சுவையான பன்னீர் வெஜிடேபிள் குருமா

பன்னீர் பிரியர்களுக்காக ஒரு அருமையான பன்னீர் ரெசிபியை தமிழ் போல்ட் ஸ்கை பகிர்ந்துள்ளது. இந்த ரெசிபியானது மிகவும் ஆரோக்கியமானது மற்றும் எளிதில் செய்யக்கூடியது. ஏனெனில் இந்த ரெசிபியில் பல்வேறு காய்கறிகளை சேர்த்து செய்கிறோம்.

அதிலும் இந்த ரெசிபி சப்பாத்திக்கும் அருமையாக இருக்கும். இப்போது அந்த பன்னீர் வெஜிடேபிள் குருமாவை எப்படி செய்வதென்று பார்ப்போமா!!!

தேவையான பொருட்கள்:

காலிஃப்ளவர் - 1 (துண்டுகளாக்கப்பட்டது)
குடைமிளகாய் - 1 (சிறியது, நறுக்கியது)
பீன்ஸ் - 8-10 (பொடியாக நறுக்கியது)
கேரட் - 2 (பொடியாக நறுக்கியது)
பச்சை பட்டாணி - 1/2 கப்
உருளைக்கிழங்கு - 2 (சிறியது, நறுக்கியது)
பன்னீர் - 250 கிராம் (துண்டுகளாக்கப்பட்டது)
காளான் - 8 (நறுக்கியது)
முந்திரி - 1/2 கப்
வெங்காய பேஸ்ட் - 2 டேபிள் ஸ்பூன்
இஞ்சி - 1 துண்டு (துருவியது)
பூண்டு பேஸ்ட் - 1 டேபிள் ஸ்பூன்
தயிர் - 1/2 கப்
மிளகு தூள் - 1 டீஸ்பூன்
கரம் மசாலா - 1 டீஸ்பூன்
பட்டை - 1
பச்சை ஏலக்காய் - 3
கிராம்பு - 4
உப்பு - தேவையான அளவு
எண்ணெய் - 2 டேபிள் ஸ்பூன்
தண்ணீர் - 3 1/2 கப்
பிரஷ் க்ரீம் - 1 டேபிள் ஸ்பூன் (அலங்கரிக்க)

செய்முறை:

முதலில் முந்திரியை வெதுவெதுப்பான நீரில் 10 நிமிடம் ஊற வைத்துக் கொள்ள வேண்டும்.

பின்னர் அதனை மிக்ஸியில் போட்டு கெட்டியாக அரைத்துக் கொள்ள வேண்டும்.

பிறகு ஒரு பாத்திரத்தில் 3 கப் தண்ணீர் ஊற்றி, காய்கறிகள் அனைத்தையும் போட்டு, 10 நிமிடம் மிதமான தீயில் வேக வைத்து இறக்கி, பின் நீரை வடித்து, குளிர்ந்த நீரில் ஒருமுறை அலசிக் கொள்ள வேண்டும்.

பின்பு ஒரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், பட்டை, கிராம்பு மற்றும் ஏலக்காய் சேர்த்து சிறிது நேரம் தாளித்து, பின் வெங்காய பேஸ்ட் சேர்த்து 4-5 நிமிடம் வதக்க வேண்டும்.

பின் அதில் இஞ்சி, பூண்டு பேஸ்ட், மிளகு தூள் மற்றும் தயிர் சேர்த்து, கெட்டி சேராதவாறு கிளறி விட்டு, பிறகு அரைத்து வைத்துள்ள முந்திரி பேஸ்ட் சேர்த்து 2-3 நிமிடம் கிளறி விட வேண்டும்.

அடுத்து, அதில் வேக வைத்துள்ள காய்கறிகள் மற்றும் உப்பு சேர்த்து, 1/2-1 கப் தண்ணீர் ஊற்றி 3-4 நிமிடம் கிளறி விட்டு, பின் பன்னீர் துண்டுகள், கரம் மசாலா சேர்த்து பிரட்டி, தட்டு கொண்டு மூடி 4-5 நிமிடம் குறைவான தீயில் கொதிக்க விட்டு இறக்கி, மேலே பிரஷ் க்ரீம் கொண்டு அலங்கரித்தால், சுவையான பன்னீர் வெஜிடேபிள் குருமா ரெடி!!! இது சாப்பத்திக்கு மிகவும் சுவையாக இருக்கும்.