லன்ச்பாக்ஸிற்கு ஒருடைம் மசாலா தேங்காய் சாதம் செஞ்சு குடுங்க.. பசங்க விரும்பி சாப்பிடுவாங்க..

Posted By:

Lunchbox Special Masala Coconut Rice Recipe In Tamil: காலையில் உங்கள் பசங்களுக்கு டிபன் பாக்ஸிற்கு என்ன செய்து கொடுப்பது என்று யோசித்துக் கொண்டிருக்கிறீர்களா? பெரும்பாலும் நீங்கள் வெரைட்டி ரைஸ் தான் செய்து கொடுப்பீர்களா? அதுவும் உங்கள் பிள்ளைகளுக்கு தேங்காய் சாதம் என்றால் ரொம்ப பிடிக்குமா? எப்போதும் ஒரே சுவையில் தான் தேங்காய் சாதம் செய்து கொடுப்பீர்களா? அப்படியானால் ஒருமுறை மசாலா தேங்காய் சாதம் செய்து கொடுங்கள்.

Lunchbox Recipes How To Make Masala Coconut Rice

இந்த தேங்காய் சாதம் வழக்கமாக செய்யும் தேங்காய் சாதத்தின் சுவையில் இருந்து மாறுபட்டிருக்கும். ஆனால் நன்கு காரசாரமாக, பிள்ளைகள் விரும்பி சாப்பிடக்கூடிய சுவையில் இருக்கும். முக்கியமாக இந்த தேங்காய் சாதம் செய்வதற்கு மிகவும் சுலபம். வேலைக்கு செல்பவர்களும், பேச்சுலர்களும் இதுப்போன்று எளிமையான வெரைட்டி ரைஸ் ரெசிபியை தெரிந்து வைத்துக் கொண்டால் அவசர காலத்திற்கு உதவியாக இருக்கும்.

உங்களுக்கு இந்த மசாலா தேங்காய் சாதம் ரெசிபியை எப்படி செய்வதென்று தெரிந்து கொள்ள வேண்டுமா? கீழே மசாலா தேங்காய் சாதம் ரெசிபியின் எளிய செய்முறை கொடுக்கப்பட்டுள்ளது. அதைப் படித்து செய்து சுவைத்து எப்படி இருந்தது என்று எங்களுடன் உங்கள் கருத்துக்களைப் பகிர்ந்து கெதள்ளுங்கள்.

தேவையான பொருட்கள்:

அரைப்பதற்கு...

* தேங்காய் - 3/4 கப்
* மிளகாய் தூள் - 1 டீஸ்பூன்
* மல்லித் தூள் - 1 டீஸ்பூன்
* மஞ்சள் தூள் - 1 சிட்டிகை
* பூண்டு - 2 பல்
* கறிவேப்பிலை - 1 கொத்து

தாளிப்பதற்கு...

* எண்ணெய் - 1 டேபிள் ஸ்பூன்
* கடுகு - 1/2 டீஸ்பூன்
* உளுத்தம் பருப்பு - 1 டேபிள் ஸ்பூன்
* கடலைப் பருப்பு - 1 டேபிள் ஸ்பூன்
* வெங்காயம் - 1/2 (பொடியாக நறுக்கியது)
* பச்சை மிளகாய் - 1 (நறுக்கியது)
* கறிவேப்பிலை - 1 கொத்து
* அரைத்த மசாலா
* வடித்த சாதம் - 2 கப்
* உப்பு - சுவைக்கேற்ப

செய்முறை:

* முதலில் மிக்சர் ஜாரில் தேங்காய், மிளகாய் தூள், மல்லித் தூள், மஞ்சள் தூள், பூண்டு, கறிவேப்பிலை ஆகியவற்றை சேர்த்து, நீர் சேர்க்காமல் அரைத்துக் கொள்ள வேண்டும்.
* பின்னர் ஒரு வாணலியை அடுப்பில் வைத்து, அதில் எண்ணெய் ஊற்றி சூடானதும், கடுகு, உளுத்தம் பருப்பு, கடலைப் பருப்பு சேர்த்து தாளிக்க வேண்டும்.
* பின்பு அதில் பொடியாக நறுக்கிய பாதி வெங்காயம் மற்றும் நறுக்கிய பச்சை மிளகாயை சேர்த்து, சிறிது கறிவேப்பிலையைத் தூவி நன்கு வதக்க வேண்டும்.
* அடுத்து அதில் அரைத்த தேங்காய் மசாலாவை சேர்த்து குறைவான தீயில் வைத்து 5 நிமிடம் நன்கு வதக்க வேண்டும்.
* பிறகு அதில் வடித்து வைத்துள்ள சாதத்தை சேர்த்து, சுவைக்கேற்ப உப்பு சேர்த்து நன்கு கிளறி இறக்கினால், சுவையான மசாலா தேங்காய் சாதம் தயார்.

[ of 5 - Users]
Story first published: Thursday, November 19, 2026, 22:08 [IST]
Desktop Bottom Promotion