குடைமிளகாயை வெச்சு இந்த மாதிரி சட்னி செய்யுங்க.. குழந்தைங்க 2 இட்லி எக்ஸ்ட்ரா சாப்பிடுவாங்க...

Capsicum Chutney: இன்று இரவு உங்கள் வீட்டில் இட்லி அல்லது தோசை செய்ய போகிறீர்களா? அதற்கு என்ன சட்னி செய்வதென்று யோசித்துக் கொண்டிருக்கிறீர்களா? தினமும் ஒரே மாதிரியான சட்னி செய்து போரடித்துவிட்டதா? சற்று வித்தியாசமான சட்னியை செய்ய நினைக்கிறீர்களா?

உங்கள் வீட்டில் குடைமிளகாய் உள்ளதா? அப்படியானால் அந்த குடைமிளகாய் கொண்டு சட்னி செய்யுங்கள். குடைமிளகாயில் வைட்டமின் சி அதிகம் உள்ளது. எனவே இதைக் கொண்டு சட்னி செய்து சாப்பிடும் போது, நோயெதிர்ப்பு சக்தி வலுபெறும்.

உங்களுக்கு குடைமிளகாய் கொண்டு எப்படி சட்னி செய்வதென்று தெரிந்து கொள்ள வேண்டுமா? கீழே குடைமிளகாய் சட்னியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

சிவப்பு குடைமிளகாய் சட்னிக்கு..

* பெரிய சிவப்பு குடைமிளகாய் - 1 (துண்டுகளாக்கப்பட்டது)
* பெரிய தக்காளி - 1 (நறுக்கியது)
* பூண்டு - 5 பல் (நறுக்கியது)
* வரமிளகாய் - 3
* உப்பு - சுவைக்கேற்ப
* புளி - 1 சிறிய துண்டு
* எண்ணெய் - 3 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1/2 டீஸ்பூன்

பச்சை குடைமிளகாய் சட்னிக்கு..

* பச்சை குடைமிளகாய் - 2 (துண்டுகளாக்கப்பட்டது)
* பச்சை மிளகாய் - 2 (நறுக்கியது)
* கறிவேப்பிலை - சிறிது
* பூண்டு - 6 பல்
* எள்ளு விதை - 1 டேபிள் ஸ்பூன்
* சீரகம் - 1 டீஸ்பூன்
* கடுகு - 1 டீஸ்பூன்
* புளி பேஸ்ட் - 1 டேபிள் ஸ்பூன்
* கொத்தமல்லி - 2 டேபிள் ஸ்பூன்
* மஞ்சள் தூள் - 1/2 டீஸ்பூன்
* உப்பு - சுவைக்கேற்ப
* சர்க்கரை - 1 டீஸ்பூன்
* எண்ணெய் - 1 டேபிள் ஸ்பூன்

மஞ்சள் குடைமிளகாய் சட்னிக்கு...

* மஞ்சள் குடைமிளகாய் - 1 (நறுக்கியது)
* பெரிய வெங்காயம் - 1 (துண்டுகளாக்கப்பட்டது)
* பச்சை மிளகாய் - 3
* மஞ்சள் தூள் - 1 டீஸ்பூன்
* உப்பு - சுவைக்கேற்ப
* சர்க்கரை - 1/2 டீஸ்பூன்
* புளிபேஸ்ட் - 1 டீஸ்பூன்
* எண்ணெய் - 3 டேபிள் ஸ்பூன்
* கடுகு - 1 டீஸ்பூன்

செய்முறை:

சிவப்பு குடைமிளகாய் சட்னிக்கு...

* முதலில் ஒரு வாணலியை அடுப்பில் வைத்து, அதில் 1 டேபிள் ஸ்பூன் எண்ணெய் ஊற்றி சூடானதும் வரமிளகாய் மற்றும் பூண்டு சேர்த்து வதக்கி இறக்கிக் கொள்ள வேண்டும்.
* பின் அதே எண்ணெயில் சிவப்பு குடைமிளகாய் மற்றும் தக்காளியை சேர்த்து, பச்சை வாசனை போக வதக்கி இறக்கி குளிர வைக்க வேண்டும்.
* பின்பு மிக்சர் ஜாரில் வதக்கிய பொருட்கள் அனைத்தையும் சேர்த்து, சுவைக்கேற்ப உப்பு மற்றும் புளியை சேர்த்து நன்கு மென்மையாக அரைத்துக் கொள்ள வேண்டும்.
* பின் ஒரு சிறு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு மற்றும் உளுத்தம் பருப்பை சேர்த்து தாளிக்க வேண்டும்.
* பிறகு அதில் அரைத்த சட்னியை ஊற்றி, எண்ணெய் பிரியும் வரை வேக வைத்து இறக்கினால், சுவையான சிவப்பு குடைமிளகாய் சட்னி தயார்.

பச்சை குடைமிளகாய் சட்னிக்கு...

* ஒரு வாணலியை அடுப்பில் வைத்து, அதில் எள்ளு விதைகளை சேர்த்து பொன்னிறமாக வறுத்து, தனியாக ஒரு தட்டில் எடுத்து வைத்துக் கொள்ள வேண்டும்.
* பின் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு மற்றும் சீரகம் சேர்த்து தாளிக்க வேண்டும்.
* பின்பு அதில் கறிவேப்பிலை, பச்சை மிளகாய், பூண்டு சேர்த்து சிறிது நேரம் வதக்க வேண்டும்.
* பின் அதில் குடைமிளகாயை சேர்த்து, சுவைக்கேற்ப உப்பு மற்றும் மஞ்சுள் தூள் சேர்த்து நன்கு கிளறி விட வேண்டும்.
* குடைமிளகாய் நன்கு வெந்ததும், அதில் சிறிது சர்க்கரை மற்றும் வறுத்து வைத்துள்ள எள்ளு விதைகளை சேர்த்து கிளறி, புளி பேஸ்ட் சேர்த்து கிளறி இறக்கி குளிர வைக்க வேண்டும்.
* பிறகு மிக்சர் ஜாரில் வதக்கிய பொருட்களை சேர்த்து அரைத்தால், சுவையான பச்சை குடைமிளகாய் சட்னி தயார்.

மஞ்சள் குடைமிளகாய் சட்னிக்கு...

* ஒரு வாணலியை அடுப்பில் வைத்து, அதில் 1 டேபிள் ஸ்பூன் எண்ணெய் ஊற்றி சூடானதும், வெங்காயம், குடைமிளகாய் சேர்த்து 5 நிமிடம் நன்கு வதக்க வேண்டும்.
* பின் அதில் சுவைக்கேற்ப உப்பு, சர்க்கரை, புளி மற்றும் மஞ்சள் தூள் சேர்த்து நன்கு கிளறி, 5 நிமிடம் வேக வைக்க வேண்டும்.
* பிறகு வதக்கிய பொருட்களை இறக்கி குளிர வைத்து, மிக்சர் ஜாரில் போட்டு நன்கு மென்மையாக அரைத்துக் கொள்ள வேண்டும்.
* பின்பு ஒரு வாணலியை அடுப்பில் வைத்து, அதில் 2 டேபிள் ஸ்பூன் எண்ணெய் ஊற்றி சூடானதும், கடுகு சேர்த்து தாளித்து, அரைத்த சட்னியை சேர்த்து கிளறி, எண்ணெய் பிரியும் வரை வேக வைத்து இறக்கினால், சுவையான மஞ்சள் குடைமிளகாய் சட்னி தயார்.

Image Courtesy: yummytummyaarthi