தக்காளியுடன் இந்த ஒரு பொருளை சேர்த்து சட்னி செஞ்சு பாருங்க.. அப்புறம் எப்பவும் இப்படி தான் சட்னி செய்வீங்க..

Mint Tomato Chutney Recipe In Tamil: காலையில் உங்கள் வீட்டில் இட்லி செய்யப் போகிறிர்களா? இட்லிக்கு சப்பென்று சைடு டிஷ் செய்வதை விட சற்று புளிப்பாக சைடு டிஷ் இருந்தால், 2 இட்லி எக்ஸ்ட்ரா சாப்பிடலாம். எனவே தக்காளி சட்னி தான் இட்லிக்கு எப்போதுமே பெஸ்ட். அதுவும் வழக்கமாக செய்யும் தக்காளி சட்னியை விட, சட்னி அரைக்கும் போது அத்துடன் 2 கைப்பிடி புதினாவை சேர்க்கும் போது, சுவை இன்னும் அட்டகாசமாக இருக்கும்.

முக்கியமாக இந்த சட்னி செய்வதற்கு ஈஸியாக இருப்பதோடு, குழந்தைகள் முதல் பெரியவர்கள் வரை அனைவரும் கேட்டு விரும்பி சாப்பிடக்கூடியவாறு இருக்கும். அதோடு இந்த சட்னி வேலைக்கு செல்பவர்கள் சட்டென்று செய்யக்கூடிய வகையில் சுலபமாக இருக்கும்.

உங்களுக்கு புதினா தக்காளி சட்னியை எப்படி செய்வதென்று தெரிந்து கொள்ள வேண்டுமா? கீழே புதினா தக்காளி சட்னி ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* எண்ணெய் - 2 டேபிள் ஸ்பூன்
* வரமிளகாய் - 4
* வெங்காயம் - 4 (பொடியாக நறுக்கியது)
* பெரிய தக்காளி - 2 (பொடியாக நறுக்கியது)
* புதினா - 2 கைப்பிடி
* உப்பு - சுவைக்கேற்ப

தாளிப்பதற்கு...

* எண்ணெய் - 1 டேபிள் ஸ்பூன்
* கடுகு - 1 டீஸ்பூன்
* உளுத்தம் பருப்பு - 1 டீஸ்பூன்
* கறிவேப்பிலை - 1 கொத்து

செய்முறை:

* முதலில் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், வரமிளகாய் சேர்த்து, வரமிளகாய் பலூன் போன்று வீங்கி வரும் வரை வறுத்துக் கொள்ள வேண்டும்.
* பின் அதில் வெங்காயத்தை சேர்த்து பொன்னிறமாகும் வரை வதக்க வேண்டும்.
* பின்பு அதில் தககாளியை சேர்த்து, மென்மையாகும் வரை வதக்க வேண்டும்.
* அடுத்து அதில் 2 கைப்பிடி புதினாவை சேர்த்து 1 நிமிடம் வதக்கி இறக்கி, குளிர வைக்க வேண்டும்.
* பிறகு மிக்சர் ஜாரில் வதக்கிய பொருட்களை போட்டு, சுவைக்கேற்ப உப்பு சேர்த்து, சற்று கொரகொரவென்று அரைத்துக் கொள்ள வேண்டும்.
* பின் அரைத்த சட்னியை ஒரு கிண்ணத்தில் எடுத்துக் கொள்ள வேண்டும்.
* இறுதியாக ஒரு வாணலியை அடுப்பில் வைத்து, அதில் தாளிப்பதற்கு 1 டேபிள் ஸ்பூன் எண்ணெய் ஊற்றி சூடானதும், கடுகு, உளுத்தம் பருப்பு, கறிவேப்பிலை சேர்த்து தாளித்து, சட்னியுடன் சேர்த்து கிளறினால், சுவையான புதினா தக்காளி சட்னி தயார்.

Image Courtesy: Apoorvaa's Nalabagam