சத்தான... மசாலா பால்

மாலை வேளையில் எப்போதும் காபி, டீ குடித்து போர் அடித்துவிட்டதா? தற்போது காலநிலை குளிர்ச்சியாக இருப்பதால், சூடாகவும், சத்தாகவும் குடிக்க பலருக்கும் ஆசை இருக்கும். நீங்கள் அப்படியொரு பானத்தைக் குடிக்க விரும்பினால், மசாலா பால் குடியுங்கள். இந்த மசாலா பால் நட்ஸ்கள் மற்றும் மசாலா பொருட்கள் கொண்டு தயாரிக்கப்படுவதால், ஆரோக்கியத்திற்கு மிகவும் நல்லது. இந்த பானம் பெரியோர்கள் முதல் குழந்தைகள் வரை அனைவருமே விரும்பி குடிக்குமாறு இருக்கும்.

உங்களுக்கு மசாலா பால் எப்படி செய்வதென்று தெரிந்து கொள்ள வேண்டுமா? கீழே மசாலா பால் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கொள்ளுங்கள்.

தேவையான பொருட்கள்:

* பால் - 2 கப்

* சர்க்கரை - 2 டேபிள் ஸ்பூன்

* பட்டை - 1/2 இன்ச்

* கிராம்பு - 2

* ஏலக்காய் - 1

* முந்திரி - 6

* பாதாம் - 6

* பிஸ்தா - 8

* குங்குமப்பூ - 1 சிட்டிகை

செய்முறை:

* முதலில் ஒரு வாணலியை அடுப்பில் வைத்து, அதில் முந்திரி, பாதாம், பிஸ்தா, பட்டை, கிராம்பு, ஏலக்காய் ஆகியவற்றை சேர்த்து 2-3 நிமிடம் வறுத்து இறக்கி, சிறிது குங்குமப்பூவை சேர்த்து ஒருமுறை கிளறி விட வேண்டும்.

* வறுத்த பொருட்களானது நன்கு குளிர்ந்ததும், அதை மிக்சர் ஜாரில் போட்டு நன்கு அரைத்து பொடி செய்து கொள்ள வேண்டும்.

* பின்பு ஒரு பாத்திரத்தில் பாலை ஊற்றி சூடாகி கொதிக்க ஆரம்பித்ததும், நெருப்பைக் குறைக்க வேண்டும்.

* பின் பாலில் 2 டேபிள் ஸ்பூன் சர்க்கரை சேர்த்து, 1/4 டீஸ்பூன் மஞ்சள் தூள் சேர்த்து ஒரு நிமிடம் கொதிக்க விட வேண்டும்.

* பிறகு அதில் அரைத்த பொடியை சேர்த்து கிளறி, 2-3 நிமிடம் கொதிக்க வைத்து இறக்கி, ஒரு டம்ளரில் ஊற்றிக் கொள்ள வேண்டும்.

* பின் அந்த பாலின் மேல் சிறிது குங்குமப்பூ மற்றும் பொடித்த நட்ஸ் சிறிது தூவினால், சுவையான மற்றும் சத்தான மசாலா பால் தயார்.

Image Courtesy: sharmispassions