மணமணக்கும்... காரசாரமான... ரெட் சிக்கன் கிரேவி

Spicy Red Chicken Gravy: சிக்கன் பிரியர்களே! நீங்கள் அடிக்கடி வீட்டில் சிக்கனை சமைத்து சாப்பிடுவீர்களா? அதுவும் சிக்கனை நன்கு காரசாரமாக சமைத்து சாப்பிட பிடிக்குமா? அப்படியானால் நிச்சயம் உங்களுக்கு ரெட் சிக்கன் கிரேவி பிடிக்கும்.

இந்த ரெட் சிக்கன் கிரேவி சாதம், சப்பாத்தி, பூரி ஆகியவற்றுடன் சேர்த்து சாப்பிட அற்புதமாக இருக்கும். இன்று இரவு உங்கள் வீட்டில் சிக்கன் செய்ய நினைத்தால், இந்த ரெட் சிக்கன் கிரேவி செய்யுங்கள். ஏனெனில் இது செய்வதற்கு மிகவும் ஈஸியாக இருக்கும்.

முக்கியமாக இது வேலை முடிந்து வீட்டிற்கு வந்ததும் செய்வதற்கு ஏற்ற வகையில் சுலபமான செய்முறையைக் கொண்டிருக்கும். உங்களுக்கு ரெட் சிக்கன் கிரேவியை எப்படி செய்வதென்று தெரிந்து கொள்ள வேண்டுமா?

கீழே ரெட் சிக்கன் கிரேவி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* சிக்கன் - 1/2 கிலோ
* எண்ணெய் - 4 டேபிள் ஸ்பூன்
* பெரிய வெங்காயம் - 2 (பொடியாக நறுக்கியது)
* கொத்தமல்லி - ஒரு கையளவு

ஊற வைப்பதற்கு..

* கரம் மசாலா - 1 டேபிள் ஸ்பூன்
* மிளகாய் தூள் - 1 டீஸ்பூன்
* மஞ்சள் தூள் - 1 டீஸ்பூன்
* சீரகத் தூள் - 2 டீஸ்பூன்
* இஞ்சி பூண்டு பேஸ்ட் - 1 டேபிள் ஸ்பூன்
* தயிர் - 1 கப்
* உப்பு - சுவைக்கேற்ப

அரைப்பதற்கு...

* வரமிளகாய் - 10
* பூண்டு - 6-8 பல்

செய்முறை:

* முதலில் சிக்கனை நன்கு கழுவிக் கொள்ள வேண்டும்.
* பின் கழுவிய சிக்கனை ஒரு பாத்திரத்தில் எடுத்து, அதில் கரம் மசாலா, மிளகாய் தூள், மஞ்சள் தூள், சீரகத் தூள், இஞ்சி பூண்டு பேஸ்ட், தயிர், சுவைக்கேற்ப உப்பு சேர்த்து நன்கு பிரட்டி, அதை குறைந்தது 30 நிமிடம் ஊற வைக்க வேண்டும்.
* பின்பு மிக்சர் ஜாரில் காஷ்மீரி வர மிளகாய் மற்றும் பூண்டு சேர்த்து, சிறிது நீரை ஊற்றி நன்கு மென்மையாக அரைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், வெங்காயத்தை சேர்த்து, பொன்னிறமாக வதக்க வேண்டும்.
* பிறகு அதில் ஊற வைத்துள்ள சிக்கனை சேர்த்து, 5 நிமிடம் நன்கு வதக்க வேண்டும்.
* பின் அதை மூடி வைத்து, குறைவான தீயில் வைத்து 25-30 நிமிடம் வேக வைக்க வேண்டும்.
* சிக்கன் நன்கு வெந்ததும், மூடியைத் திறந்து, தீயை அதிகரித்து, சிக்கனை நன்கு கிளற வேண்டும்.
* அடுத்து அதில் அரைத்து வைத்துள்ள மிளகாய் விழுதை சேர்த்து, 10 நிமிடம் நன்கு பச்சை வாசனை போக வதக்க வேண்டும்.
* பின் கிரேவிக்கு தேவையான அளவு நீரை ஊற்றி கிளறி, மூடி வைத்து கிரேவியை நன்கு கொதிக்க வைத்து இறக்கி, மேலே கொத்தமல்லியைத் தூவினால், சுவையான மற்றும் காரசாரமான ரெட் சிக்கன் கிரேவி தயார்.

Image Courtesy: yummytummyaarthi