப்போது அந்த ரெசிபியைப் பார்ப்போமா!!!

தேவையான பொருட்கள்:

உளுத்தம் பருப்பு - 1/2 கப்
வரமிளகாய் - 10
புளி - நெல்லிக்காய் அளவு
வெல்லம் - 1 எலுமிச்சை அளவு
பெருங்காயத் தூள் - 1 சிட்டிகை
உப்பு - தேவையான அளவு
எண்ணெய் - 2 டீஸ்பூன்

செய்முறை:

முதலில் ஒரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், வரமிளகாய், புளி, உளுத்தம் பருப்பு, பெருங்காயத் தூள் ஆகியவற்றை ஒவ்வொன்றாக போட்டு, நன்கு வதக்க வேண்டும்.

பின்னர் அதனை இறக்கி குளிர வைத்து, பின் மிக்ஸியில் போட்டு, உப்பு சேர்த்து மென்மையாக அரைத்து, பின் அதில் வெல்லத்தைப் போட்டு அரைத்தால், சுவையான உளுந்து சட்னி ரெடி!!! இந்த சட்னியானது தோசை, இட்லி மற்றும் சப்பாத்திக்கு சூப்பராக இருக்கும்.