பசலைக்கீரை பொரியல்

பசலைக்கீரையின் நன்மைகளைப் பற்றி சொல்லித்தான் தெரிய வேண்டும் என்பதில்லை. ஏனெனில் அந்த அளவில் இதன் நன்மைகளைப் பற்றி பலமுறை படித்திருப்போம். சிலருக்கு இந்த பசலைக்கீரையை கடைந்து சாப்பிட்டால் பிடிக்காது. அத்தகையவர்கள் இதனை பொரியல் செய்து சாப்பிடலாம்.

இங்கு பசலைக்கீரையைக் கொண்டு எப்படி பொரியல் செய்வது என்று கொடுத்துள்ளோம். அதைப் படித்து இன்று செய்து பாருங்கள்.

தேவையான பொருட்கள்:

பசலைக்கீரை - 2 கட்டு (நறுக்கியது)
வெங்காயம் - 2 (நறுக்கியது)
பூண்டு - 4 பற்கள் (நறுக்கியது)
பச்சை மிளகாய் - 2 (நறுக்கியது)
கடலைப் பருப்பு - 1 டேபிள் ஸ்பூன்
உளுத்தம் பருப்பு - 1 டேபிள் ஸ்பூன்
தேங்காய் - 4 டேபிள் ஸ்பூன் (துருவியது)
மஞ்சள் தூள் - 1 டீஸ்பூன்
மல்லி தூள் - 1 டீஸ்பூன்
உப்பு - தேவையான அளவு
சீரகம் - 1 டீஸ்பூன்
எண்ணெய் - 1 டேபிள் ஸ்பூன்

செய்முறை:

முதலில் ஒரு வாணலியை அடுப்பில் வைத்து, அதில் எண்ணெய் ஊற்றி காய்ந்ததும், அதில் சீரகம், கடலைப்பருப்பு, உளுத்தம் பருப்பு சேர்த்து பொன்னிறமாக வறுக்க வேண்டும்.

பின்பு அதில் பூண்டு, பச்சை மிளகாய் மற்றும் வெங்காயம் சேர்த்து 4-5 நிமிடம் வதக்கி விட வேண்டும்.

பின் அதில் பசலைக்கீரையை சேர்த்து 5 நிமிடம் வதக்கி விட வேண்டும்.

பிறகு அத்துடன் உப்பு, மஞ்சள் தூள் மற்றும் மல்லி தூள் சேர்த்து, 3-4 நிமிடம் நன்கு கிளறி விட்டு, பின் அதில் துருவி வைத்துள்ள தேங்காயை சேர்த்து 1 நிமிடம் கிளறி இறக்கினால், சுவையான பசலைக்கீரை பொரியல் ரெடி!!!