ஈவ்னிங் 10 நிமிடத்தில் இந்த டீக்கடை வெங்காய வடையை செஞ்சு சாப்பிடுங்க... மொறுமொறுன்னு செமயா இருக்கும்..

Tea Kadai Vengaya Vadai Recipe In Tamil: மாலை வேளையில் உங்கள் வீட்டில் உள்ளோர் காபி, டீ குடிக்கும் போது ஏதாவது ஸ்நாக்ஸ் செய்து கொடுக்க கேட்கிறார்களா? அதுவும் வழக்கமாக செய்வது போன்று வடை, பஜ்ஜி செய்யாமல், கடைகளில் விற்கப்படுவது போன்ற சுவையைக் கொண்ட ஸ்நாக்ஸ் செய்து கொடுக்க சொல்கிறார்களா?

இதுவரை நீங்கள் டீக்கடை வெங்காய வடையை சாப்பிட்டிருக்கிறீர்களா? அந்த வடையின் சுவையே தனியாக இருக்கும். அந்த டீக்கடை வெங்காய வடையை செய்து கொடுங்கள். இந்த வெங்காய வடை நீங்கள் வழக்கமாக செய்வது போன்று இல்லாமல், சற்று வித்தியாசமாகவும், அதே சமயம் ருசியாகவும் இருக்கும்.

உங்களுக்கு இந்த டீக்கடை வெங்காய வடையை எப்படி செய்வதென்று தெரிந்து கொள்ள வேண்டுமா? கீழே டீக்கடை வெங்காய வடை ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* வெங்காயம் - 3
* உப்பு - 1 டீஸ்பூன்
* இஞ்சி - 2 இன்ச் (துருவியது)
* பச்சை மிளகாய் - 3 (பொடியாக நறுக்கியது)
* கறிவேப்பிலை - சிறிது (பொடியாக நறுக்கியது)
* சோம்பு தூள் - 1 டீஸ்பூன்
* கடலை மாவு - 4 டேபிள் ஸ்பூன்
* மைதா மாவு - 4 டேபிள் ஸ்பூன்
* எண்ணெய் - பொரிப்பதற்கு தேவையான அளவு

செய்முறை:

* முதலில் வெங்காயத்தை நீளவாக்கில் மெல்லியதாக நறுக்கிக் கொள்ள வேண்டும்.
* பின் ஒரு பாத்திரத்தில் நறுக்கிய வெங்காயத்தை எடுத்து, அதில் உப்பு, பொடியாக நறுக்கிய இஞ்சி, பச்சை மிளகாய் சேர்த்து கைகளால் நன்கு பிசைந்து, 10 நிமிடம் மூடி வைக்க வேண்டும்.
* பின்பு அதில் பொடியாக நறுக்கிய கறிவேப்பிலை, சோம்பு தூள், கடலை மாவு, மைதா மாவு சேர்த்து கைகளால் நன்கு பிசைந்து விட வேண்டும்.
* முக்கியமாக இப்படி பிசையும் போது நீர் எதுவும் சேர்க்க வேண்டாம். ஒருவேளை அதிக நீராக இருப்பதை உணர்ந்தால், அத்துடன் சிறிது மைதா மற்றும் கடலை மாவை சேர்த்து பிசைந்து கொள்ளுங்கள்.
* இறுதியாக ஒரு வாணலியை அடுப்பில் வைத்து, அதில் பொரிப்பதற்கு தேவையான அளவு எண்ணெய் ஊற்றி சூடானதும், பிசைந்து வைத்துள்ளதை சிறிது எடுத்து உருட்டி, லேசாக தட்டி எண்ணெயில் போட்டு மிதமான தீயில் வைத்து, பொன்னிறமாக பொரித்து எடுத்தால், சுவையான டீக்கரை வெங்காய வடை தயார்.

Image Courtesy: Today's Samayal