ஈவ்னிங் டைம்-ல காபி, டீ-க்கு பதிலா.. ஒருமுறை இந்த சூப்பை செஞ்சு கொடுங்க.. எல்லாரும் விரும்பி குடிப்பாங்க..

Veg Clear Soup Recipe In Tamil: சூப் உடலுக்கு மிகவும் நல்லது. சொல்லப்போனால் நாம் சாப்பிடும் காய்கறிகளில் உள்ள சத்துக்கள் அனைத்தையும் பெற சிறந்த வழி, அவற்றைக் கொண்டு சூப் தயாரித்து குடிப்பது தான். மாலை வேளையில் எப்போதும் காபி, டீ-யை குடிப்பதற்கு பதிலாக, அவ்வப்போது சூப் தயாரித்து குடித்து வந்தால், உடலும் ஆரோக்கியமாக இருக்கும்.

சூப்புகளில் பல வெரைட்டிகள் உள்ளன. அதில் ஒன்று தான் வெஜ் க்ளியர் சூப். இந்த சூப் செய்வது மிகவும் சுலபம் மற்றும் இது குழந்தைகள் முதல் பெரியவர்கள் வரை அனைவரும் விரும்பி சாப்பிடக்கூடியவாறு இருக்கும். தற்போது தமிழகத்தில் ஆங்காங்கு மழை பெய்து வருவதால் இப்படி சூப் தயாரித்து குடித்தால், உடல் ஆரோக்கியமாக இருக்கும்.

உங்களுக்கு வெஜ் க்ளியர் சூப் ரெசிபியை எப்படி செய்வதென்று தெரிந்து கொள்ள வேண்டுமா? கீழே வெஜ் க்ளியர் சூப் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வெண்ணெய் - 1 டீஸ்பூன்
* இஞ்சி - 1 டீஸ்பூன் (பொடியாக நறுக்கியது)
* பூண்டு - 3 பல் (பொடியாக நறுக்கியது)
* வெங்காயம் - 1 (பொடியாக நறுக்கியது)
* பச்சை மற்றும் வெள்ளை ஸ்ப்ரிங் ஆனியன்கள் - 2 (பொடியாக நறுக்கியது)
* கேரட், பீன்ஸ், காலிஃப்ளவர் - 2 கப்
* உப்பு - 1 டீஸ்பூன்
* மிளகுத் தூள் - 1 டீஸ்பூன்
* தண்ணீர் - 5 கப்
* சோள மாவு - 2 டீஸ்பூன்

செய்முறை:

* முதலில் ஒரு வாணலியை அடுப்பில் வைத்து, அதில் வெண்ணெய் சேர்த்து உருகியதும், இஞ்சி, பூண்டு சேர்த்து 1 நிமிடம் மிதமான தீயில் வைத்து வதக்க வேண்டும்.
* பின் அதில் பொடியாக நறுக்கிய வெங்காயம், வெள்ளை மற்றும் பச்சை ஸ்பிரிங் ஆனியன்களை சேர்த்து ஒரு நிமிடம் நன்கு வதக்க வேண்டும்.
* அடுத்து அதில் காய்கறிகளை 5 நிமிடம் நன்கு பச்சை வாசனை போக வதக்க வேண்டும்.
* பின்பு அதில் நீரை ஊற்றி காய்கறிகள் நன்கு வேக வைக்க வேண்டும்.
* பிறகு அதில் சுவைக்கேற்ப உப்பு மற்றும் மிளகுத் தூளை சேர்த்து கிளறி விட வேண்டும்.
* பின் அதில் சோள மாவை நீரில் கரைத்து ஊற்றி கிளறி, நன்கு கொதிக்க வைத்து இறக்கினால், சுவையான வெஜ் க்ளியர் சூப் தயார்.

Image Courtesy: yummytummyaarthi